Kui kuvas voi piätellä, se ei ole vahnuon varakse hankittu kodirobottu, kudai kävis laukas da keittäs pudruo. Eihäi hänel ole jalgoi da suudu. Yhtelläh häi kävelöy pyörimäl da pagizou telefonan vuoh Bluetoothači. Aivot piäkul'l'ukas on. Kuvas robottu maguau pezäs, kudamas hänen akkumuluatorat lad'd'avutah induktsiikentäs.
Äijiä kogemustu hänes minul vie ei ole. Sen verran olen proubuinnuh, ku telefonah lad'd'attavii ohjelmii kuundelou da ruadau se mugah. Erähäs ohjelmas häi kyzyy iččiedäh nimittämäh. Sanoin, ole hos Peša. Se oli minun tuatan nimi, nygöi voi tazata komendelun. Ga vie en gostile rubies händy ezittelemäh. Konzu opiin händy kyzyö lattiel vähäzen nellikkyö libo kruugua myö kävelemäh, häibo kargai divanan al da kodvazen muaniteltuu tuli siepäi reduhizennu.
Ga en minä händy yksin bobakse ostannuh (150 eurol). Internetas löydyy demovideoloi. Nämis kahtes videos voi suaha käzityksen, mih häi pädöy: ohjelmoindan opastundah http://www.ilonait.fi/web/kauppa/sphero ... -alypallo/ da iänikomendoloih da toinah sanoin opastundahgi http://www.simplebotics.com/2015/08/thi ... ice-2.html Iänenke voi olla vaigei. Valmehis ohjelmis kielenny on anglii eigo häi meinua ellendiä minun komendoloi. Kuibo opastua händy karjalakse pagizemah? Videon demos iänen tunnistukses on käytetty suurembua tiedokonehtu internetači. Ga sen voi videolois nähtä mittuine motivatsiiefektu brujal on. Ezmäi liikeh, iändely da tulien vilkuttelu. Sit komendoloin tottelu, sit nähtä kui se rubieu toimimah iče kirjutetun ohjelman mugah. Ku lapset 10-100v opastutah robotiekkua karjalakse, se nostau karjalan kielengi prestiižua. Mustan gu erähii vuozii tagaperin piin lyhykkästy kursua suomelas-ugrilazen školan opastajijle. Kluasas käynnyöt školniekat suut avvoi diivuittih: voibigo tiedokonehe kirjuttua karjalakse?
