Nerokaššali

[Olói]

“Nerokaššali” kuččuu festivualih Kinnermäil. Vieton azetukset.

Jo kolmattu kerdua karjalankielizien teatroin Nerokaššali-festivuali pietäh heinykuus Kinnermän kyläs, Karjalan tazavallan Priäžän piiris. Ezmästy kerdua se oli heinykuul 2009. Pivos opitah luadie anuksenkarjalan murdehen (livvin) päivy.

Festivualin tavoiteh on karjalan kielen livvin murdehen säilyttämine da kehittämine karjalazis kylis, teatruallizien joukkoloin kannattamine. “Nerokaššalin” järjestäjät, Karjalan kul’tuuruperindön kannattamizen fondu, Nuori Karjala -yhtymy da Karjalan Kielen Kodi -järjestö, kučutah Karjalan da Suomen karjalan kielel livvin murdehel ezittyjii teatruallizii joukkoloi yhtymäh festivualih. Spektakliloin, m’uuzikloin, juumoruezityksien piduhus ei voi olla enämbi 30 minuuttua.

Pakičukseh pidäy kirjuttua teatrujoukon nimi da adressi, teatran johtajan da joukkoh kuulujien nimet, telefon, spektaklin nimi, piduhus da sen lyhyt ezitys. Pakičukset otetah vastah oraskuun 25. päivässäh.

Festivuali pietäh 6.heinykuudu (suovattupäivy) 11.00 – 20.00 čuasun aigah Kinnermäl.

Festivualin aigah pietäh teatruallizien neroloin master-kluassu.
Petroskoin kaččojii Kinnermäle lähtöy suuri autobussu Kanzallizien Kul’tuurukeskuksen taloilpäi 8.30 čuasun aigah. Sama autobussu tuou rahvastu sinäpiän ehtäl Petroskoih 23.00 čuasun aigah.
Festivualin vedäi Antonovan Natoi

[Olói]

NEROKAŠŠALI- juhlat suovattu 6. heinykuudu 2013 KINNERMY

11.00 – 13.30 – 18.00

Sana suuh ei sula- PÄIVÄN PROGRAMMU

Vedäjät: Natalja Antonova, Ondrei Gorškov (Nuori Karjala – organizatsii)

11.00 -13.30 pihapivot keskikyläl:

- Vieljärven inehmizien pajoloi allukse

- «Sammon tavondu»- ozutus Koirien Kalevala – spektaklispäi. «Čičiliušku» -tyttiteatru Petroskoilpäi

- Karjalan kielien kursiniekoin ozutelmu (Kotkadjärven čuppu)

- Oma pajo – hora Petroskoilpäi. Čomii pajoloi jatkokse

- Omua mua- karjalankielizen lehten ruadajien ozutelmu (Karjalan Rahvahan Liitto)

- Bes`odaine – pajojoukko Viidanoispäi

- Marija L`ovkinan pajo hyväkse mielekse (Vieljärvi). Kaikkien tahtojien vuoro pajattua da ozuttua

- ONDREIN räpätykset (Petroskoi)

- Kižat da pläšnät (työnytetäh Oma pajo da Bes`odaine)

13.30 – 14.30 väliaigu. Artistoin syöndyaigu – rauhuaigu

14.30 - 17.30 Teatrualine programmu Vokulovien koin sarual

1. Viizas saldattu. Karjalan rahvahan suarnu. Nuožarvi.
2. Suomenpuolizet livvinkielen aktivistat Timoi Munne da Risto Salmela: Pentti Saarikoski. Kuikan peldo- ozutuskappaleh (karj.kiändäi Santtu Karhu)
3. Opastai hierus. Kirjuttai Zinaida Dubinina. D`essoilu
4. Artistoin yhtehine rutol luajittu ozutus – ekspromt (työnyttäi Timoi Munne)

Juhlien aijakse roijah azutut čöndžöibazari, syöndykohtu da arbajaizet. Veseldykset ližäkse.

TULGUA KÄYMÄH PÄIVÄČELLEH KINNERMÄL PEREHINNEH DA DOVARIŠOINKE – ÄLGIÄ UNOHTAKKUA KARJALAN KIELDY!!!

Progruaman on luadinuh Antonovan Natoi

[Pekoi]

Pahaksemielekse emmo piäze. Mutšoi suau viizan vaste Kaššalin jälgeh.

[Pedrunnybly]

Pekoi, tottu toven, žiäli, ku etto piäze meidy, suurii artistoi, nägemäh!

[Maria]

Jo kodvan hos kois olemmo olluh matkan jälles, sitgi ei malta nimidä sih niškoi kirjuttua, kai piä mielii täyzi. Hos oligi vihmusiä, semmite huondespuolel, ylen hyvä oli festivualipäivy. Ga tunduu ku palaine minuu jäi sinne, moine oli mielužu matku

[Maria]

Ga se suurien artistoin ozutelmu pahakse mielekse jäi meil nägemättäh ku juuri sih aigah kodvakse pidi iäreh lähtie

[Olói]

Teatrufestivualin uudizii: http://www.youtube.com/watch?v=dsdwiq7Ll-g
Sie voi nähtä tämän foruman pagizijoigi

[Pedrunnybly]

Myö, kuduat näimmö suuret artistat, näimmö, a nimidä emmo kuulluh, ylen vihmui. Mikrofounoloinke olis olluh parembi, a kuibo ozutelmua nenga ozutat ? Enzi kerral sarual olis parembi, mugahäi Kuikan peldogi oli sie.

[Pedrunnybly]

Vot, hyvin pagizitto sie Youtubas, Maria da Juuli! Passibo linkas, Oloi.

[ruisräkäččy]

Täs vie yksi linka Nerokaššalispäi kačottavakse.
http://petrozavodsk.rfn.ru/rnews.html?id=1536517&cid=7