Karjalan kieldy opastundukerhos

kielipezät, školat, kursit, ičeopastundu, opastundumaterjualat

Valvoi: verkomuagari

BUTTON_POST_REPLY
Käyttäjän avatar
mp
Viestit: 2108
Liittyi: 05 08 2008, 19:45

Karjalan kieldy opastundukerhos

Viesti Kirjuttai mp »

Rubein kyzelemäh, kui aiguzet Suomes välläl aijal opastutah karjalan kieldy. Kuopios "Kanzalazien opistos" Kari Koslonen vedäy mostu kursua kaksi čuassuu nedälis. Joga nedälii häi tožo kävyy pidämäs mostu kerhuo Leppävirral, Varpaisjärvel da Pielaveilgi. Jogahizes joukos on 12-14 opastujua - moizen joukon opastundah valdivo vähäzen andau denguabuu. Moizii joukkoloi buite tožo on Jovensuus, Lahtes, muijalgi. Anja Rouhola Helsingispäi työndi ualolijan kirjazen. A kuibo on Karjalan Tazavallas? Ku kenel himoittannou opastuo karjalan kieldy, kusbo voi opastuo da kui mennäh kursit?

<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<<
Anja Rouhola:
Omaehtoine himoruado

Meil päivännouzu-Helsingis on olluh jo nelli vuottu himoruado joga nedälii tossuarren illal paista da lugie yhtes omua livvin kieldy.

Konzu zavodiimmo yhtehizet paginat, meidy oli vai nelli ristikanzua. A kodvazen jälgeh jogahine pagizi tuttavile da rodnile. Dai hyö tuldih himoruadoh. Erähät ni vähiä ei maltettu paista karjalakse, a toizet terväh mustettih muaman da tuatan, buaboloin da died'oloin sanoi da sanondoloi.

Peša Lampi on meijän johtai. Häi aiven valliččou midä myö luvemmo. On olluh zuakkunoi, erilazii kirjoituksii Oma Mua gazietaspäi Karjalan kul'tuuras da ajankohtazii tiedoloi karjalan kielen kehitykses.
Jogahine omal vuorol lugou pikkarazen palazen, sit suomendau sen, a gu ei maltanne, sit yhtes suomendammo. Meil on ylen vesseliä da lystii yhtes.

Nygöi meidy on olluh jo yli 20 ristikanzua näijen nellän vuvven aigua. Erähiči meidy on pagizemas da lugemas yli kymmene hengie ga toiči 5-8 ristittysty. Ga eihäi kaikil aiven samat aijat ugodi. Čuajuu juommo da piiruadu, kringelii da seksie syömmö. Kai aiven ollah synnytty meijän joukkoh, ket tullah.

Erähän kerran luajiimmo yhtes murginan: keitimmö kalakeiton, luajiimmo keitinpiiruat, pastoimmo hapainkeitinpiiruat. Ken ei lienne enne maltanuh, häigi opastuu. Matkua pitkembiä da lyhembiä olemmo tožo luadinuh. Kerran kävyimmö Oili Mäellyö putilleh omua kieldy pagizemas.

Sygyzyl 2008 meil oli intensiivikursi Helsingin ruadorahvahanopistos. Ol'ga Mošnikova Kotkatjärvelpäi oli ylen hyvä opastai. Händy olis vie toizengi kursin aijan kuunnelluh da hänen ker paissuh.

Jälgimäzel kerral luvimmo jo viizitostu vuottu Karjalan Tazavallas toimijas "Nuori Karjala" liitos. Järjestön ruavon piämiäry on olluh Karjalan Tazavallas eläjien suomelas-ugrilazien kandurahvahien kielien da kul'tuuroin säilymine nuorien keskes. Ylen oli intresanti diedo, hyvin ruatah.
>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

Manutar

Re: Karjalan kieldy opastundukerhos

Viesti Kirjuttai Manutar »

Terveh teile.
Meilgi tiä Jovensuuspäi on tostu vuottu ruadannuh karjalan kielen opastandujoukko.
Täh joukkoh voibi tulla kai ket tundou mielenkiinduo karjalan kieleh da kultuurah.
Nygöi meidy on 8 – 12 hengie, kerävymmö OKL Opintotoiminnan Keskusliiton
pertih 1 – 2 kerdua kuun aigah opastai Sanni Tikan ker.
Meidy on Salmis-, Imbilahtes-, Suojärves- da Suistamospäi da joguhine evakos roinnuh keral.

Sygyzyl enzimäzes kerähmös piätimmö aigulistan, konzu kerävymmö yhteh.
Smietimmö niidy tiemoi, midä meidy himottau käzitellä.
Na, urokoil nygöi näisgi tiemois pagisemmo, vähäizen kielioppii opimmo opastuo
da pienii harjotuksii ruammo. Välih vie puaksuh pajatammo.
Terväh ainos aigu mänöy urokoil, äijän on meil vessel joukko yhtes.

Sanni-opastai kai karjalazet syömizet maltau luadie, häi meil toici näidy
magiedu kandau. Viime keviän saimmo kävvä hänen kezämökil gostis. Vot häi meidy
syötti, juotti da kylyngi lämmitti.

Vai nygöi tulijan keviän aigah opimmo yhtes piästä matkal omah armahah Karjalah.

Käyttäjän avatar
mp
Viestit: 2108
Liittyi: 05 08 2008, 19:45

Re: Karjalan kieldy opastundukerhos

Viesti Kirjuttai mp »

ielmainittuloih pidäy vie lizätä Lieksa da Nurmes. Kusbo vie on?

Feda

Re: Karjalan kieldy opastundukerhos

Viesti Kirjuttai Feda »

Nügöi meilgi Outokummun linnas aloimmo opastandukerhon. Piemmö sen Ortodoksi kirikön kivijallas, salil. Kerho on joga nedäli, enzimäneargi ildu. Viizitostu oli tulijua allul, vai kümmenkundu on kerähmös olluh. Toizil on erähiči muudu dieluo samal aigua. Piemmö seuraavat kerähmöt n'el'l'äs päivü(torstai) 23.4. i 30.4. tozo 4.5. Kezäl emmo pie, taki sügüzül jatkammo. Paginoi luimmo, pajatimmo, lopuškal kuundelimmo iäneh luvettuu Jevangelii i kazoimmo kniikas, Uuvves Sanas.

Hüvii Äjjünpäivün aigoi !

Salmin Jeroisellän Feda
salmi (at) telemail.fi
http://www.salmi-orusjarvi.net

Pekoi
Viestit: 356
Liittyi: 18 09 2008, 20:54

Re: Karjalan kieldy opastundukerhos

Viesti Kirjuttai Pekoi »

Juuka on pogostu Suomen Pohjais-Karjalas,sie olen rodivunnuh.Iellisnedälinny sie piettih kyläpruasniekkua,itšegi kävyin roindupaikkua da ystävii vastavumah.Sanottih,sygysyl kansalaisopistol algau Karjalan kielen kursu!
Muga kylis,kuibo linnolois?
Huigei on tiediä,jos Jovensuun opistos ei muga rodei!
P.

Maria

Re: Karjalan kieldy opastundukerhos

Viesti Kirjuttai Maria »

Minua kiinnostau kuibo on kursuniekoin igä toiziel. Iče äijäl olin kummastunnuh gu Leppävirran kursul sügüzyl menin, da iče nuorin olin. Duumaičin eigo nuorembii ni äijäl himoita karjalua opastuo, gu minua ülen äijäl kiinnostau kieli kudamua diedo pagizi.

BUTTON_POST_REPLY