Tiä on täl nedälil suomi-ugri muailmankongressu. Ezmäi piettih paginua prezidentat Mad'aaries, Viros da Suomespäi, Putin työndi pagizemah kul'tuuruministran. Ižändymuan paginas oli šuutkua, a muite ei äijiä jiännyh mieleh. Viron Ilves pagizi kui leijon, ylen hyvin. Mainičen yhten kohtan, kudamas häi verdai kielien suojeluo luonnon suojeluh. Geneetiekallizesti arvokkahimbat ollah harvinazet da valduvirras erilazimbat lajit. Suomen prezidentan paginas ei ole kodih kirjutettavua, sen voi lugie konstitutsies. Ven'an ministran pagin oli kui imperuattoran pagin, erikseh häi čakkai kielipezät. Häi sanoi ku omii lapsii ei kielipezäh työndäs - vikse Ven'an ven'alazet Ven'al maltetah omua kieldy puolistua kielipezittähgi.
Paistih 23 kielen evustajatgi. Erähät äijän luveteldih suurii suavutuksii, kui Brežnev, a bokkuvirkehes tuli ilmi moinegi šeikku, ku pagizijat huvetah. Äijän minuu miellytti ingerikon (ižoran) urhakas pagin, hos ei monen rahvahan oza muga kova ole olluh. Hyvin sežo pagizi Tverin mužikku. Heilgi oli karjalazii erähičči 150000, a nygöi vaiku 7400, pagizou karjalakse 2750 da školii on yksi.
Himoittau kävvä kezoil, mis vai on märgiä, kävyin Balattomasgi (kalatoi-kalattomas, mugahäi?). A järveh kävelles rodih kodi-igävy enne ku n'aba kastuu. Ga vačalleh heittyjen saihai sengi kastumah.
