On hyväksytty Allunpanendukerähmöl
Protokolu № 1 17. kylmykuudu 2012
Alovehellizen Karjalan kielen kodi -yhtistyksen ustuavu
Vieljärvi
2012
-
Yleizet kohtat
-
Alovehelline yhtistys ”Karjalan kielen kodi”, ielleh sanommo sidä
Yhtistyksekse, on sen ozanottajien omatahtoine ičehaldivoiččii
ei-kaupalline yhteiskunnalline yhtistys. Se on perustettu niilöin
rahvahien kehitykses, kudamil on samat interiesat da kudamat ruvetah
ruadamah sidä ruaduo, kudai on sanottu täs Ustuavas. Yhtistys on
perustettu da ruadau Ven'an Federatsien Konstitutsien,
Kanzanoigevuksien, Federualuzakonan “Yhteiskunnallizih yhtistyksih
nähte” da meijän muan toizien zakonoin da tämän Ustuavan mugah.
-
Yhtistys on juridine persounu Ven'an Federatsies olijoin zakonoin
mugah yhtistyksen registratsiipäiväs algajen. Sil on oma omažus,
kudamas häi vastuau iče omien vellalližuksien mugah, se voi omas nimes
ostua omažuttu da käyttiä hyväkse omistandanoigevuksii da omii
ei-omistajan oigevuksii, täyttiä omii vellalližuksii, olla
viärittäjänny da viäritettävänny arbitruažu- da välisuvvos.
Yhtistyksel on oma balansu, pečati, blankat, emblemu, makso- da tostu
tilii bankas. Yhtistyksen simvouliekku on valdivon registriiruittavu
da luguhotettavu, kui sidä ruatah zakonan mugah.
-
Yhtistyksel on omažus, kudai kuuluu sille kui oma, libo yhtistys
vuogruau da omistau sidä toizien zakonoin perustehel, se ižändöiččöy
da käyttäy sidä olijoin zakonoin mugah oman Yhtistyksen tarkoituksih
niškoi.
-
Yhtistyksel on oigevus ižändöijä omih varoih ostettuu, heile rahvahil,
juridizil persounoil da valdivol annettuu. Yhtistyksen ozanottajil ei
ole oigevuttu Yhtistyksele annettuh omažuoh da hyö ei vastata
Yhtistyksen vellalližuksis, ihan kui Yhtistys ei vastua omien
ozanottajien vellalližuksis.
-
Azienhoido yhtistyksel voi olla kahtel kielel: ven'akse da karjalakse.
-
Yhtistyksen tyves alalleh toimii Halličus on Karjalan tazavallan
Priäžän piiris, Vieljärven kyläs.
-
Yhtistyksen kogonaine nimi ven'an kielel on Региональная общественная
организация «Дом карельского языка».
-
Yhtistyksen lyhendetty nimi ven'an kielel on: РОО «ДКЯ».
-
Yhtistyksen kogonaine nimi karjalan kielel on Alovehelline
yhtistys ”Karjalan kielen kodi”.
-
Yhtistyksen lyhendetty nimi karjalan kielel on: AY “KKK”.
-
Yhtistyksen tarkoitukset da ruavot
-
Yhtistyksen tarkoituksennu on:
-
karjalan kielen da karjalazen kul'tuuran säilyttämine, kehittämine da propagandu da rahvahan eloksen luavun parandamine Vieljärven kyläs;
-
“Karjalan kielen koin” perustamine Vieljärveh, sit kois rubieu ruadamah yhtistys.
-
Yhtistyksen ruavot:
-
ližäopastuksen kehittämine karjalan kielel;
-
tervehellizen eloksentavan kehittämine karjalan kielel;
-
joudoaijan kehittämine karjalan kielel;
-
paikallizen biznesan kannatandu;
-
kylän kunnostamine;
-
sotsiualuavun da sotsiualupalveluksien andamine kylän rahvahile.
-
Yhtistyksen oigevuot
Yhtistys voi:
-
välläh levittiä tiedoloi omas ruavos;
-
andua palveluksii opastuksen, sotsiualupuolistuksen da tervehyönhoijon
alal, sih kuulutah maksollizet palveluksetgi;
-
ruadua muzein ruaduo;
-
yhtyö kylän kunnostamizeh, sih kuuluu myös mustopaččahien akkiloičendu;
-
tutkie kodirandualovehtu;
-
ruadua kauppuruaduo;
-
ruadua ulgotalovuollistu ruaduo;
-
perustua joukkoviestimii da ruadua ilmahpiästäjän ruaduo;
-
akkiloija arhitektuuran da kul'tuuran mustomerkilöi;
-
luadie da pidiä festivualiloi, konferensieloi, jarmankoi, ozutteluloi,
ozutteluloi-myöndii, arbajazii, hyvyönluadijoi konsertoi,
hol'otandukauppoi;
-
yhtyö valdivovallan da paikallizien ičehaldivoloin elimien piätöksien
sellitändäh sen mugah, kui on kirjutettu olijois zakonois;
-
pidiä kerähmölöi, miitingoi, demonstratsieloi, kulguloi da pikiettöi;
-
ozuttua da puolistua omii, yhtistykseh kuulujien, myös toizien
rahvahien oigevuksii da interiessoi valdivovallan elimis, paikallizis
ičehaldivolois da yhteiskunnallizis yhtistyksis;
-
täyttiä tävvelleh täyzivaldažuksii, kudamat ollah yhteiskunnallizil
yhtistyksil zakonan mugah;
-
kehittiä omii mielii eri yhteiskundueloksen kyzymyksis, kehittiä
niilöi valdivovallan elimile;
-
harjoittua da kehittiä kanzoinvälisty ruaduo;
-
yhtyö Karjalan tazavallas piettävih paikallizien ičehaldivoloin
valličendoih da referendumoih, kui on sanottu Ven'an Federatsien
zakonois;
-
perustua toizii ei-kaupallizii yhtistyksii;
-
yhtyö toizih yhtistyksih kui nämmien yhtistyksien ozanottai, yhtyö
toizien yhtistyksien ruadoh da toizien ei-kaupallizien yhtistyksienke
yhtes perustua liittoloi da assotsiatsieloi;
-
perustua omii ozastoloi (yhtistyksii, alaozastoloi libo
ezitystölöi da filialoi) Ven'an Federatsien toizis subjektois da
ulgomualois;
-
yhtyö kanzoinvälizih, valdivollizih, linnan- da kylänhaldivoloin,
yksittäzih, sotsiualu- da gumanituaruprogrammoih da projektoih,
kudamat on Yhtistyksen ustuavan täyttämizekse;
-
omistua muadu;
-
Yhtistyksel on toizet oigevuksetgi, kudamat on sanottu Ven'an
Federatsien olijois zakonois, oman Ustuavan tarkoituksien
täyttämizekse.
-
Yhtistyksen vellalližuot
Yhtistys on vellalline:
-
noudua Ven'an Federatsien zakonoi, kanzoinvälizen oigevuon
periuattehii da normii, kudamat koskietah Yhtistyksen ruaduo, noudua
tämän Ustuavan normii.
-
joga vuottu painua otčotat iččeh omažuon käytändäs libo andua mahto
kaččuo sidä otčottua.
-
joga vuottu ilmoittua sille laitoksele, kus on registriiruittu
Yhtistys, oman ruavon jatkandas da sanuo, kus rubieu ruadamah
Yhtistyksen alalleh toimii halličus, sanuo sen nimi da johtajat sen
mugah, kui pidäy olla Yhtehizes juriidizien persounoin valdivollizes
luvettelos.
-
ozuttua Yhteiskunnallizii yhtistyksii registriiruiččijan laitoksen
käskys Yhtistyksen halličuksen da sen johtajien piätökset, myös
vuozinelländeksen da vuvven otčotat omas ruavos sen mugah, kui sidä
käskietäh verolaitokset.
-
laskie Yhteiskunnallizii yhtistyksii registriiruiččijan laitoksen
edustajii oman Yhtistyksen pidoloih.
-
auttua Yhteiskunnallizii yhtistyksii registriiruiččijan laitoksen
edustajii, konzu hyö tahtotah kaččuo Yhtistyksen ruaduo sen Ustuavan
tarkoituksien täyttämizekse da Ven'an Federatsien zakonoin noudamistu.
-
ilmoittua sille laitoksele, kus on registriiruittu Yhtistys, moizien
tiedoloin muutandas, kudamat on sanottu Federualizen zakonan viijenden
stat't'an enzimäzes kohtas ”Juriidizien persounoin da yksittäzien
biznesmiehien valdivollizes registratsies”, tämä ei koske suaduloi
litsenzieloi, luadie tämä pidäy kolmen päivän aigah, kui nämä
muutokset on roittu.
-
Yhtistyksen perustajat da ozanottajat, heijän oigevuot da vellalližuot
-
Yhtistyksen perustajinnu ollah Ven'an Federatsien 14 vuottu täyttänyöt
kanzalazet, kudamat on kerätty allunpanendukerähmön, kus oli piätetty
perustua Yhtistys, hyväksytty Ustuavu, luajittu Yhtistyksen halličus
da Tarkastuselin. Sit päiväs, konzu kai tämä oli piätetty, Yhtistys
ongi perustettu, sen perustajat kerras roitah sen ozanottajikse da
heile on oigevuot da vellalližuot tämän Ustuavan mugah.
-
Joga yhtistyksen ozanottajal on samat oigevuot da vellalližuot.
Yhtistyksen ozanottajakse voi tulla Ven'an Federatsien 14 vuottu
täyttänyh kanzalaine, ulgomualazet, Ven'al zakonan mugah eläjät sen
kanzalližuottah olijat rahvas, juriidizesti perustetut
yhteiskunnallizet yhtistykset, kudamat ollah valmehet hyväksymäh
Yhtistyksen ustuavan da ruadamah sen tarkoituksien täyttämizekse.
-
Yhtistykseh liitytäh omal tahtol.
-
Ken tahtou tulla Yhtistyksen ozanottajakse, kirjuttau zajavleenien,
yhteiskunnallizet liitot (juriidizet persounat) otetah Yhtistykseh
niilöin halličuksien piätändäs.
-
Ottua libo ei Yhtistykseh piättäy Yhtistyksen halličus, enimistöl
pidäy kannattua se, sit sidä kačotah Yhtehizel yhtistyksen kerähmöl.
-
Yhtistyksen ozanottajil on oigevus:
-
vallita da olla vallittavannu kaikkih Yhtistyksen elimih;
-
yhtyö Yhtistyksen ruadoloih;
-
käyttiä Yhtistyksen laittehii da brujii kui se on sanottu Yhtistyksen
siändölöis;
-
suaja kaikenualastu mahtonalastu Yhtistyksen kannatustu da abuu;
-
ku tahtonou, ga iäre lähtie yhtistykses, sih niškoi pidäy kirjuttua
vai zajavleenii Yhtistyksen halličuksele iäre lähtendäs;
-
välläh sanuo da puolistua omii mielii, kritikuija Yhtistyksen ruaduo;
-
ezittiä omii programmoi, projektoi, tutkimuksii, kirjutuksii, ku suaja
Yhtistyksen kannatustu.
-
Yhtistyksen ozanottajal pidäy:
-
noudua Yhtistyksen ustuavua;
-
maksua ozanottajan maksot:
-
aktiivizesti yhtyö Yhtistyksen ruadoh;
-
täyttiä Yhtistyksen elimien piätöksii, kudamat oldih niilöin vallas piättiä.
-
Yhtistyksen ozanottai Ustuavan rikondas Yhtistyksen halličuksen käskys opitah kurittua. Ku se ei auta, ga ruvetah duumaimah sih nähte, ku ajua iäre se ristikanzu yhtistyksespäi. Händy ajetah iäre, konzu sit iänesti Yhtistyksen halličuksen 2/3 rahvastu.
-
Yhtistyksen elimien struktuuru
-
Yhtistyksen ozanottajien yhtehine kerähmö
-
Yhtistyksen piälimäzenny hallindoelimenny on Yhtistyksen ozanottajien
yhtehine kerähmö (ielleh sanommo sidä Yhtehine kerähmö). Yhtehine
kerähmö on täyzivaldaine piättämäh, konzu sil on enämbi puoldu
Yhtistyksen rahvastu. Yhtehine kerähmö pietäh kerran vuvves, ei
vähembi. Viesti kerähmön piendypäiväs, -kohtas, -aijas da kačeltavis
kyzymyksis pidäy työndiä Yhtistyksen johtajal joga yhtistyksen
ozanottajale kirjazennu, sähköpoštan kauti libo sms:viestinny ei
vähembi migu kuu enne Yhtehizen kerähmön piendiä. Yhtehizel kerähmöl
on oigevus sellittiä hos kudai kyzymys Yhtistyksen ruavos.
-
Yhtehizen kerähmön erillizet ruadomahtot. Se:
-
hyväksyy Ustuavan, muutokset da tävvendykset, sit registriiruiččou
net, kui sidä käsköy zakonu;
-
miäriäy Yhtistyksen ruadoalat, sen omažuon käytändän;
-
valliččou nelläkse vuottu Yhtistyksen halličuksen Yhtistyksen ozanottajis;
-
valliččou nelläkse vuottu Yhtistyksen johtajan Yhtistyksen ozanottajis;
-
valliččou nelläkse vuottu Yhtistyksen tarkastajan Yhtistyksen ozanottajis;
-
ottau vastah da hyväksyy Yhtistyksen halličuksen da Tarkastajan otčotat;
-
sellittäy da hyväksyy Yhtistyksen tuliet ruavot;
-
piättäy Yhtistyksen muutandas da hävitändäs, keriäy hävitändykomissien;
Mainittuloin kyzymyksien sellitändy kuuluu vaiku Yhtehizele kerähmöle
da niilöi ei voi sellittiä nikudai toine Yhtistyksen elin.
-
Yhtehizen kerähmön piätökset on hyväksytty silloi, konzu niilöis
iänestettih enimät Yhtehizel kerähmöl olijat. 1., 2., 3., 4., 8.
kohtien kyzymykset on hyväksytty, konzu niilöis iänesti 2/3
Yhtehizel kerähmöl olijois.
-
Yhtehizen kerähmön ylimiäräzet kerähmöt keriäy Yhtistyksen johtai
Yhtistyksen halličuksen, Tarkastajan kehitykses libo sen ozanottajien
(heidy pidäy olla enämbi ku puoli) zajavleenies.
-
Yhtistyksen halličus
-
Yhtehizen kerähmön istundoloin välis Yhtistyksen alalleh toimijannu
haldivoiččijannu on Yhtistyksen Halličus, kudamua johtau Yhtistyksen
piälikkö. Yhtistyksen halličus vallitah Yhtehizel kerähmöl nelläkse
vuottu. Äijängo hengie rubieu kuulumah sih sežo piätetäh Yhtehizel
kerähmöl.
-
Yhtistyksen halličus:
-
kehittäy omii programmoi da projektoi, kudamat koskietah Yhtistyksen
ruaduo;
-
ilmoittau Yhtehizele kerähmöle piettävis Yhtistyksen ustuvan muutoksis
da tävvendyksis da sih niškoi sanou konkrettizii kehityksii;
-
edukädeh kaččou nennii kyzymyksii, kudamii ruvetah sellittämäh
Yhtehizel kerähmöl;
-
hyväksyy Yhtistyksen budžietan vuvvekse;
-
miäriäy Yhtistyksen ozanottajien maksoloin miäry da niilöin maksanduaigu;
-
andau luvan pidiä kauppoi, kudamii ei ole vuvven menolistas;
-
tarkastau Yhtistyksen elimien ruaduo;
-
hyväksyy Yhtistyksen vuvven otčotan da balansan;
-
hyväksyy Yhtistyksen finansupluanan da luadiu kohenduksii sih;
-
piättäy toizih yhtistyksih yhtyndäs;
-
piättäy Yhtistyksen talovusyhtistyksien perustandas;
-
ottau Yhtistyksen ozanottajikse da työndäy iäre sit;
-
täyttäy Yhtistyksen nimes juriidizen persounan oigevuksii da täyttäy
sen vellalližuksii sen Ustuavan mugah;
-
joga vuottu ilmoittau sille laitoksele, kus on registriiruittu
Yhtistys, oman ruavon jatkandas da sanou, kus rubieu ruadamah
Yhtistyksen alalleh toimii halličus, sanou sen nimen da johtajat sen
mugah, kui pidäy olla Yhtehizes juridizien persounoin valdivollizes
luvettelos.
-
kaččou, ku Yhtehizen kerähmön piätökset oldas täytetty;
-
sellittäy toizii kyzymyksii, kudamat ei kuuluta Yhtehizen kerähmön ruadoalah;
-
Yhtistyksen piälikkö keriäy Yhtistyksen halličuksen istundon konzu se
pidäy, ga vai ei vähembi migu kerran puoles vuvves.
-
Yhtistyksen halličus on täyzivaldaine piättämäh, konzu sil on enämbi
migu puolet Halličuksen rahvahis. Yhtistyksen halličuksen piätökset on
hyväksytty silloi, konzu niilöis iänestettih enimät, tämä ei koske
niilöi kyzymyksii, kudamis on erikseh sanottu täs Ustuavas.
-
Yhtistyksen piälikkö
-
Yhtistyksen piälikkö on Yhtistyksen korgevin virgu.
Yhtistyksen piälikkö vallitah Yhtistyksen yhtehizel kerähmöl nelläkse vuottu.
-
Yhtistyksen piälikkö:
-
johtau Yhtistyksen ruaduo;
-
keriäy rahvastu Yhtehizele kerähmöle da Halličuksen istundoloile, on
niilöis paginanvedäjänny:
-
vastuau Halličuksen ies finansuruavos da Yhtistyksen toizes ruavos;
-
vastuau Yhtistyksen aparuatale kuulujis ruadolois, sanou kelle midä
ozanottajis pidäy ruadua da miäriäy niilöin täyzivaldažukset
Yhtistyksen tarkoituksien täytändäs;
-
johtau jogapäivästy Yhtistyksen aparuatan ruaduo Yhtistyksen
piätöksien, programmoin da projektoin täyttämizekse;
-
edustau Yhtistysty Ven'an da ulgomuan juriidizien da fizičeskoin
persounoin keskes, allekirjuttau sobimuksii da toizii kauppoi Ven'al
da ulgomual Yhtistyksen nimes (Yhtistyksen halličuksenke
sellitettyy), jagau luottamuskirjazii.
-
valmistau tarvittavii dokumentoi da materjualoi Yhtistyksen
halličuksele kačottavakse;
-
ilmai luottamuskirjastu ruadau Yhtistyksen nimes;
-
käyttäy Yhtistyksen varoi sen mugah, kui on piättänyh Yhtistyksen
halličus;
-
järjestäy buhgalterskoidu da veromaksandan ruaduo da sit otčotan
pidämisty, kui se on miärätty;
-
julguau Yhtistyksen käskylöi, nevvoloi da toizii dokumentoi, kudamat
reglamentiirujah Yhtistyksen ruaduo;
-
hyväksyy Yhtistyksen ruadajat, sellittäy ruadajii koskijoi kyzymyksii;
-
avuau bankois makso- da toizii tililöi;
-
sellittäy toizii kyzymyksii, kudamat ei kuuluta tämän Ustuavan mugah
Yhehizele kerähmöle da Yhtistyksen halličuksele.
-
Konzu Yhtistyksen piälikkyö ei ole, hänen ruadoloi ruadau eräs
Yhtistyksen halličukseh kuulujis Halličuksen piätöksen mugah.
-
Yhtistyksen tarkastai
-
Yhtistykses tarkastusruaduo ruadau Tarkastai, kudai vallitah Yhtehizel
kerähmöl nelläkse vuottu Yhtistyksen finansu- da talovusruadoloin
tarkastukseh niškoi.
-
Tarkastajakse ei sua vallita Yhtistyksen halličukseh kuulujua.
-
Yhtistyksen Tarkastai tarkastau Yhtistyksen finansu- da talovusruaduo
ei vähembi migu kerran vuvves. Tarkastuksen tulokset häi ezittäy
Yhtehizele kerähmöle hyväksyttäväkse. Ylimiäräzet tarkastukset pietäh
silloi, konzu sidä prižmitäh ei vähembi migu 1/3 kaikis Yhtistyksen
ozanottajis. Tarkastuksien tulokset Tarkastai ezittäy Yhtistyksen
halličuksele da Yhtehizele kerähmöle.
-
Yhtistyksen omažus da varat
-
Yhtistys, kudai on juriidine persounu, on sille kuulujan omažuon ižändöiččii.
Yhtistyksen ozanottajil ei ole oigevuttu ižändöijä Yhtistyksele
kuulujua omažuttu.
-
Yhtistyksel on oigevus ižändöijä muadu, kodiloi, huonuksii,
eländypaikkoi, ajonevvoloi, laittehistuo, brujii, kul'tuurah,
opastukseh da tervehyönhoidoh kuulujua omažuttu, varoi, aktsieloi,
toizii arvobumuagoi, tostu omažuttu, kudai pidäy Yhtistyksen ustuavan
tarkoituksien täyttämizekse. Yhtistyksen omažuoh voi kuuluo laitokset,
julguamot, joukkoviestimet, kudamii perustetah libo ostetah omih
varoih Ustuavan tarkoituksien da olijoin zakonoin mugah.
-
Yhtistyksen omažus da varat roitah:
-
piäzy- da ozanottajien maksolois;
-
omatahtozis maksolois da lahjoituksis;
-
dengois, kudamii ustuavan mugah suajah luvendolois, ozuttelulois,
hol'otandukaupois da toizis pidolois;
-
biznesruavon dengois;
-
krediitöis da velgahotandas;
-
valdivonavus;
-
ristikanzoin omatahtozes ruavos;
-
kanzallis-oigevuksellizis kaupois suadulois dengois;
-
ulgotalovuollizen ruavon tulolois;
-
toizis zakonan mugazis tulolois.
-
Yhtistyksen varoi käytetäh Yhtistyksen ustuavan tarkoituksien
täyttämizekse.
-
Yhtistys voi ruadua biznesruaduo, ku se on Ustuavan tarkoituksien
täyttämizekse, siksehäi Yhtistys on perustettu. Biznesruaduo Yhtistys
ruadau Ven'an Federatsien Kanzanoigevuksien da toizien zakonoin
mugah. Sit ruavos suaduloi dengoi ei sua jagua Yhtistykseh kuulujile,
niilöi pietäh vai Ustuavan tarkoituksien täyttämizekse.
-
Erähii ruadoloi, kudamat on miärätty federualizil zakonoil, Yhtistys
voi ruadua silloi, konzu suau litsenzien.
-
Yhtistys voi ruadua hyvyönluadijoi da biznesruadoloi rahvahan hyväkse.
-
Yhtistyksen otčotan pidämine
-
Yhtistys pidäy buhgalterskoidu da veromaksandan otčottua olijoin
zakonoin mugah.
-
Yhtistys da sih kuulujat ollah vastuonalazet niilöis tiedolois,
kudamii on vuvven otčotas.
-
Dokumentoi hoidau Yhtistyksen piälikkö.
-
Yhtistyksen ruadokohtas pidäy olla semmozet dokumentat:
-
Yhtistyksen ustuavu;
-
Yhtehizen kerähmön piätökset, kudamis on sanottu Yhtistyksen
perustandas, da toizet Yhtistyksen dokumentat Yhtistyksen ruavos;
-
dokumentat Yhtistyksen valdivollizes registratsies;
-
dokumentat Yhtistyksen omažuos;
-
toizet dokumentat, kudamat pidäy olla olijoin zakonoin, Yhtistyksen
ustuavan mugah, Yhtehizen kerähmön da Halličuksen piätöksien mugah.
-
Kai iel mainitut dokumentat pidäy olla suadavis joga aigua da kaikile,
ket tahtotah niilöi kaččuo.
-
Ustuavan muutoksien da tävvendyksien luajindu
-
Muutokset da tävvendykset Ustuavah hyväksytäh Yhtistyksen Yhtehizel
kerähmöl, niilöis pidäy iänestiä ei vähembi migu ¾ Yhtehizel kerähmöl
olijoil da niilöi pidäy registriiruija, kui sidä käsköy zakonu.
-
Ustuavan muutoksil da tävvendyksil on juriidine valdu, konzu net
registriiruiččou valdivo.
-
Yhtistyksen hävittämine da muuttamine
-
Yhtistyksen muuttamizes (sen liittämizes, yhtistämizes, jagamizes,
uvvistamizes) piätetäh Yhtehizel kerähmöl, sit pidäy iänestiä ei
vähembi migu ¾ kerähmöl olijoil, luajitah sidä kui käsköy zakonu.
Yhtistyksen muutandan jälles Yhtistyksele kuulujat oigevuot da
vellalližuot ruvetah kuulumah sen jatkajale (jatkajile).
-
Yhtistyksen hävittämizes piätetäh Yhtistyksen Yhtehizel kerähmöl, sit
pidäy iänestiä ei vähembi migu ¾ kerähmöl olijoil, kui sidä käsköy
zakonu libo se piätetäh suvvos zakonan mugah.
-
Se elin, kudai piätti Yhtistyksen hävitändäs (Yhtehine kerähmö libo
suudo), perustau hävitändykomissien. Hävitändykomissiel, konzu se on
miärätty, on täyzivaldažus vediä ielleh Yhtistyksen ruaduo.
-
Yhtistyksen omažus da varat, silloi konzu on täytetty kreditouroin
vuadimukset, pannah Yhtistyksen ustuavan tarkoituksien täyttämizekse.
Midä ruadua jiännyön omažuonke, sih nähte ilmoittau
hävitändykomissii joukkoviestimis.
-
Hävitettyy Yhtistyksen dokumentat, kudamat koskietah sen ozanottajii,
työtäh valdivole ruokkoh, kui sidä käsköy zakonu.
-
Kai tiijot da dokumentat, kudamii pidäy olla Yhtistyksen hävitändäs,
annetah elimeh, kus oli piätetty Yhtistyksen registratsies Yhtistysty
perustajes.
-
Yhtistys on hävitetty da juriidizennu persounannu toimindan
loppenuonnu silloi, konzu sit kirjutetah juriidizien persounoin
luvetteloh.