Ruadohebo, ei begun

enzimäzet 150 000 km

Martti Penttonen

Avtobusoin reittiverko da aigulistat harvetah, ku rahvas kylis vähenöy da rubieu ajamah mašinal. Ruadomatkat linnas voi jallaigi hakata libo polgupyöräl ajua, a loitombi lähtijes pidäy kustahto ajonevvo löydiä. Duumaičin, kaksipyörähizen ajonevvon osto on puoldu pienembi riähky kui nellipyörähizen. Sentäh ostingi ičele motorpyörän pitkän matkan ajonevvokse.

Royal Enfield Bullet motorpyörän valmistus algavui Anglies vuvvennu 1949 da sidä viegi valmistetah läs yhtenjyttyzenny, hos zavodu vuvvennu 1970 siirrettihgi Indieh. Minun pyöry valmistui 2002, konza germuaniilaine Motorradtechnik Sommer azendi sih Hatz 1B40 diezelmotoran. Viijes vuvves olen sil ajannuh sadatuhattu kilometrii, suuren vuitin täs matkas Karjalan dorogil.

Karjalan havvakkahil dorogil ajajes siidy ongi hyödyy, gu Enfieldin rattahat ollah suuret, 19-duimahizet. Edu on myös se, ku 21-litrahizen tankanke voi ajua tuhatgi kilometrii ilmai neftin liziändiä. Madalan tehnolougien da yksinkerdazen rakendehen periä murennuttu pyöriä voi hyväl lykyl dorogan piälgi kohendua, hos pal'l'azel.

Minun pyörän eričys on diezelmotor. Hatzin 1B40 motorua enimyölleh käytetäh sähkögeneruatorilois, ruohikonleikkaimis da kaikenjyttymis ruadokonehis. Yksikai se hyvin syndyy Enfieldin rungah da se täyttäy Euro-2 pagoguazunorman kui silloi pidi. Madalan viritystazon periä 0.462 litrahizes motoras tehuo on vähä, ga se on kestäi - kaiken viijen vuvven aigan motoras ei ole olluh nimittumua probliemua, se vai burbettau da siirrättäy ajajua. Tehuo on 8 kW 3600 kierroksel minuutas da viändömomentua 26 Nm 2000 kierroksel. Se merkiččöy, ku vauhti on enimyölläh 100 km/h, gu ei tuulle vastah, a suurindu 4-vaihtettu voi käyttiä 25 km/h ravevuos algajen. Kogo aigan, kezät da talvet, kulutus on olluh keskimiärin 2.4 l sual kilometral, a Karjalan havvakkahil dorogil hillembi ajajes mašin ei syö enämbi kahtu litrua. Konzu hantit da mansit loppiettanneh neftin myöndän, sit pidäy ruveta biodiezelua käyttämäh - yhten gektuaran rapsupeldo andau kolmenkymmenen tuhanden kilometran kyvvin da jättäy dorogale žuaritun pyhävoin duuhan muga kui kaššalis olis keitinpiiruadu.

Enfieldin tehniekku on vahnanaigahine. Alguperäzien hehkulampoin sijah olen vaihtannuh halogenlampan piävalgoh da ledlampat viglu-, tormozu- da tagatulih. Net ollah kestäjät da sähkyö jiä enämbi sähkökindahien da suojushatun vizoran lämmittämizeh. Enziövedoh olen čiepin sijah andannuh vaihtua hammashiihnan da märrän tseplenin sijah kuivan tseplenin. Muga vedosistiemah ei pie voidu da sentäh sidä huolduagi ei tarviče.

Minun mototsiklu on harvinaine - kaikkiedah Sommer on luadinnuh nengomii pyörii nenga kaksisadua da tiettäväine net ollah läs kai jiädy Germuanieh. Konza azetun koufile benzinazemal - pyörähäi harvah juomistu tarviččou - puaksuh jovvun kaččojile sellittämäh pyörän histourien da tehniekan. Da sit uvvessah dorogan piäle. Pyöriä ei voi begunakse leyhkiä, a ruadohevon jyttyöh se raugumattah hil'l'akkazin siirrättäy matkustajua tuhannengi kilometrua päiväs.

Kulutus

vuozikmneftikulutus
02303079.6 2.63
0320519503.75 2.46
0418813461.63 2.45
0518767458.14 2.44
0619111470.49 2.46
0719759484.08 2.45
0817662433.5 2.45
0917074411.53 2.41
1015835398.88 2.52