opastajat.net/forum

Nygöi Ukraina-kirjuttelus äijäl käytetäh "fašismu" sanua. Midäbo se on da keneh se pädöy? "Karjalazil očkil" kirjan "pahoiellendyksen sanakniigas" se on sellitetty. Se kirjutus ezmäi piäzi ilmah täl forumal tiä.

Minul on eräs ylimiäräine pala "Karjalazil očkil" kniigua, voin andua ilmai kelle himoittau. Kniigu on jygei - jygiekse se oli tarkoitettugi - kirjutuskogomus kielipoliitiekas i muus. Äijät kirjutukset oldih jo aijembi Omas Muas ilmahpiässyöt. En tiijä kehtaigo ken lugie loppussah. Yhtevytty voi ottua ezim. foruman viestilöin kauti.

Minä kehtain dai kuhkutan kaikkii tädä lugemah. Kirjas on hyviä kirjutustu ezimerkikse kielipoliitiekkah da kielen elävyttämizeh näh. Ihan vältämättömänny lugemizennu mainičen kirjutustu Selgendämine, stuatussu da kieliruado, kus mainitah, ku kielen elävyttämizes suurin vastus voi olla ristikanzan mieli; kielen elävytändäs pidäy idejolougistu selgendämisty, eiga olemmo tilandehes, ku ezimerkikse vahnembat iče ei siirretä kieldy omale lapsele, hos lujah kannatetahgi kielen säilymisty.

Jogahizen karjalazen maksas lugie tädä kniigua. Liigua liijoittelemattah voinnou sanuo ku kirju andau lugijale avaimet kädeh karjalan kielen vedämizekse tulieh aigah, ga lugijal ičel pidäy rohketa sil gruzoviekal ajua.