KK 74/2013 Suomen parluamentas

[mp]

Deputuattu Maria Lohela (ps) on Suomen parluamentas ezittänyh halličuksele kirjallizen kyzymyksen (Googles: Lohela Gustafsson KK 74/2013) kielipezien, valinnazen školaopastuksen, kodirandutoimindan da rajan yli yhteisruavon kannattamizes. Kyzymyksen perustelulois mainitah segi, ku karjal tarviččis moizen elävytysohjelman kui saamen kielelgi on.

Vastavukses opastusministru Jukka Gustafsson sanou, ku opastusministerstvu jo tiedäy. Kazvatustavoittehih kuuluu "suomen- ja ruočinkielizien, romanien da muahmuuttajien lapsien oman kielen da kul'tuuran kannattamine yhtes tämän kul'tuuran evustajan ker". (Huomivo: täs luvettelos on karjalazien suuruine loukko!) "Kunnan pidäy huolehtie sit ku päivyhoiduo voi andua suomekse, ruočikse libo saamekse, ku se ollou lapsen muamankieli. Ku kundu tahtonnou, toizilgi kielil." Ielleh ministru kirjuttau, ku 2012 urokkujavon mugah A2 da B2 kielien ylimiärästy valinnastu opastustu voi tarita". Sit ministru vie sanou ku OPM on tugenuh karjalan kieldy kannattajua yhtistystoimindua da senke kielipezätoimindua nuorizoruavon da kul'tuuran avustuksil.

Nämmä kirjallizet kyzymykset mennäh saman kuavan mugah. KKS varustau tiedopohjan da kuhkuttau deputuattoi eri puolovehis kyzymäh. Ministerstvan virguniekku kirjuttau ministrale vastavuksen ku kaikkie sidähäi jo ruatah, nimidä kohendustu ei tarvita. Yhtelläh kyzymykset ei olla sudre. Kuuluuhäi zualas sana "karjalan kieli" da nenga karjalan kieli muga kui on olemas.

Ministran vastavus ozuttau konstitutsien ebäoigevuonmugazuon da kui se haittuau alallizesti karjalan kielen valdivollistu kannatustu. Karjalua ei mainita suomen, ruočin da saamen jyttyöh kodoperäzenny kielenny (Tämän kyzymyksen tekstas kodoperäzys mainitah). Tavan mugah ministrat vastatah, ku karjal kuuluu muih kielih, kudamii hos ei pie ga voi kannattua. A Gustafssonan vastavukseh synnytäh vaiku muahmuuttajat muut - karjalazet ei synnytä täh joukkoh. Äijän on vie ruaduo deputuattoin, ministroin da ministerstvoin opastandas. Hos i konstitutsiedu ei ole kebjei muuttua, yhtelläh sen vijas pidäy alallizesti mustoittua sendäh ku konstitutsiitekstu andau zakonanluadijoile da virguniekoile mahton, petties libo nareko, jättiä karjalan kieli kogonah kielioigevuksien ulgopuolele.