Buito vie ei voi ostua pikkarastu mikrofonua, kudaman vois panna reppuh kiärböin selgäh, ga ei se ole muga ebärealistine duumu. Ornitologat pannah jo pikkulinduloin selgäh moizii reppuloi. Sensoruverkotutkimukses utopiiruijah suures joukos pikoipikkarazii protsessoroi, kudamil on eriluaduzii sensoroi da kudamat maltetah kommunikuija toine toizenke. Moizii protsessoroi duumaijah kylviä peldoh kaččomah ku vil'l'u hyvin kazvas, libo uuličal miäriämäh kontaminatsiedu. Konzu protsessorat maltetah luadie ylen pienikse, net ollah kui pölyy, älypölyy.
Voisgo luadie moizen kiärböingi? Germuanielazes suunnittelufirmas Festo on luajittu suvenkorendo, kudai lendäy. Se on kiärböidy suurembi, piduhus 44cm, siibiväli 63cm, 175g, ga lendäy nelläl siivel kui suvenkorendo. Lenduo ohjatah mobilniekal. Siivet on luajittu hiilikuijus da niidy lekutetah kaheksa pikkarastu motorua.
Toine tehnolougiiuudine mennyt nedälil tiedäy, ku Stanfordan yliopistos on keksitty, kui DNAs voi luadie lougiellizii veriälöi. Aijoin aloh sit toinah voi jo luadie protsessoroi geenutazol, geneettizii tiedokonehii. Jo aijembi DNAdu on maltettu käyttiä mustonnu. Voimmo ruveta vuottamah aigua, konzu buabat kazvatetah aivoloi padazis, pelargounieloin keskes.