On piässyh ilmah kolmas Peppi-kirju:
Astrid Lindgren: Peppi Pitkysukku suvimerel. Karjalan Sivistysseura, 2021,Nämä kirjat ollah ylen popul'arnoit. Kirjoin tiähti on vägevy neidine, Peppi. Juondeh kirjois menöy täh tabah. Vakkinazet rahvahat, semmite rozvot, suahah tundie tyttözen väin. Vägevän tytön, kudamal on tuataspäi suadu huavo kuldumoniettua, ei maksa kävvä školah. Pitkäl merimatkal diikoloin suarel häi kävyy.
Tiedotehniekku piäzi ilmah kezäl. Tarkoitus oli, ku sidä suas ostua Karjalan Kielen Kois, ga minun da KKK:n välis on ylipiäzemätöi raja. Toinah se vie avavuu.
Karjalan kielen elvytysohjelmu Suomes
Vuvven vaihtujes karjalan kielen elvytysohjelmu siirdyi konkursah puuttunuon Karjalan Kielen Seuran hantuzispäi Päivännouzu-Suomen yliopiston hantuzih. Elvytysprojektu tiijottau toimindan jatkandas sivustol https://blogs.uef.fi/karjalanelvytys/2021/02/11/hanke-kaynnistyy/ Adresis https://link.webropolsurveys.com/S/842D5FBEF78C5C8C projektan vedäjät kyzytäh karjalankielen pagiziijoukon mielii kielidielos da vihjehii, kui ruadua. Kyzely on avvoi 28.2.2021 suate.
Tiedotehniekkua
Olen ruvennuh päivittämäh / uvvelleh kirjuttamah Tiedotehniekku kirjua.
Tavoittehennu on suaha ruado valmehekse da painattua kirju vuvven puolivälih mennes. Ku julguajannu on Karjalan Kielen Kodi, sentäh ruavon eistymisty suaugi kaččuo KKK:n adresis sivul.
Midä ruavoin vuvvennu 2020?
alguvuozi: kiännösruado
loppuvuozi: Javascript ohjelmoindu
(https://karjalankieliopit.net/atlas/bubon/bubon.html)
Täs kai, muudu en kerrinnyh. (mp)
Riputin nämih adressiloih nengomii kirjuttajale jygiettävii duumii jälgimäzen vuvven aijal:
- Kieli da mieli
- Karjalan kielen da murdehien roindu
- Jättiä hyvä jälgi
- Lang: Baltiekkumerensuomelazien tulendu
Karjalan Kielen Koin verkosivustol on ilmoitus verkokursas, kui opastua karjalan kieldy lapsile. Sie ollah i ohjehet, kui piästä moizele kursale.
Kuvas Kotkatjärven školan endizet opastajat, Marija Pelešenko da Zinaida Dubinina, kudamienke vastavuin Kotkatjärves päivy karjalazien ix kerähmön jälgeh. Hyö oldih pionerat, kuduat pandih alguh karjalan kielen opastusta Kotkatjärves Nevvostoliiton langiendan jälgeh. Vahnois naisopastajis minuu ihastuttau se, ku hyö ollah kul'turnoit ristikanzat, kudai ei varata kohti paista viäryksis. Heidy varatah huliguanuprezidentatgi - hyö tietäh ku nengomat opastajat heidy käskettäs čuppuh seizomah ku huigaillakseh omua ičenviendiä.
Nengomua dialogua kävväh karjalan kieles:
kielikoodat
oigavo
Astrid Lindgren: Peppi Pitkysukku nouzou laivale Karjalan Sivistysseura, 2019, 151 s.
Peppi nouzou liigua normitettuu yhteiskundua vastah da ozuttau, min verran vägie pienes tytös löydyy da mittysty hyvytty da ezimerkillizytty hänes löydyy. Ga ozuttamattah jiäy, kui häi ičekseh opastui lugemah da kirjuttamah, da hätkeksego tävvytäh perityt kullat.
Sanna Hukkanen, Inkeri Aula: Mečänpeitto kiännös: Aleksi Ruuskanen Karjalan Kielen Seura 2019, 167 s.
Tämä on čoma kniigaine, kuvitettu kanzikuvan jyttyzil (enzimäzen luadijan) kuvil, käzittelöy tiedovoičendua da kalevalazii miittoi. En rubie kiittämäh engo moittimah, minul on vaigei lugie tekstua, kudamah sevoitetah miitoi da nygyaigua. Kiännökses "miiffu" on minule allergiisana ven'alazen transformatsien täh, da diivuičen sidä, tarkoittaugo Tapion kiännös "Tabivo" karjalazile midä?
Salbain tuaste väliaigazesti foruman. Kuibo voi olla nenga, ku forumal on 6 käyttäjiä, kudamat voijah lugie da kirjuttua, robotat on kielletty, ga yhtelaigua on 53 käyttäjiä. Nygöi en kergie, a lähiaijal azendan uvvelleh forumuohjelman da käynnistän tyhjäl tiedokannal. (Kirjutukset ollah talles.) Viego sitgi sinne voi liččavuo loittozis mualoispäi? Mil motivatsiel?
Vuvven enzimäzeh Kuopion paginkluuban vastavundah kerävyi 9 hengie.
Tuhukuun vastavundu on pyhänpiän 23.2. 18 čuasul Kompasas, Kauppakatu 40-42 Kuopios.
Uuzi karjalan kielen opastundukirju tverin karjalan murdehel
Irina Novak, Irina Komissarova Miun harpaukšet karielan kieleh - tverinkarielan algukursa Periodika 2019, 222 s., dvd-disku
Minun silmih tämä ozutahes aiga hyväkse algukursukirjakse. Peruskielioppi opastutah, sanastuo on lähes 3000 sanua, on harjaituksii. Teemat liitytäh perehen argeh. Löydyy sanastos i "komp'jutera" da "programmista". On "avtobussa", ei mašinua, ga toinah se ongi uvvenaigazuon merki? "Šanakniigas" tveriläzen sanan rinnal on vastineh ven'akse da suomekse.
Zuakkunoi
Periodika, 2019, 103 s.
Tämä kniigaine on kogomus Kindahan suarnoi, rinnakkai ven'akse da karjalakse, kuvitettu kanzikuvan jyttyzil kuvil. Erähii nämis olen jo muijalgi karjalakse lugennuh. Onhäi hyvä ku ven'an maltajat voijah lugie saman tekstan ven'akse da karjalakse, nikonzu ei ole liigua lugiettavua. Yhtelläh minul on huigie lugie Kindahan suarnoi. Se on kui enimistö nagrau primitiivizele vähembistöle. Kindahan mužikat olemmo karjalazet.