Tehnolougien vieljärveläzet edujoukot Elokuun algupuolel Vieljärvel piimmö kursan "Robotiekkua 10-100 vuodehizile", kudaman opastajannu toimi tämän kirjuttai. Onnuako viesti ei tavoittanuh sadavuodizii buaboloi, gu kursale tuldih vaiku puolikymmendy brihaččuu: Johor 12v, Miitrei 12v, Timofei 10v da Van'a 13v- allus oli vie Matvei, a händy kučuttih buabalpäi kodih Segežah kesken kursua. Tulieloile kursoile toinah jo tytötgi tullah. Lugumiärän puoles opastujien joukko oli sobivan suuruine. Kursan "ruadovehkehenny" oli Sphero -nimine robottu. Se on nenga apelsiinan suurus miäččy, kudamua vois arvata bobakse. Voihäi sidä bovannugi pidiä, a sen sydämes on tiedokoneh, kaksi ajelendah pättäviä motorua, giroskoppu da ähkähtyssensoru. Voibi sidä ajuagi kui loittonohjattavua bobamašinua libo lennäkkii, a moizes kižuandas ei tarvita Spheron neroloi. Sen olemasolendan perusteh on se, ku sidä voi ohjelmoija kui midätahto "oigiedu" robottua, da senke voi opastuo ohjelmoimah tiedokonehtu. Tiettäväine, voi kyzyö, ongo tolkuu moizes bovas, kudai maksau enämbi sadua euruo, eigo sidä voi käyttiä toven ruadoh. Toinah sen piäle vois panna pitkän jupkan da sit se hos pyyhkis pölylöi lattiel. Ga Spheron hyödy on muijal. Ohjelmoidavu tiedokoneh on lahjomatoi, ga yhtelaigua motivoiččii opastai. Tiedokoneh ei rubie ruadamah muanittamal libo bleznuiččemal. Sille pidäy tarkah sanella, kui probliemu reššitäh. Piädielo ei ole se, kui kirjuttua ohjelmua tiedokonehele miltahto ohjelmoindukielel. Piädielo on ellendiä probliemu da maltua se hyvin reššie, da sit kirjuttua se ohjelmakse. Ezmäi kehittiä algoritmu da sit ohjelmu. Koneh palkiččou ruadamal sen, midä sil kyzyttih. Robotanke oigien toimindan nägöy omil silmil konkriettizesti. Kursulazet opastuttih ezmäi ajelemah robotal. Toizel urokal hyö nähtih kui ajelendan voi todevuttua ei käzil ohjaten a ohjavokomendoloil. Kolmandel urokal ozutettih kui ohjelmoindukielel voi kirjuttua ohjelman, kudaman mugah robottu ruadau kyzytyn tehtävän. Tiettäväine, lyhyöl kursal ei kergie parembi harjavumah ohjelmoindah. Piirdelimmö geometrizii kuvii: nellikkölöi, kruugoi da spirualoi. Jännittäi oli kiža, kudamas robottu arboi, ken pakkuu kruugaspäi. Lysti oli sežo panna robottu kävelemäh lattiel piävyndähillizesti humalniekan jyttyöh, da kui se sit čuppuh puututtuu piäzöy siepäi myöstymäh. Voibi sanuo, ku enzimäzel urokal duuhu otti vallan ravvas - kolmandel urokal jo duuhu pandih raudah. Midäbo opastujat iče duumaittih? Timoile da Van'ale, nuorimbale da vahnimale, parahite mieleh jäi ohjelmoindu. Miitrei da Johor enämbi suvaittih robotal ajelendua. Kursu oli lyhyt, sendäh kyzyttih, voisgo sidä jatkua konzutah. Toinah pidäy ezmäi löydiä uuzii "peruskursan" kävijöi da sit pidiä "jatkokursu".