Oigevusministerstvan seminuaru 4.10.2012

[mp]

Suomen Oigevusministerstval on 4.10.2012 Helsinkis kielioigevuksien seminuaru da kuulendukerähmö, kudamah on kučuttu kielii evustajii rahvahallizii järjestölöi, KKS:gi. Iče lähten toizeh suundah. A ku olizin paikal da suazin paginvuoron, nengomat sanat sanozin:
http://opastajat.net/luvekkua/penttonen/stuatusas.html

[Olói]

Opai hyvin kirjutit. Karjalas Piämies andoi luvan erähii oigevusministerstvan bumuagoi kirjuttua karjalan kielel sit kerras sai syytökset Zhirinovskin partielpäi. Kunnebo ajat; Karjalahgo?

[mp]

Paginan syväindön smietin seminuarah niškoi. Tekstakse kirjutin, karjalakse, oman pluanan jo muututtuu, oman piän selgendämizekse. Suomelazet nägöjäh viegi tahtotah pidiä kiini doktriinas "karjalazet paistah suomen murrehtu", kui voi lugie HS:n "rahvas loškutetah" ozastol 26-27.9. Karjalah ajan, Anukseh, Kotkatjärveh, Petroskoih, hyväl ilmal Uutjärveh, Lumatjärveh da Matrosahgi.

LDPR:l on tärgei rouli valdupoliitiekas. Katanandovan aigah, konzu kielizakonas torattih, LDPR:n deputuattu "tiedi", ku karjalazet tuldih Karjalah kolmesadua vuottu tagaperin, konzu novgorodalazet jo Karjalas elettih (Oma Mua 2001/47).

[Olói]

Hyvä olizi Karjalas dai Suomesgi sanella karjalazis da heijän histouries. Karjalas rahvas duumaijah ku karjan kielel ei voi ni kirjuttua. Suomes duumaijah ku karjalan kiele ei ole kieli nivouse.

[mp]

Riputan mainitut Helsingin Sanomien mielipidokirjutukset täsgi lugiettavakse skanniruitunnu kuvannu sendäh, ku se väiteh ei nouze nägyvih enzimästy eigo jälgimästy kerdua. Sendäh en ni tahto sormel ozutella kirjuttajua, eihäi väiteh olluh hänen keksitty. Algusyydy suau eččie jo 1800-luvun algupuolel, Lönnrotan aijois, konzu karjalua käytettih suomelazen natsionalizman rakenduspuunnu, karelianizmas. Täs opis karjalazet oldih omua arvuo ellendämätöi objektu, ei subjektu. Tämä idei, "karjalazet ollah suomen heimo, karjal on suomen murreh", oli käyttövoimannu kahtes valgien suuren Suomen projektas (heimovoinat da 1940-1944 voinas) da kahtes ruskien suuren Suomen projektas (Gylling da Kuusinen) da sidä käytettih karjalan kieldy vastah vie 1996-2004, konzu KT:s opittih nostua karjalan kieldy virallizekse kielekse. Nygöi viralline Suomigi vähä vähäl rubie tunnustamah, ku karjalan kieli on, da Suomesgi vie eläy karjalankielisty rahvastu. Toinah ELDIA-projektan tulokset tuvvah tämä vie selgiembi piättäjän luokan tiedoh. Sit pidäygi karjalazien iččeh ruveta enämbi ruadamah, ku tahtotanneh kehittiä karjalan kieldy da säilyttiä karjalazuon. Kirjutukset: http://opastajat.net/tmp/murreh.png Jälgimäzeh kirjutuksen alguperäine rubrikku oli "Karjala oli ja on suomenkin kieli", ga toimitus muutti sen.