Suuret uudizet 2010?

[mp]

Tärgevimis tiijotusvälinehis vuvven vaihtujes on kačelmu mennyön vuvven uudizih, mugai opastajis. Smietin, mit oldih kolme suurdu uudistu mennyt vuon. Valličen nämmä, vuozirajois en ole ihan tarku:
1) karjalazet kielipezät
2) Petroskoin kanzallizen teatran kiännälmykset
3) ELDIA tutkimus.

Mindäh? Ku kačot lapsijoukkuo, kudai elostau karjalakse, vältämättäh tulet hyväle mielele. Niidyhäi on vaiku kaksi eiga net olla ihan tävvellizet kielipezät, ga tävvellizes muailmas olisgi hirvei eliä. Kielen säilyttämizeh pezä on ehtotoi. Äijängo niidy pidäs olla? Sanommo, karjalazii on sada tuhatta, pezävuozii nelli, pezäs kymmene lastu: 100000*(4/80)/10=500. Pezän jälgeh školah. Školavuozii kymmene, školas sada lastu: 100000:(10/80)/100=125. Karjalakse opastajii školii nygöi vie ei ole ni yhty.

Petroskoin kanzallinen teatru on sendäh tärgei uudine, ku se paljastau, mittuzes arvos pietäh vähembistökul'tuuroi. Teatran johton vaihtamizen voi nenga ellendiä, ku se teatru oli jiänneh suomelazis vallanpidäjis, a nygöi ven'alazet vallanpidäjät oijattih histouriedu. Sua nähtä kunne piädyy teatru.

ELDIA on tärgei sendäh, ku luuloloin da pruazniekkupaginoin toivehajattelun da kauhuskenuarieloin sijah ečitäh tieduo karjalazis. Tieduo karjalakse pagizijoin miäräs nygöi ei ole. Toinah tiedo jiä vajuakse tutkimuksen jälgehgi, ga lizenöy. Tulougo syngiä libo valozua – ei voi arbata, siksehäi pidäygi tutkie.

Midäbo duumaičetto, teijän mieles, mit oldih suuret uudizet?

[Gagarin]

Ga onnuako en ihan put'illeh muissa, a neushto 2010 olluh dai karjalan virallissamini Suomes vähemmistökieleks?
Nečehäi taki se suurin uud'ini ol'i! Vai liego ollun 2009?

[mp]

27.11.2009 Suomen prezidentu andoi ukuazan, kudamal karjalan kieli ekspliziittizesti mainitah niilöin kielien joukos, kudamih soveldetah Jeuropan Nevvoston vähembistökielien peruskirjua (kačo http://opastajat.net/forum/viewtopic.php?f=9&t=38#p355). Zakonallizesti se toinah nimidä ei muuttanuh, a poliitiekallizesti se on suuri uudine – se muga kui kuhkuttau karjalazii eččimäh tugie mainitus peruskirjas. Yhtelläh, minun mieles kielipezälapsen kirkahat silmät ollah suurembi uudine migu mutakot zakonat.

[Ruisräkäččy]

Minun mieles myös se, što Leena Bogdanovas tuli kul´tuuruministeru, on tärgei uudine.