Ei ole mamua

Martti Penttonen (Oma Mua 2009/36)

Mamua muah pannes piäs pyörittih kyzymykset, midä merkiččöy muamo lapsele da lapsi muamale. En ole niidy, kuduat kannetah muamale roužutuhjuo muamanpäivänny, libo kui Ven'al, naizien päivänny. Minule net päivät ollah, kui sanou eräs suomelaine terävykieline kul'tuurupersounu, "šovinizman sovituspäivy". Kymmenen käskyn "pie hyvänny tuattua da muamua..." sežo minun korvah kuuluu muga kui patriarhallizennu käskemizenny. Segi minus tunduu tolkuttomal, ku mama da tytär sanotah ku hyö ollah toine toizele parahat ystävät - ystävät vaihtutah, muamo-lapsi sive on kestävy. Groteskal tunduu bisnessumalligi, kudamua yhteiskundu nygöi tariččou joga kohtah: lapsi on aziekas kudamale muamo tariččou vahnembanpalveluu. Kuibo sit, mi se on, muaman da lapsen väline sive? Voigo sidä sellittiä ilmai bokas myödäviä ideolougiedu?

Minun mieles se on kai täs: muamo on lapsele muamo, lapsi on muamale lapsi, on da pyzyy. Tämä liitto roih maksamattah, etgo voi sidä murendua. Hos opitgi kieldiä, olemattomakse sidä et sua. Muamale lapsi on ainos oma lapsi dai lapsi voi luottua, ku muamo pyzyy muamannu. Vahnembale äijän maksau lapsen kazvattamine, ga midäbo et rua lapsen hyväkse. Se on luonnon zakon: ližene da kazvata uuzi sugupolvi. Ristikanzan lapsi ei voi kazvua muamattah. Ga lapsi kazvau aiguzekse. Kondiiemägi vuvven opastau poigua da sit eroittau hänet kazvamah tävveksi kondiekse. Yhtelläh eravuspoigu emäle on oma poigu. Hos häi poijan iäreh ajaugi mollembien hyövykse, ga emä ei omua poigua syö.

Muamua hullai viizitostu vuottu tagaperin da jälgivuozinnu dementii rubei vähäzel sevoittamah tovellizuontajuu. Kačoin händy yhten yön nedälis - vahnembi velli kačoi muun aijan. Puaksuh yöl muamo nouzetteli kravatispäi. Menen kyzymäh:
- "Mibo hädä?"
- "Lähtemmö kodih."
- "A koishäi olemmo kaiken aigua, täs elämmö jo kuuzikymmen vuottu."
- "Ga Hovinahoh, Karjalah."
- "Emmo voi lähtie Hovinahoh, sie jo ei ole nimidä, ei ni yhty kodii, kai on riičitty."
- "Ga mammalluo."
- "Sinul eihäi jo ole mammua, mamma sinun kuoli jo nellikymmen vuottu tagaperin."
Sit on vaikkani, buite ei voi uskuo.
- "On yö, nygöi nikunne emmo voi lähtie, anna sinut hyvin katan, huondeksel sit kačommo."
Rubieu maguamah.

Muamo eli 94-vuodehizekse. Tuatanke kazvatti kuuzi lastu. Elaigu oli jygei, ga ei ilotoi.