Opastundukniigua ičekseh opastujale

[mp]

Karjal, kui toizetgi kielet, on kebjei opastuo ku se ollou kois paginkielenny da sit vie školas da yliopistos opastandukielenny. A ku ei olle karjalakse pagizijua buabuo, muamo ei malta, tuatto ei tahto, da školas da yliopistosgi ei opasteta, kuibo sit opastut?

Erähis linnois on moizii ruavahan opistoloi, kudamis voi karjalan kieldygi opastuo. Joga keziä on nedälin piduhizet livvin da vienan kursit, kudamii Karjalan Liitto da Karjalan Sivistysseura järjestetäh. Ga nämmägi kursit ollah lyhyöt da vai harvat voijah niilöile tulla. Ongo muudu nevvuo? Kuibo jatkua, ku ken tahtonnou iče opastuo? Kniigois?

Suomen kieldy maltajile on Markianovan - Mensozen "Opastummo karjalakse" opastundukniigu, kudamua suau ostua Karjalan Kielen Seuras (http://www.karjalankielenseura.fi/kauppa). Ven'an libo muunkielizile ollougo muudu opastundukniigua? Školakäyttöh on luajittu Markianovan "Karjalan kielioppi" livvin karjalale da Zaikovan "Граматика карельского языка" vienan karjalale, a kusbo niidy voit ostua? Piäoza Markianovan kieliopis tiedokonehharjoituksienke, kui i muudu opastundumaterjualua löydyy nämmil sivuloil (http://opastajat.net/)

KKS:n sivuloil tožo löydyy Karjal-Suomi-Karjal sanakniigua (livvi). Suomalaisen Kirjallisuuden Seuras voi ostua Pohjanvalon 1947 luajittuu "Salmin murteen sanakirjua". Sen ližäozua nikus ei voi löydiä. Kniigulaukois voi vie ostua Tastin "Omua tšomua" sanakniigastu. On vie Suomalais-ugrilaisen Seuran suuri "Karjalan kielen sanakirja", ga se ei ole opastundusanakniigu. Markianovan - Pyölin Suomi-Karjal sanakniigan (20 000 sanua) ilmahpiäzendiä vuotammo ligakuus 2008. Karjalas ven'ah on ylen hyvä Makarovan "Словарь карельского языка" ga ihan uuttu sanastuo sie ei lövvy. Viego kus löydynnöy Markianovan - Boikon školasanakniigua "Karjal-ven'alaine sanakniigu"? Ven'a-karjal sanakniigua ongo olemas? Verko-ozuttehes http://sanakniigu.onego.ru on Sergejeffin Karjal-Ven'a-Suomi sanakniigu.

Tarkembat viitehtiijot täs mainittuloih kniigoih lövvytäh täs luvettelos http://opastajat.net/luvekkua/penttonen/mybib.html Tiedäygo ken muudu opastundumaterjualua, kudamua ičekseh opastui vois käyttiä? Kirjuttakkua!

[Iivari]

Tänä sygyzynä ilmeššyi Karjalan kielen sanakirjan verkkoversio, mi on ylen hyvä sanakniigu ^^

[mp]

Tovengi SU Seuran Karjalan kielen sanakirjan ilmahpiäständy oli suuri kul'tuururuado da Internettah riputtamine oli toine moine kul'tuururuado. Karjalan Kielen Seura myöy lopuškat bumuagusanakirjat äijiä huogiembal (oligo se 80e) migu min iče maksoin. Ičegi sidä puaksuh käytän. Sie hyvin löydyy sanan juurdu da ezimerkii. A pidäy sanuo, ku se hyvin pädöy pokoiniekku-Karjalas pagizemizeh, ei tulijan aijan Karjalas pagizemizeh. Se ei peitä kaikkii alovehii - kus Ahtia käveli siepäi löydyy sanua. Luondosanoi kačelles huomain ku tähgi kirjal ei pie sogiesti uskuo. Sendäh Markianovan-Pyölin sanakirju tarviččis puaran da ičengi pidäs tävvendellä da kohendella omua sanakniigastu.

[Maria]

Minä duumin gu pidäs olla kniigane, kudamas on kielioppi tiivihis muvvos, kus on vaivatoi kaččoa dielo kudamua duumaičou. Ičel luajin Opastummo Karjalakse -kniigan pohjal taulukoi, kaikkiedah 14 sivua, kudamis on sanaluokat ezimerkilöinke, nominoin sijat, nominoin vardalot, vokalivaihtelut partitiivus, adjektiivoin verdailuastehet, pronominat, verbilöin finiittu- da infiniittumuvvot, verbilöin vardalot... Nečes voin tarkistua gu jotagi eččin, da gu enembi tieduo tarvičen, voin kaččoa Opastummo Karjalakse -kniigas. (Enembi pidäz tarkistua da vasta sen jälgeh kirjuttua..)