kartat da paikannimet

[mp]

Täs erähii verko-ozuttehii, kudamis voit kačella da ičele lad'd'ata kartoi:

http://kansalaisen.karttapaikka.fi
Suomelazien kartoin kaččelu da ozuttehien eččo.

http://maps.poehali.org
Ven'an kartat. Suomen kartat ollah äijiä parembat toizis ozuttehis.

http://gm2tb.awokenmind.de
Googlen kartat. Ilmukuvis voit čotaija aijango mašinua on Severnajan pihas. Tiäpäi voit ottua kartat pakietannu OziExplorer ohjelmas käytettäväkse libo Symbian S60 matkutelefonois ilmazen TrekBuddy navigoinduohjelmanke käytettäväkse.

P.S. Nämmii kartoi voit käyttiä paikannimilöin keriändäh. Ku tiedänet paikan da sen karjalazen nimen, eči se paikku ezim. jälgimäzel gm2tb.awokenmind.de sivul da merkiče tiečökkehekse (waypoint). Lopukse kopiruiče tiečökkehet ičele. Muga voit ylen kebjieh kirjuttua mustoh paikannimet muantiijollizien koordinuatoinke, toizilegi ilmoitettavakse. Pädis hyvin škola- libo opastunduprojektakse.

[mp]

Rubein nareko joudaval aijal ajelemah Karjalan dorogazii pitkin http://maps.google.com kartusivul. Dorogii ei ole sil sivul ylen hyvin piirretty, a satelliittukuvat ollah tarkat. Konzu viet hiiren mieldykiinnittäjäh kohtah, hiiren nybläl voit siirdiä sen kohtan keskele ekruanua. Sit sanua Link painaldamal suat tämän paikan koordinuatat nägymäh. Siirrin hiirel koordinuatat paikat.txt nimizeh tiijostoh, kuduah keräin nämmä paikat:

name, latitude, longitude
Tuatan roindu, 62.080421, 31.417465
Muaman roindu, 61.9920000, 31.2833889
Videle, 61.182977, 32.35611
Suuri Mägi, 61.310803, 32.46357
Kudžoi, 61.43784, 32.5241
Kinelahti, 61.3888588, 32.5974591
Panninselgy, 61.396396, 32.77781
Kinnermägi, 61.527027, 32.824077
Alavoine, 61.012730, 32.685699
Tuuksi, 61.007572, 32.849636
Anus, 60.972941, 32.975636
Yllöine, 60.996088, 33.021126
Oma Mua, 61.7902500, 34.3791944
Särgilahti, 61.9134899, 33.0515188
Kolatselgy, 61.6788013, 32.2315320
Nuožarvi, 61.63206, 33.18064
Rodinjärvi, 61.5905103, 33.1912239
Puhtasjärven Maša, 61.533088, 33.156567
Ylä-Anus, 61.46228, 33.25467
Reboiselgy, 61.457658, 33.17037
Suarikoski, 61.09009, 33.0574074
Dessoilu, 61.84563, 33.21140
Meliorativnoi, 61.86296, 34.24551
Kivatsu, 62.26805, 33.98195
Munjärvenlahti, 62.25, 33.83
Priäžy, 61.6914445, 33.6208889
Kotkatjärvi, 61.2734457, 33.2092171
Uutjärvi, 61.3104722, 33.1025278
Nurmoilu, 61.0725, 32.9296
Žil'čoi, 61.0906, 32.9759
Čilmie, 61.1667, 33.3333
Mägrie, 60.9312, 33.1019
Kuittine, 60.99264, 33.21407
Sammattu, 60.9312, 33.2519
Kuujärvi, 61.017056, 33.730774
Sändämä, 61.163278,32.743721

Toven sanuo erähät nämmis paikois minul jo oldih gps-laittehes da toizii kačoin Aerogeodezijan 1:100000 kartas. Ga suuri vuitti ollah Googlen kartois da satelliittukuvispäi.

Mindähbo muga luadie? Ku ken kerännöy paikannimilöi, koordinuatoil voi ylen tarkah sanuo da kartal ozuttua, kus net paikat ollah da jagua tiijon toizilegi. (Il'l'u hoi, jogoi muga luajit?!)

A gu tahtonnet kaččuo uvvessah kartal, kus ollah nämmä paikat, sit mene sivule http://www.gpsvisualizer.com da sie kirjuta GPS-ikkunazeh, kus sinul on omal konehel moine koordinuattutiijosto (kui minun kartat.txt) da painalda kačondunybliä. Nägyvih tulou moine kartu:

Olizin voinnuh panna paikannimetgi nägyvih, ga sit kuva täs miärykuavas olis roinnuhes segavu. Täs net tuldas nägyvih paikkumerkii painamal (Ei tiettäväine täs ekruanan kuvas!). Voi olla kaikis livaimis nämmä sivut ei hyvin nävytä, minä net luajin da kačoin Firefox nimizel livaimel.

Tämä vois olla, duumaičen, hyvä teemu školan muantiijon urokale: kerätä tukkuh oman kodirannan karjalazet paikannimet da sit tiedokonehkluasas net kirjuttua tiedokoneheh. Da andua tiedo iellehpäi, hos tälle forumale.

P.S. Voit terväzeh proubuija paikoin ližiändiä kartah kopiruiččemal minun kerätyt koordinuattutiijot tiijostokse omale tiedokonehele (mittumaltah tekstuedittoral, ezim. notepad) da menemäl sit gpsvisualizer sivule työndäjen sinne vasteluajitun tiijoston. Toizel kerdua jo voitgi iče ližätä omii paikkoi tiijostoh da kaččuo kui net nävytäh.

[mp]

Rubein kehittelemäh iellehpäi, kui ozuttua paikat kartal. Kui aijembi sellitin, omii paikannimii voi kaččuo gpsvisualizer verkosivul. Ga voi käyttiä omuagi kartua da kaččuo livaimel. Riputin piäl luvetellut paikat kartanke sivule http://opastajat.net/opastus/paikat/karjal.html kačottavakse.

Školniekat toinah kebjiembäh opastuttas paikannimiigi kižuamal. Tuli mieleh moine kiža, nimi olgah hos "Eči 5 paikkua!" Tiedokoneh tariččou paikannimie. Se pidäy hiirel ozuttua tyhjäl kartal. Tiedokoneh čoitaiččou, äijängo kižuaju hairehtui da laskou yhteh viijen arbuandan tulokset. Se voittau, ken vähimbän hairehtuu. Kudakui arbuan, kui moizen kižan vois luadie käyttämäl kuvas ismap attribuuttua da ajamal pikkarastu cgi-ohjelmua palvelimel loittohuksien laskendah, ga ihan kerras en malta kirjuttua. Pidäy vie smiettie da on muudugi ruaduo.

[mp]

Kehitin ielleh kartua ozuttehes http://opastajat.net/opastus/paikat/karjal.html Paikat nävytäh uvvembis livaimis azettamal hiiri sinizen nellikön piäle. Kirjutin skriptan, kudai automuattizesti luadiu moizen kartan paikannimi,piduhus,levevys luvettelos. Kartan pohju voi olla mitah, libo valgie "bumuagu". Mainičin paikannimikižan luajindan cgi-skriptannu - jo maltazingi luadie, ga verkopalvelin ei anna ajua moizii skriptoi. Pidäy luadie toizeh luaduh, ga sidä vie en ole duumainnuh.

P.S. Kartuazielois kačo tarkembi sivuu http://opastajat.net/opastus/paikat/paikannimet.html