Uudizet kuduat jatkettas elaigua

[mp]

tämän foruman, hos kuukavvel. Puolen vuottu tagaperin rubein kaččelemah statistiekkoi, kirjuttaugo ken tälle forumale. Ylen vähä ket kirjutetah. Luajin kritieran: ku mp/verkomuagari/ylläpidäi kolminazuon lizäkse kuukavves ei olle kahtu kirjuttajua mollembin puolin rajua, sit forumu joudau salvata. Pakkaskuul kritieru täydyi ylen hut'oisti, uvvenvuvven toivotuksien vuoh. Tuhukuul tässah kirjuttajua on olluh vie vähembi. Minä nikonzu en sano, ku karjalazien pidäs paista libo kirjuttua karjalakse. En käske engo itkettele, vaiku sanon lougikan tabah: ku forumale ei kirjutetanne, forumu häviey. Ku karjalazet ei paistanne da kirjutetanne karjalakse, karjal - kieli da kul'tuuru hävitäh. (Tiijättöhäi, minä vouse en suvaiče "Karjalan mua on kaikkii paras" pajuo, kudamas sanotah "pidäs sidä" da "pidäs tädä". Mindähbo pidäs? Karjalan mua ei ole kaikkii paras, a karjalazile pädöy kodimuakse. Karjalan kieli ei ole toizii čomembi, a pädöy karjalazile muamankielekse. Ristikanzal on oigevus paista muamankieldy da suaha kazvatus muamankielel, ku tahtonnou. Ku ni ken en tahtonne, mindähbo itkie. Yhtelläh vähäzen on žiäli ku muga äijän monituhatvuodistu evolutsiedu menöy sudre.)

Uudizii kudamii minule himoittas tiediä:
- kui mendih paginat "Mi yhtistäy karjalazie" seminuaras?
- perustettihgo "Hukat" da kui ruvetah ruadamah? Ongo hukan nälgy?
- kui meni KKS:n kerähmö, midä piätettih, midä ruatah?
- kui mennäh kielipezät?
- kui ruatah kielikursit kylil da linnois? (Kirilän kuulumizet oldih mieldykiinnittäjät)
- KT:s, kui ruatah paiči školat, kyläläzien yhtistykset?
- KT:s, mittustu kniigua ozutettih prezentatsiel? Oma Mua kerdoi vähäzen, a vaiku vähäzen.
- ongo kel tieduo Karjalan Liiton kielikursilois tuliennu kezänny?

Uskaldin kävvä sulakuul Petroskois pagizemas yliopiston opastujile tiedotehniekas, Internetas da Suomen puolen kielikuulumizis. Löydynnöygo sie opastujua, kuduat kirjutettas tälle rajattomale forumale? Libo kuollougo kurgi enne suon sulandua? Olen duumainnuh, ku omii mustohpanoloi voin forumattahgi kirjuttua mittumahtahto opastajien sivuloin čuppuh da jatkua opastusmaterjualoin keriändiä sinne, hos ei opastajile, a Internetan rahvahale. Školaozutteluloin hengihjiändy rippuu siidy, ruvetahgo opastajat iče kirjuttamah sivuloi libo andamah tiedoloi školan elokses.

[Manutar]

Äijän on viime aigah karjalan kieli suannuh julgizuttu tiägi Jovensuuspäi.
Meijän linnalehti ”Karjalan Heili” kahtes viime noumeros on ylen myöndehizil kirjutuksil
andannuh dieluo karjalan kieles, internetan mahtollizuttu käyttiä da elavuttuo kieldy, täsgi opastajiin forumas on dieluo olluh. Passibuo Marial da Munnen Timoil, työ nuoret oletto da maltatto käyttiä kaikkii näidy nygyaigazii brujii.

Egläi olin piälinnas Karjala pruasniekan Suistamo-illas. Sie arhiepiskouppu meidy suistamolasiigi
kehoitti vai pagisemah da kirjuttamah karjalakse, kai sil murdehel da maltol, mi icel on.
Na, kuundelin Izä Ezipaimendu, da kirjutin...

[Ruisräkäččy]

Egläi ehtäl sežo televizor uudizis sanottih kui nuorembi sugupolvi nygöi ollah ruvettu interesuimahes Karjalan kieldy da kul`tuurua. Se ylen hyvä dielo on, heijän ies pidäy nostua hattu. Kaikenmoistu julgizuttu sit tarvitah aziin edehpäi suattamisekse.