Tälle forumale roih 6.8.2009 yksi vuozi. Miäritelmän mugah tämä forumu on
täyzin karjalankieline, ei ven'an libo suomenkieline
rajatoi Suomen da Ven'an karjalazien yhtehine forumu
vällästi karjalazih kieli- da kul'tuuruteemoih liittyi, täs aijas
Kirjuttajien vähys vikse vihjuau, ku forumu ei ole tarbehelline. Netgi ket ollah käydy ei olla ottavuttu omii ajatuksii da tiedoloi kirjuttamah. Forumua ei voi olla kirjuttajattah.
Ku ei lopetus tulis yllätyksenny, toimin muga:
elokuus kabrastan jäzenet, kuduat ei olla käydy forumal liittymizen jälgeh
syvyskuus kabrastan jäzenet, ket nikonzu ei kirjutettu
ligakuus kabrastan jäzenet, ket ei olla kirjutettu kuudeh kuukaudeh
kylmykuus kabrastan net, ket ei olla kirjutettu kolmeh kuukaudeh
talvikuus net, ket ei olla kirjutettu kuukavven aloh
Sen jälgeh sini jatkammo kuni jiännöy hos viizi jäzendy, kaksi kolme kumbazesgi muas, kuduat kirjutetah kerran kuus libo puaksumbah. Ku tahtonet lugie, kirjuta!
Tänäpäi roih vuozi igiä forumale. En malta sanuo, ongo vuozi mennyh huonombi libo parembi migu vuotin, engo sidä rubieugo forumu elämäh. Kačommo vie vuvven loppuh kui aijembi kirjutingi. Kirjuttajii foruman perustajan ližäkse on olluh 17, a 235 kirjutukses enämbi migu puolet ollah perustajan kirjutetut. Suurdu miäriä ei voi ni vuottua. Vähä midä karjalazet tietäh rajan toizel puolel eläjis karjalazis, ku hyö aiga vähä omasgi karjalazuos ja karjalazien histouries tietäh. (No sehäi olisgi hyvä syy pidiä forumua.) KT:n puolel kaikil vie ei ole mahtuo piästä Internettah kirjuttamah da monele karjalan kielen opastajalegi tiedokonehen latinalaine näppäimistö on ylipiäzemätöi probliemu. Suomen puolel, sih nähte ku pagizijoin luvukse mainitah 5000, on vähä ket ruohtitah ni yhty sanua nägyvih kirjuttua.
Kuibo täs edehpäi? Aijemban ilmoituksen mugah kabrastan jäzenluvettelos ezmäi "zombit", kuduat ei olla käydy forumal liittymizen jälgeh, sit kirjuttamattomat i m.i. Vuvven lopus kačommo jiäygo aktiivistu kirjuttajua. Kaikkii enimbän toivozin, ku oldas uskollizet "korrespondentat" Petroskois, Anukses, Jovensuus, Helsinkis, kuduat kerrottas karjalazien tapahtumis enne da jälgehpäi, kui opastus yliopistos, školas da lasten libo ruavahien kerholois menöy, kui zakonalline stuatussu eistyy, mitä uuttu libo vahnua julgavuo on, libo midä lapsi sanoi da buabo pagizi, hos kerran kuus. Se pidäs foruman hengis da vedäs uuzii kirjuttajii, da tiedäzimmö midä tapahtuu rajan toizel puolel da susiedukyläsgi. Sil aigua opin iče vie kohendua forumuohjelman toimindua (yksityzet viestit) da karjalakse kiännösty.
Forumu pidäy i tahton sidä lugie, a kirjuttua on vaigei. Vähäzel varačču olen; ollahgo minun paginat mieldykiinnittäjät vai tolkuttomat, ellendetähgö minun karjalua hos virhielöi on äijy... Tiettäväine, kirjutuksittah ei meil ole forumua.
A midäbö minun lapsi tänäpäi sanoi (passibo, ylläpidäi, rohkuandas...)? Häi, 13-vuodehine, yhten sanan maltau karjalakse paista: počči!
Jälgimäzen kolmen kuukavven aijannu forumale ollah kirjutettu kaheksa hengie, jälgimäzen kuun aijannu vaiku kaksi hengie iččeni lizäkse. Kačommo vie kaksi kuudu, ga nägöjäh forumu astuu kui häkki hamarah.
Vähäzen statistiekkua. Viijentostu kuukavven aijannu kirjutuksii on tulluh kaikkiedah 304, 86 teemas, da niidy on kačottu 5167 kerdua. Kirjuttajua on vähä, kirjutuksis kaksi kolmattu vuittii ollah minuspäi. Kaiken aigua forumale opittelou piästä ristikanzua, kuduat ilmoitetah qwerty@yandex.ru libo asdfgh@gmail.ru jyttysty ozutehtu ga net pyhkin hedi, emmo tarviče suomenkielisty horoskoopan libo anglienkielisty viagran reklamiiruiččijua, heijän vuoh onnuako ei lizetä karjalakse pagizijat. Foruman hengihjiändiä voi kannattua --- kirjuttamal karjalakse forumale.
Statistiekkua kylmykuun aijal: Tänne kirjutti 6 kirjuttajua iččeni lizäkse, nämmis yksi on uuzi, suuri passibo hänele! Piälekirjutetun siännön mugah vai nämmä jiädäs jäzenluvetteloh, ga jätän vie ligakuus kirjuttanuot, hos ei käydygi tiä kylmykuus. Uuttu kirjutustu kylmykuus tuli 37 da kirjutuksii luvettih kylmykuus kaikkiedah 674 kerdua.
Suurin huoli on tämä: kirjutuksis vaiku yksi tuli Karjalan Tazavallaspäi. Ilmai ozanottuo mollembin puolin rajua ei ole motivatsiedu pidiä tädä forumua. Minul on vie yksi keino - konzu suan "Tiedotehniekku" kniigazen painospäi (huomei?) da piäzen Petroskois käymäh (enne rastavua), työnnän školile kirjazen da sellitän tilandehen. Opastajat.net sivut säilytän hos en suannegi abuu toizispäi. Školasivut vahnetah da pidäy hävittiä, ku školis niken ei ruvenne kirjuttamah niilöile sizäldyö - iče en kergie joga školale muga puaksuh käymäh. Forumu häviey, ku ei löydyne kirjuttajua mollembin puolin rajua. Toinah sit pidäy lisätä opastussivuloin bokkah ylläpidäjän čuppu tiijotuksih niškoi. Ongo kel idejua, kui piästä edehpäi?
Talvikuun 2009 statistiekkua:
Talvikuus opastajien forumale kirjutettih yheksä hengie da vie ičegi. Ei tarvinnuh pyhkie niyhty zombijäzendy. Uuttu kirjutustu rodih 44 da kirjutuksii lugiettih kaikkiedah 740 kerdua, enimbän uudisforumal da julgavoforumal. Sidä vie vuottazin, ku karjalan kielen opastajat puaksumbah kirjutettas kylien kuulumizii. Passibot kaikile kirjuttajile da lugijoile, kirjuttakkua da luvekkua vie!