Tiä Huabajärvel ylen hyväs mieles olemmo, saimmo taki opastuo karjalan kieldy (livvi) dai kul`ttuurua keväzeh sah. Nu, kursa oli nuaburis Pyhäjärvel, vai eihäi ylen pitky matku ole mašinasel ajua 35 km. Meijjän kursal oli seiččie opastujua; kuuzi akkua da yksi mušikku. Monenmostu mugavua oli opastai meile urokkozil luadinu; pajatimmo, luvimmo, pagizimmo, kačelimmo DVD-filmilöi, erähäzet kirjuttivat runoloigi. Čuajuu joimmo da šipainniekkoi söimmö, i vie opittelimmo opastuo osutelmuagi...Ylen äijäl oli mieldykiinnittäjii dieloloi, ku vai aigua olizi enembi ollut. Meijjän kursa ku ei ollut joga nedäli.
Žurnualan toimittai luadi kursas sanelun,da se oli kolmeh žurnualah työnnetty. Onhäi moine dielo ylen hyvä viestittiä ristikanzal. Kursan lopittua kirjutimmo vie rahvahanopistoh kirjaizet da uuttu kursua tulijal sygyzyl toivoimmo. Vuottavazel mielel olen...pikkarazet linduzet pajatettih što karjalan kielen kursal olizi jatkuo, i vie tiä omas linnas Huabajärvel
.
Vai kuibo meni kursat toizis linnois da hierulois? Kerdokkua!
