Kirjutuskilbu "Minun oma kieli"

[mp]

"Karjalan kieliopit" projektan kirjutuskilbu "Minun oma kieli" on avattu, ilmoitus verkosivul http://karjalankieliopit.net/toimindu/index.html Kirjutusaigua on oraskuun loppuh.

[Sinilind]

Hyvä dielo moine kiža. Tulougo ilmoitus Omah Muah?

Vähäzel nouzi mieleh kyzymysty, kudamih vastavustu saital ei olluh: Ongo kiža avvoi kaikile, ket maltetah karjalua? Toizin sanojen, pidäygo paista karjalua roindua myöte, a suajahgo i ei-muga-putilleh-maltajat libo kieldy kursiloil libo yliopistolois opastunnuot ottua ozua?

[mp]

Tarkoitus on levittiä ilmoitustu vienas tverih da lyydis suvikarjalah, Omah Muah, Karjalan Heimoh, Karjal Žurnualah da verkoiče. Luven sidä ilmoitustu, ku net ket maltetah lugie ilmoitus da kirjuttua karjalakse voijah ottua ozua da nimenomah netgi ket ei malteta vienan da livvin kirjukielii.

[mp]

Projektan tavoitehhäi on luadie yleisnägemys karjalan kielen variatsielois. Uvvet kielet roitah konzuu endizen piäle kerdyy äijäl muutoksii, vuorovaikutustu vierahan kielenke, libo tehnolougistu mukinheitändiä. Karjal on olluh vägevästi toizien kielien vaikutuksen al da vuozikymmenien aijan se ei kehittynyh tehnolougizen muutoksen ker, vastevai ihan jälgivuozinnu. Ennevoinallizil karjalazil oli bohattu kieli ga nygöi eibo astaval ajeta, kaksituhatluvul karjalan kieldy opastunnuzien kieles on erilaine sanasto, "substruattu", oma murreh. Sendäh kielipaletas olis hyvä nägyö paiči paikallistu, aijallistugi variatsiedu.

[Sinilind]

Tehnolougistu mukinheitändiä Ollougohäi mukil da mukkelis makkeliksel midätahto yhtevytty. Mugahäi sanotah suomelazet, konzu lapsi öntästyy da kiändäy mukkii – meni mukkelis makkelis.

Duumaičingi, kilvan pidämizes ollou i moine kielentutkimukselline puoli. Kilbuhäi on hyvä, ku se tugou sežo kielen tutkimus- da nostanduruaduo, muga kui projektugi. Toivon, ku ristikanzat huomatah ilmoitus da tartutah piirdimeh libo fonogruafah, kui tverii muga i lyydii myöte. Innol da mielenkiinnol vuotan, mittuine kirju rodieu.

(Dogadin, Karjal Žurnualas nygöi on jullattu ilmoitus kilbah näh.)

[mp]

Kilbu on avvoi vie tämän nedälin. Nenga kymmenel kirjuttajal on tulluh tekstua, ga viegi syndys. Jälgiaijal on hyvin tulluh kirjutuksii lyydiläzilpäi.

[mp]

Kilbu on eistynyh tässah: Kirju

piäzöy ilmah, tarkembi http://karjalankieliopit.net Toimindusivuloil.

[Sinilind]

Ylen hyvä! Nygöi vai vuotammo, ku kirju eistys meijän lugijoin käbäzih. Hyvä hommu, ku tuli moine tukku kirjutuksii, da vie ihan tverii da ižorua myöte. Hyvin ruattu, kirjuttajat! Voizin omas puoles ei ihan pienet passibot työndiä vie kilvan järjestäjäle da redaktoralegi. Hyvä duumu moine kilbu.

Saital sanotah työttih viizitostu kirjuttajua kirjutustu nämmil da nämmil murdehil, ga ongo andua tarkembua statistiekkua eri murdehizien tekstoin jagavundah näh? I oligo livviläzis da vienalazis sežo paikallismurdehil kirjutettuloi tekstoi, vai oldihgo kai kirjukielizet?

[mp]

Seiččie oli livvikse, nelli lyydikse, kaksi tverikse, yksi vienakse da yhten kirjuttajan seiččie rivii ižorakse. Enimyölleh net opitah olla kirjukieldy, ga paikalližusgi nägyy.

[Sinilind]

Passibo tiijos! Tottu sanuo vuottanuzin enämbigi tekstoi vienalazilpäi, ku täydyyhäi Kalevalan kankahil maltajua kirjuttajua. Ga hyvä, ku lyydiläzet ollah nenga aktiivizet. Pagizijuahäi heil on äijy vähembi.