Gost'ii Karjalaspäi Suomeh

[Kirilä]

Suomen opastajat ollah oldu gost'is Ven'an Karjalan školis silloi-tällöi. Iče olin ligakuus sygyzyväl'l'äl Petsroskois Suomelais-ugrilazes školas gost'annu da sezo ruavos. Matkukerdomuksen voibi lugie Karjalan Heimo -gazietas. Se vai on suomekse kirjutettu ku läziydyin da ei olluh vägie da aigua kirjuttua putilleh loppuh karjalakse, prostikkua.

Tämän kuun aigah tulou Karjalaspäi opastajii Suomeh. Meil Lapinlahelgi tulou kaksi opastajua da hyö ollah karjalan kielen maltajii. Toinen on karjalan kielen opastai Veskelyksespäi da toine on karjalan kielen metodistu Petroskoin universitetaspäi. Hyö ollah tiäl 19.-23.1. da azutah perehis. Matkun piämiäry on tuttavutuo Suomelazeh školah da tiettäväine kultuurah da inehmizih. Tuan nedälin nel'l'äs päivy meil on rahvahan opiston karjalan kielen kursa Varpaisjärvel da sit voijah meijan opastujat paista heijän ke muaman kielel. Kedä himottau voibi tulla tarattamah da tuttavutumah heijänke. Tulgua terveh!

[mp]

Anna hyö opastetah hos yhten urokan verdu karjalakse, kiändämättäh da sellittämättäh. Sit smiettikkiä urokal, ongo karjal kieli libo murreh. Vie parembi olis ku rinnal olis raumakse pagizii raumlaine opastai, ongo "raum" "giel" libo murreh?

Mibo luadiu kielen? Kielioppi, sanasto, intonatsii, raja? Konzu iče menin školah, suistamokse pagizijannu, ei se suuri vaigevus olluh, hos oligi huigei. Tiijän toizis kohtis on olluh vaigiedugi, a meilpäi ei ryssitelty. Sih aigah, kymmene vuottu voinan jälgeh tiettäväine olin jo kuulluh susiedoin paginoi da joga päiviä borčuinnuh susiedan saman igähizen brihačun kel, a kois pagin meni karjalakse. Kois nikonzu kieldy ei vaihtettu, a vähä vähäl pagin libui savoh da suomeh päi, muga kui elosgi.