Minun oma kieli kilbukirjutukset
Karjalan Kielen Kodi 2015, 63 s.
Kirjan prezentatsii on Karjalan Kielen Kois Vieljärves 22.8.2015. Kirjua suau ostua Ven'al Karjalan Kielen Kois da Suomes Karjalan Kielen Seuras.
"Verdailii karjalan kielioppi" projektu organizuičči kirjutuskilvan teemal "Minun oma kieli". Kilbah työnnettylöis kirjutuksis on kerätty samanimine kirju, kudai nygöi piäzöy ilmah. Tekstua on viijeltostu kirjuttajal, prouzua da runuo. Kirjuttajis on nuordu (12 v) da vahnembua (73 v), kuduat kirjutettih livvikse, lyydikse, vienakse, tverikse da vähäzen ižoraksegi. Projektan ruadajat piätettih jagua 50€ palkindot kirjuttajile: Maria Kähäri (livvi, Varkaus), Lusja Kiprušova (lyydi, Kuujärvi), Veronika Kiprušova (lyydi, Kuujärvi), Anna Nikitina (livvi, Kuujärvi), Klavdija Vinogradova (tver, Ruameški) da Anna Vlasova (viena, Piäjärvi). Valličendukritieroinnu oldih ei vaiku muvvolline parembus, a syväindöllizet šeikat moizet kui annetun teeman huomivohottamine, murdehien evustuksellizus da kirjuttajien igäjagavundu.
Kui piälkirjutetus voi ellendiä, kilvan ainavonnu tarkoituksennu ei olluh nostua ezih nerokkahii kirjuttajii, a kuhkuttua rahvastu kirjuttamah omii mielii omas kieles da vediä yhteh karjalazii kirjuttajii yli murrehrajoin, suaha näyttehii kielen tilas. "Koneen Säätiö" fondan rahoitettu "Verdailii karjalan kielioppi" projektu oppiu kartoittua karjalan kielen kieliopillistu variatsiedu, eroloi da yhtäläzyksii da dokumentiiruija net yhtes käzikirjas. Tämä on projektan piädielo, kerätä tieduo karjalan kieles, toizin sanojen puhtastu tiedoruaduo. Yhtelaigua projektu kuhkuttau karjalazii duumaiččemah rohkiesti da ičele kielastamattah karjalan kielen da kul'tuuran tuliedu aigua, mi meidy nostau da mi meijät hävittäy. Kui pidäs vallita tavoittehet da midä pidäs kenengi ičen ruadua, ku kielel olis mahto siirdyö tulieh aigah da kul'tuural olis mahto nosta? Mittuine on sit protsesas yhten ristikanzan rouli, kylän rouli, alovehen, valdivon da federatsien rouli?