Karjalan opastus školis?

[mp]

Kuibo karjalan kielen opastus školis nygöi menöy? Äijängo on opastujua, mil kluasoil, äijängo čuasuu nedälis?

[villala]

Kotkatjärves on 130 lastu. Karjalan kieldy opastutah läs 40 lastu, kolmandes viijendes da kerhuo yheksändeh kluassassah. školas karjalan kieldy opastetah vaigu yksi čuassu nedälis da yksi čuassu kerhuo.
Joga keziä omas školas ruadau lapsien leiri "Livvin linduzet".

[AE]

Ylä-Anuksen školas on 41 opastujua. Karjalan kieldy opastutah 12 opastujua. Karjalan kieldy opastetah nelländel kluasal 2 čuassuu nedälis, viidendel kluasal 1 čuassu i kuvvendel tožo 1 čuassu. Gorničas lapset tuttavutah ennevahnallizien vehkehienke da opastutah niilöih sanoih.

[mp]

Laihinoin täh palazen "opastajan" tekstua:

"Olin tänäpäi Melioratiivnois, sie oli pagin Ven'an kyläškolien tilandeheh näh. Kačoin A.V. Barišnikovan da L. Levojevan lapsii. Tämä on meile Karjalas ainavo škola, kus opastetah kieldy joga kluasas (1-11 kl.). Vie kerran ellendin, kai rippuu školan johtajas da opastajas. Ku hyö tahtotanneh opastua kieldy, opastandu roih: löydyy kui čuassuu, mugagi opastujii."

Ližiän vie täh: Meliorativnoi ei ole vahnu karjalaine kylä, a johtai, endine da nygöine, sanotah ku Karjalas eläjien pidäy tundie karjalastu kul'tuurua da paista, hos vähäine, karjalan kieldy.

[verkomuagari]

Täs kohtas olluh "vellen" viesti "Rubiemmogo pahois kohtis pagizemah..." da sih liittyjät viestit on siirretty forumah "Muudu paginua" teemakse "Rubiemmogo pahois kohtis pagizemah".

[kiveleva olga]

Meil Dessoilas lapset opastutah kieldy 5 kluasas,minä opastan karjalan kieldy, Ljudmila-suomen kieldy, tänävuon minul on yli 50 lastu karjalan kielel.Enne oli 5-6 hengie joukos, nygöi on 10-13 lastu kerras,jygei on opastua kieldy, konzu on äijy lapsii, kenlienne parembi, ken pahoi maltau,kenel nikui ei mene kieli, onhäi moizii lapsii, kudualoil ei ole kieli-duuhua, ei se mene piäh,a pidäy opastua kaikkii,ei sua mennä ielleh, konzu hot yksi lapsi ei ellendännyh teemua.Vot on paha niilöi lapsil,kuduat tahtotah da voijah. Alguskolas kyzyin karjalan kieldy cuasuloi, sanottih ei ole rahua.Vot muga on. Lapsensuadus on kieli,en tiijä äijy go lapsii kävyy, no minun tytär suvaiccou kielen urokkua sie. Tahtotah avata kielepezän, vahnembi tytär jo skolah menoy terväh,en rubie muuttuuo joukon nygoi,a vot pienen lapsen tahton andua sinne.

[mp]

Olga Kotkatjärvespäi kirjuttau sähköpoštači, ku tänävuon 2009-2010 häi opastau Kotkatjärves 12 čuassuu da Koveris 4 čuassuu, da sit vie toine opastai kahtele muule kluasale. Kotkatjärves karjalan kieldy opastuu 99 lastu.

[kuldaine]

Veškelyksen školas opastutah karjalan kieldy kaikis kluassois kai lapset. 1 kluassua školas ei ole, 2-4 kluasois – 2 urokkua nedalis, 5-6 – kolme čuassuu, 7-9 k – 2 urokkua, 10-11 – 1 urokku. Paha on ku ei ole hyviä opastandukniigua, sanakniigua

[mp]

Žiäli ku täh opastundu- da sanakniigukyzymykseh ei ole hyviä vastavustu. Sanakniigan luajindu on kui kilbujuoksuo realimuailmanke. Ku azettunet vuozikymmenikse, kerras et tavoita. Vikse tiijätgi Suomes jullatun, suomen kielel luajitun, Suomelas-ugrilazen seuran "Karjalan kielen sanakirjan", kolme puolenke tuhattu sivuu. Sidä nygöi voi kaččuo internetači, linkin lövvät täl forumalgi. Tämän sanakniigan bumuagukoupiit nygöi ollah Karjalan Kielen Seuran hantuzis da školakäyttöh voit pyydiä koupien KKS:späi. Veškelyksespäi kaččojen tämä sanakniigu on mieldykiinnittäi sendäh, ku suuri(n?) vuitti sanois ollah Ahtian kerätyt - häi enimyölleh keräi Suojärvel, Veškelykses da Siämärvel (dai Anukses). SUS:n sanakniigu on monumentalline ruado da hyvin pädöy resursakse sanakniigan luadijale, a se ei ole käyttösanakniigu. Sie et lövvä tiedokonehen ozii etgo biolougien terminöi. Sengi ved' tiijät ku valmistuu uuzi ven'a-karjal sanakirju. Ga sen puaru, Makarovan sanakniigu jo on vahnu etgo sidä lövvä kniigulaukois. Tiettäväine tahtozimmo uvvet 50000-sanahizet sanakirjat ven'a-karjal, karjal-ven'a, suomi-karjal i karjal-suomi dai pienembät kormanikogossah, da vie suuren karjal-karjal sanakniigan da eričyssanakniigat, ga täs on jo pyvvetty kymmenii libo sadoi ruadovuozii. Passiboičemmo sanakniigoin luadijoi sit ruavos mi jo on ruattu, a vie on sijua uuzile ruadajile.