Khanan metodu - pädisgo Karjalah?

[mp]

Riputin opastajat.net:tah kursan päiväzenpimendyksen ennustamizes. Se on ogv formutatas, kudamua voi kaččuo Firefox livaimel (libo Chrome 6 libo Opera 10.6 livaimil?) libo videosoittimil. Suora linku http://opastajat.net/opastus/videot/pimendys.ogv

[mp]

Luajin pimendysvideon uvvessah. Syväindö ei äijäl muuttunuh, a pikkarazii kohenduksii luajin. Liitin jogahizeh kursah pdf-tiijoston, kudaman mugah net pagizin. Hos i luvendot ollah lyhyöt vägi äijän aigua niilöihgi on mennyh. Vaihtoin vie kerran videoloin formuattua - nygöi net ollah webm koodavuksel. Sidägi Firefox, Chrome da Opera ellendetäh. Yhtälökursu on kaikil nelläl yleizel formuatal flv, mp4,ogv da webm. Indeksusivu on http://opastajat.net/opastus/videot/index.html ga voi i tuttavuo html5 muodozeh sivuh index5.html. Yhtelläh varmin taba tuttavuo videoloih on kopiruija net da kaččuo videosoittimel, ezimerkikse vlc:l (http://www.videolan.org/vlc).

[Olói]

Nygöi minulgi avavui ravevus-failu

[mp]

Kačonduohjehii, vie kerran

Tehniekan puoles videoloin kaččomine algau sellitä. Tänäpäi sain tiediä, ku palvelimen .htacces tiijostos pidäy ilmoittua livaimile, midä ruadua flv, mp4, ogv da webm tiijostoloin ker. Sit toinah livaimet maltetah kerras ruveta ozuttamah fil'moi, ku maltetanneh. Nygöi kai nelli videuo ollah webm formuatas. Enzimäine video on nelläs formuatas: webm, ogv, mp4 da flv. Toine video on webm da ogv formuatois, kolmas webm da flv, da nelläs webm da mp4 formuatois. Ei ole tolkuu pidiä niidy mones formuatas. Jälgimäi pidänöy vallita webm:n da mp4:n välil. En rubie nygöi sanomah. Toinah rubien tädä toiči šeikuiččemah "Muut paginat formual". Ga täs nevvon, kui niidy nygöi pidäs pystyö kaččomah.

1) Ainos ruadai hädävara. Mennä miltahto livaimel http://opastajat.net/opastus/videot/index.html sivule da kopiruija mitahto fil'mu mistahto formuatas omale tiedokonehele. Azendua omale konehele ozuttehes http://www.videolan.org/vlc/ ilmai suadavu vlc videosoitin, libo mitahto muu videosoitin, da kaččuo fil'mu sil.

2) Peruspalveluu uuzil livaimil. Erähät livaimet nengozenah maltetah ozuttua videoloi. Ezimerkikse Chrome maltau ozuttua webm, ogv da mp4 formuattoloi (voi olla heitetäh mp4:n bokkah), Firefox maltau ozuttua webm da ogv formuattoi, uuzi IE 9 maltau ozuttua mp4 (H.264 videokoudekku) formuattua. Erähih voi lizätä "pluginan", flashplayer on tundiettu ezimerki. Mainičen täs vaiku IE:n. Täs ozuttehes löydyy uuzi Internet Explorer 9: http://windows.microsoft.com/en-US/inte ... ts/ie/home Täs ozuttehes http://tools.google.com/dlpage/webmmf löydyy sih niškoi luajittu webm-videot ozuttai lizäoza. Mollembal ollah helpot azendua. Sen jälgeh sil, kui i Firefoxal, Chromel, Operal, ... voi mennä http://opastajat.net/opastus/videot/index.html ozutteheh da hiirel klikahuttua tiijostuo - pidäs ruveta ozuttamah videuo.

3) Parastu palveluu suau html5-sivul http://opastajat.net/opastus/videot/index5.html ku vai livain ellendänöy html:n 5-versiedy. Sivu ozuttau joga videon allun da sen voi panna hedi käyndäh. Minul moine tävvendetty IE 9 hyvin ruadoi Windowsas, Firefox ruadoi Windowsas da Linuxas, da minun kormanistuudii, Samsungan Android telefon sežo ozutti net videot html5-sivul. Opastajat.net indeksusivul on linku kumbazehgi, html-4 da html-5 sivuh.

Nygöi pidäy kodvaine kačella mittuine koudekku parahite kučistau videot hyväluaduzennu da vallita "Karjal-akadeemien" formuattu sen mugah.

[Olói]

voizigo videoi panna youtube:h? blondinnu en muudu malta käyttiä

[mp]

Fil'man luajindas

Kymmenen minuutan opastusfil'man luadimine on kui mintah kinon luadimine, vähästy pienembäl budžietal. Ezmäi pidäy kerätä da tarkistella tieduo päivyčotal. Sit kirjuttua käzikirjutus viideh kerdah da moni kerdua pidäy kuvatagi - erähäl kerral lopus huomuat ku nimidä ei ole tallendettu mustoh. Toizel kerdua unohtat tärgien repliikan. Leikkuandah čuassu kaksi. Muunnosohjelmien ečindän da opastundan jälgeh formuattumuunnoksih da verkoh riputandah menöy vaiku čuassu.

Minun Samsung Note telefon kudakui pädöy matemaattis-luonnontiijollizen opastusfil'man luajindah. Printsippu on hyvä - ekruanu kudamale voi piirdimel kirjuttua, da samal kerdua tallendua paginan. Ga ekruanu suas olla vähästy suurembi, olis helpombi kirjuttua. Piirdingi on liijan pieni ja telefonan reunoil olijoi nyblii pidäy varata. Piirdin da 7cm x 11 cm ekruanu da ollah mieluu da mielulaudua pienembät. Olis vie ihan oigei operuattorusistiemu, ei telefonanvalmistajien "ekosistiemu", sit suuren ekruanan reunoile vois kerätä abubrujii - kuvua, laskindu, tiedokonehen piätehikkunua, eläjiä videokuvua i muudu, min vois vediä luajittavan fil'man ikkunah. Tehnillizesti tämä ei ole äijiä toivottu: laukois voi ostua kymmenii erilazii laudutiedokonehii huogieh hindah - olis vai piirdin da mahto azendua oigei operuattorusistiemu. Operuattorusistieman azendamizengi hakkerat terväh keksitäh - olis vai suurembi ekruanu piirdimenke.

No ei joga fil'mua tarviče yhtenjyttyöh luadie. Šipainiekanpastandufil'man voi luadie videokameral ilmai tekstoi. Videokameruahäi nygöi on joga toizes perehes da joga toizes telefonas.

[mp]

Lizäin opastusvideoloih videon äijypäivän laskendas da pikoipikkarazet Python-ohjelmat, kuduat lasketah äijypäivän julianizes da gregorianizes kalenduaras. Ozutihes ku lähivuozikymmenet, kogo vuozisuangi, net laskiettas oigein? Täl kerdua video on webm da mp4 koodavuksel. "Poliittizesti" webm olis parembi, a mp4:n h.264 koudekku kučistau parembi. On tolkutoi riputtua kaikkie kahteh kerdah, ga pidäy kaččuo vie, kui on parembi. Videot lövvytäh opastajat.net:an kauti libo suorah http://opastajat.net/opastus/videot/index.html libo http://opastajat.net/opastus/videot/index5.html jälgimäine html5:l. Ohjelmat tiettäväine vois kirjuttua javasriptal verkoči toimijakse, ga se oli suurembi ruado migu piädielo, kudai sit peittysgi verkokoudan al.

Toizel kerdua kyzelin, ongo laudutiedokonehii, kudamih voi piirdimel kirjuttua. Nägöjäh on Thinkpad Tablet da lähiaijal pidäs tulla myödäväkse Samsung Note 10.1 - se on kui veikki minun 5.3" Notele.

[mp]

Lizäin rahvahan piänkivistyksekse opastusvideoloih "mahtottoman" tulo-summu problieman, eči luvettelos http://opastajat.net/opastus/videot/index5.html libo index.html

[mp]

Jälgimäzen kuukavven ajjannu olen luadinuh kuuzi pikkarastu opastusvideuo, nenga 78 minuuttua, da riputtanuh net opastajat.net:tah. Ruavon eistyjes kirjuttelin täh čieppih kogemuksii. Nygöi kirjutan yhtehveduo, kui se rubei menemäh, erikseh tehniekas da syväindös.

Tehniekku

Tämä on kerdomus, kui se minul meni. Eri vehkehil voi mennä eri tabah.

• Videon tallendusvehkeh, minul oli Samsung Galaxy Note telefon, kudamas on 5.3" 1280x800 pikselan ekruanu da piirdin. Telefonan operuattorusistiemu on Android.
• Piirdo-ohjelmannu käytin S-Memo nimisty, telefonan ker tulluttu ohjelmua. Olis parembigi sovelduslaukas ostettu Sketch Book Mobile ohjelmu, ga en vie tarbehekse harjavunnuh sidä käyttämäh.
• Videontallendusohjelmannu minul oli Screencast Recorder nimine 4 dollaral soveldulaukas ostettu ohjelmu. Sen azendamizekse telefon pidi "rootata". Ohjelmu on yksinkerdaine da selgei: Ruskien nyblän painettuu kai mi nägyy ekruanal, tallenduu fil'mah (paiči erähil kerroil ei). Ohjelmas ei ole väliaigunybliä, kai pidäy kerral tallendua.
• Videonkäzittelyohjelmannu tiedokonehes oli avidemux nimine ilmaine ohjelmu - sen suau Linuxah da Windowsah. Muite en edituinnuh, vaiku leikkain iäreh algu- da lopputyhjät da välil hairehen däh kahteh kerdah luvetut/kirjutetut kohtat.
• Formuatan muutokset ffmpeg (libo avconv) ohjelmal. Ohjelmal voin leikata 640x400 ekruanan yläreunas iäre 40 pikselua, telefonan ikonazii. Alguperäine formuattu oli divx video- da aac audiokoudekal kučistettu mp4 kanvertas. Jälgimäzet filmat muutin h264 da aac kučistettuh mp4 formuattah da vp8 da vorbis kučistettuh webm-formuattah.
• Opastajat.net:as filmat lövvytäh html5 da html4 muodozil luvettelosivuloil. Uuzil IE da Firefox livaimil muuttamattah html5 sivun pidäs avavuo. A ku tallendanen videon vaiku yhtes formuatas (mp4 libo webm), sit IE:h libo Firefoxah pidäy azendua plugin.

Kudakui nengozien vaihehien läbi pidäy mennä toizilgi vehkehil. Alguh piästyy ei se ylen vaigei ole. Kohtas 1 sežo proubuičin Wacom Bamboo Pen piirdolaudua - se on ylen huovis 9x15 cm piirdolaudu ilmai omua ekruanua - käzi piirdäy lavval, kuva nägyy ekruanal. Käyttöh pidäy harjavuo, ga nengomal (toinah suurembal) Khan iče on omii kursoi luadinuh. Iče pyzyn täs Samsungan 7x11 cm ekruanas/lavvas. Ku ken tahtonou Wacoman, ilmai annan. Se toimiu Windowsas, Macäs da Linuxas.

Syväindö

Piädielo on syväindös, ongo midä ozutettavua. Perusškolas yliopistotutkindoh on sada tuhattu čuassuu da kaikile aloile levendäjen ei ole ylärajua. Oli mis vallita net 78 minuuttua. Toinah ei olla algukluasoin urokat. Voi tunduo uskomattomal, ga erähii nämis kymmenen minuutan kursois pidi päivyčotal valmistella. En tiijä ongo Juulin 4v lizäkse niidy ken kaččonuh - tädä viestičieppii nägöjäh on äijän lugiettu da videoloigi palvelimelpäi on lad'd'attu.

Moizes "mielulaudu" urokas vaigevus on, ku tallendajes opastajan pidäs olla kudakui tolkus. Painotukset toinah tullah kudakui oigei, ku hos yhten pidäy ellendiä. Nygöi tiedotehniekan ker on mahto luadie čomii urokoi, kudamii ni opastajan ei tarviče urokkua pidäjes ellendiä.

Ku toven käyttiä videourokoi opastukseh, pidäs luadie harjoitukset, kui Khanan kursoil. Net pidäs luadie teeman mugah. Nämii näytehpaloi luadijes en ruvennuh moizeh hommah, ku ei ole tieduo, rubiego ken niidy vagavah kaččomah.

Nämii videourokoi luadijes minun motivatsii oli ozuttua ku niidy voi luadie, karjalaksegi. Terminolougizii kyzymyksii tulou vastah kaiken aigua, ga tulou toizisgi kielis, ven'as, suomes,... Poliittizet piättäjät tahtottas siduo karjalan kieli "etnokul'tuuralline komponentu" nimizeh kiveh da sen keral upottua.

[Maria]

Jo duumaičin ku heinykuun lomal olen, kusbo Ol'oi elät da kus olet heinykuul, piäzizingohäi videokameranke ajelemah ku luadizimmo videon hos šipainniekan luajindas.

Da ku ollou joudavannu se Wacom, voizin laihinah ottua, tahtozin opitella videon luajindua. Ga sit ku kentah ollou kenel mostu pidäs ken parembien neroloinke ruvennus luadimah, voin hänele työndiä.

Juulinke toven olemmo videoloi kaččonuh. Yhty kaččojes rubein siirdämäh kursorua järilleh alguh päi, ga Juuli kerras iänähti, mindähbo muga ruat, häi kaččou En tiijä äijygo häi nämis videolois ellendäy, hos jo ellendäygi, sanommo, matemaatiekkua onnuako enämbi ku moni hänen igähine, ga ei vie muga äijy (Kebjieh maltau ližätä/vähendiä pienien luguloinke, jaguagi. Ku konzutah midätah ruadau, puaksuh on mostu kudamas voi matemaatiekanke kižata. Erähänny piän pihal ku lapsienke olimmo, midätah kivienke kižaimmo, sit kaččoin ku kivie oli kuuzi, meidy silloi pihal kolme hengie, kyzyin Juulil äijygo suazimmo kivie ku jogahizele annettas yhty äijy, häi kodvan kivie kaččeli da sanoi kaksi, sit vie sanelin ku kuuzi jagua kolmel roihes kaksi. Ga täs mieleh juohtui ku erähis kirjois on vähästy erijyttyöh saneltu nämii virkehii, kui net mennäh, kui sanuo karjalakse 3+5=8, 4-1=3, 4*2=8, 9/3=3