Adverbiali

Adverbiali on virkehen ližäozapuoli, kudai ozuttau tevon libo ruandan eri šeikkoi:
Velli eläy linnas. Minä tulin kodih järvelpäi myöhä. Sie rahvas eletäh hyvin. Gost'at tuldih jallai. Tyttö pezi astiet čälläten.
Adverbiali vastuau kyzymyksih kus? kuspäi? kunne? konzu? kui? mih tabah? mih luaduh? mikse?. Adverbialinnu enimyölleh käytetäh

adverbiloi: Opastujat hyvin kirjutetah tarkastusruado. Brihačut juostih teriämbäh. Sieniniekat lähtiettih meččäh aijoi da löyttih äijy siendy ihan lähäl.
nominoi oblikvusijois, puaksuh postpozitoinke da prepozitoinke: Lapset jo tuldih školaspäi. Koin tagan kazvoi suuri koivu. Hyö tahtotah loppie ruado enne ildua. Konsertu loppih kaheksan aigua. Tytär kirjuttau kirjastu muamale. Ostin hänele kniigan. Minun muamo ruadau keittäjänny. Brihačču on jo kazvanuh tävvekse miehekse.
infinitiivoi: Se ristikanzu eläy pajattajen. Minä lähten sobii huuhtomah.

Adverbiali merkiččöy:

tevon paikkua: Harakat hačatetah mečikös. Lehmii paimendetah niityn tagan. Rengi sordui kaivoh. Järvelpäi kuuluttih lapsien iänet. Hallot virutah lattiel.
tevon aigua: Ildupäiväl rodih vihmu. Huondekseh suate myö olimmo kois. Tämä hommu meile rodih hätkekse. Minä ainos havačun seiččemen aigua. Se tapahtui ammui.
tevon tabua, keinuo: Sen matkan myö tulimmo kävellen. Joves poikki hyö piästih lautal. Järven ylitimmö soudajen. Myö emmo malta pajattua ruočikse. Paiskua hil'l'azeh.
miäriä: Garbaluo suol oli sagenah. Meile tänävuon rodih ylen äijy kartohkua. Jauhuo hyö ostetah kaksin huavoin kerralleh. Sit talois eluo täydyy kylläl.
syydy: Kaži petties lauččua ähkäi. Vihman täh emmo lähtenyh meččäh. Kadehuttu häi nenga ruadoi. Laškuttu ei opastunnuh kunnolleh.
tarkoitustu: Talven varakse se on hommattu. Kai einehet on ostettu syödäväkse.
Erikseh pidäy sanuo:
- datiivuadverbialis, kudai merkiččöy sidä, kenele on ohjattu tego. Datiivuadverbialin sija on allatiivu: Kirjuttua kirjaine vellele. Lapset autetah vahnembile. Andua maiduo kažile. Ostua se ičele.
- predikatiivuadverbialis, kudai ilmoittau subjektan libo objektan tilua. Predikatiivuadverbialin sijat ollah essiivu da translatiivu: Minun sizär ruadau školas matematiekan opastajannu. Heidy vallittih deputuatoikse.