Uudisanualiizua

[mp]

Tänäpäi (22.8.2012) Savon Sanomis oli kolmas piäkirjutus rubriekal "Karjalan Tazavaldu: Suomen kieldy elävytetäh". Syväindös sellitetäh piämiehen Aleksandr Hudilazen matkua Suomeh da kiinnitetäh huomivuo kanzallizusazieloih. Ihan oigein sellitetäh, min verdu on rahvastu da min verdu heis on karjalan, suomen da vepsän pagizijua. Sanottih hyvänny uudizennu, ku suomen da toizien vähembistökielien opastajile ruvetah maksamah lizäpalkua. Lopukse kirjuttai toivou, ku Päivännouzu-Suomes enämbi ellendettäs ven'an kieldy da Karjalas suomie.

Midä kummua täs on? Opin ellendiä, midä liikkuu kirjuttajan piäs da kui lugijat se ellendetäh. "Karjalan Tazavaldu" Suomes kiinnittäy mieldy. Onhäi se kui Suomen jatko, laukkoin piäl viegi voi löydiä tekstan "Ruokatavaraa". Karjalazet da vepsäläzet, hos heidy erikseh luvetellah, yhtelläh ollah kui suomelazien alaheimo. Da olihäi ammuine piämies Gylling algujah kuopiolaine. Kirjutuksen lopus toivotah, ku Karjalas enämbi opastuttas (ihan oigiedu) suomen kieldy. Karjalan da vepsän kielis nimidä ei sanota. Vikse kirjuttai heisgi ajattelou pozitiivizesti, ga net kielet ei olla azii, net kuulutah etnograafien teemah. Valdivon tazol Suomi-Ven'a suhtehis karjalan kieli ei ole azii. Karjalan mua, Suomele vai Ven'alego se kuuluu, olisgi azii, ga kielletty. Konzu Suomen da Ven'an valdivot keskenäh paistah, karjalaine rahvas da karjalan kieli jiähäh bokkah, se on marginualine teemu. Muga minä sidä kirjutustu luvin. Minun mieles karjalan kieli vois ihan hyvin pädie bisnessunevvotteluloih suomelazien ker, viron kielen jyttyöh. Sit karjalazil olis rouli väliniekannu ven'alazien da suomelazien välis.

[Olói]

Karjalan piämies Suomes olles pagizi vaiku suomen kieles sendäh ku ni yksi toimittai ni kyzynyh ei karjalan libo vepsän kieles. Pidäs kyzyö karjalan kielen aktivistoi, kuduat oldih vastavukses Hudilaizen kel, midä häi sanoi karjalan kieleh näh

[mp]

Tiettäväine, joga kohtas pidäs olla da kyzellä. Ga täs minun mielenkiindo oli, midä liikkuu suomelazen toimittajan piäs, midä häi nägöy Karjalan Tazavallas. Suomelazele toimittajale, hos häi mainiččou karjalazet da vepsäläzet, ihan vagavah nämmä ei olla olemas. A suomen kieli Karjalan Tazavallas on potentiualu.

[Olói]

Suurin vuitti Suomes eläjis duumaijah ku karjalan kieli on suomen kielen murreh. Karjalan kielen seura on äijän ruadanuh, da allus olemmo. Ice joga Karjalan matkal sanelen suomelazil kui 20-30-luvul Karjalas suomelaine hallicus pidi karjalan kieldy pädemättömänny, kogo histouries karjalan kielel oli vaiku kaksi vuottu kehittyö 1937-39. Nygöi en voi sanuo ku karjalan kieldy mitah valdivo kannattau (Suomi da Vená). Oigieh sanon ku niken ei kannata. Da karjalazennu en rubie icciedy da omua rahvastu ziäleiccemäh, oigiet ruavot da median keral ottamine muutetah tilandehtu, muga uskon! Tulies Vieljärven subotniekas da Karjalan kielen kois Karjalas on kirjutettu kolmes gazietas da kolmel saital täl nedälil, muga Karjalan eläijät kuultah ku karjalazil on vie tahtuo omua kieldy kehittiä da säilyttiä.

[mp]

"Žiäleiččömättömys" täs on sana paikallah. Omas Muas 12/33 luven "No midäbo sille voimmo myö kurjat omal mual". Loputoi gor'ankäzittely nikunne ei vie. Parembi lekuttua labjua migu gor'uija.

[Olói]

Nuorennu muamale zualuicimmos ku kento oli kadehelline minule. Muamo vastai: sithäi dielot ollah hyvin, parembi kadehtitah ku ziälöijäh. Toinah vie karjalazii kadehtitah da ice karjalazet tahtotah olla karjalazennu.