Futurum (Iellinaigu)

Futurum merkiččöy teguo, kudai tapahtuu konzutah ielpäi.
Tänäpäi karjalan kielen urokal myö rubiemmo kirjuttamah ainehkirjutustu sygyzys. Kodvazen peräs hyö ruvetah murginoimah. Tytöt huomei ruvetah valmistamah luokkua pruazniekkah niškoi. Sinä kodvazen peräs roit kuulemah sidä.

Futurum roih abuverbilöis ruveta da roita da piäverbis III infinitiivas, t.s. tunnuksienke -mah, -mäh. Abuverbit taivutah preezensas. Piäverbi ei muutu.

Taivutammo futurumas verbit lugie (luve-, luge-), pajattua (pajata-, pajatta-), piirdiä (piirrä-, piirdä-):

y.l	rubien, roin	lugemah	pajattamah	piirdämäh
y.2	rubiet, roit	lugemah	pajattamah	piirdämäh
y.3	rubieu, roih	lugemah	pajattamah	piirdämäh
m.l	rubiemmo, roimmo	lugemah	pajattamah	piirdämäh
m.2	rubietto, roitto	lugemah	pajattamah	piirdämäh
m.3	ruvetah, roitah	lugemah	pajattamah	piirdämäh

Futuruman kieldomuodo

Futuruman kieldomuvvos taibuu kieldosana ei. Yksikön da monikon 3:ndes persounas käytetäh muoduo ei. Abuverbilöis ruveta da roita käytetäh leksiekkuvardaloloi rubie-, roi-, a monikon 3:ndes persounas käytetäh muodoloi ruveta, roita. Piäverbi ei muutu. Taivutammo ielmainitut verbit futuruman kieldomuvvos:

y.1	en rubie, roi	lugemah	pajattamah	piirdämäh
y.2	et rubie, roi	lugemah	pajattamah	piirdämäh
y.3	ei rubie, roi	lugemah	pajattamah	piirdämäh
m.l	emmo rubie, roi	lugemah	pajattamah	piirdämäh
m.2	etto rubie, roi	lugemah	pajattamah	piirdämäh
m.3	ei ruveta, roita	lugemah	pajattamah	piirdämäh

Futurumua käytetäh silloi, konzu pidäy ilmoittua teguo libo seikkua, kudai vie ei ole alganuh:
Minä rubien pezemäh latettu. Häi ei roi sidä nägemäh. Školan pihal lapset ruvetah kabrastamah illal. Naizet ruvetah pajattamah karjalazii pajoloi.