Kaikin tiettih, ku Uhtual (Kalevalas) moine pezä jo ruadau. Tämän pezän toiminnas, kui i inarinsaamelazes kielipezäs kuulimmo nämmien pezien tutkijal, Annika Pasazel, kuduan lapset ičegi inarinsaamelazeh pezäh kävväh.
Enne pezäazieloi vaihtoimmo muitegi kuulumizii. Anuksen eläjis 60% ollah karjalazet, Priäžäs karjalastu on 6700. Anuksel on rahvahallizen piirin stuatussu, Priäžygi moizen tahtou. Anukses ruvetah kirjuttamah tienviitat ven'an ližäkse karjalakse, sen jälgeh Priäžäsgi. KKS:n kuulumizii oldih karjalan kielen professoran virran täytön eistymine. Ruado ei-alovehellizen vähembistökielen stuatussan suamizekse karjalan kielele Suomes vie on kesken. Jälgiaigannu KKS on olluh aktiivine kniigoin da iänikniigoin julguandas. Seura on tilannuh karjalan kielen da kul'tuuran maltokeskuksele tilat Jovensuus tulijas vuvves lähtijen.
Rubeimmo lähembi kaččomah kielipezäkyzymysty. Ozuttihes ku kaikin paikal olluot kannatettih kielipezäidejua, hos i kaikin tožo ellendettih, ku mondu on vaigevuttugi. Virguelimih niškoi pidäy pezien ohjelmu muga selgieh kirjuttua, gu se suas poliitiekallizen hyväksyndän. Piirilöin pidäy ellendiä, ku kielipezäs ryhmän koguo ei sua miärättäh kazvattua. Opastajien pidäy hyvin maltua paista karjalakse sendäh ku hyö lapsile paistah vaiku karjalakse. Vahnembien tožo pidäy tiediä, kui kielipezä ruadau da heijän pidäy ičen tahtuo ku lapset tovelleh opastuttas karjalan kieldy pagizemah. Lapsele moizeh pezäh puuttumine ei ole kummu dielo - se on kui mitahto päivykodi. Kieli vai rubieu kui ičekseh suittumah piäh.
Kielipezien käyndäh laittamizes piävyimmö kudakui tämänjyttyöh toimindumallih:
- Piiri lähettäy päivykodiloile kuččukirjazen tulla informatsiikerähmöh. Kirjazes tožo on ven'ankieline kielipezäeziteh
- Moizet informatsiikerähmöt pietäh tämän vuvven lopul. Kerähmös ollah eri aijat opastajile da lapsien vahnembile.
- Tämän jälgeh vallitah joukko opastajii, ket ollat valmehimbat kielipezis ruadamah, kaksipäivähizele kursile, kudaman jälgeh hyö vie päivän aijan tuttavutah kielipezän ruadoh Kalevalas.
- Sygyzyl 2009 vois algua 1-2 kielipeziä sego Anukses sego Priäžäs. (Petroskoisgi on moizii kielipezäpluanoi)
Kerähmön jälgeh kävyimmö kaččomas kahtu päivykodii. Tuuksel meidy šipainiekoinke vastattih školan johtai, varajohtai da päivykodi Kurgizen johtai, kai karjalakse pagizijat ristikanzat. Ozuttihes, ku päivykoin seiččemäs opastajasgi kuuzi paistah karjalakse. Johtajat jo aiga hyvin tiettih, mi se on, kielipezä, da oldas rohkiet kielipeziä nostamah. Sežo lujattih ku täs karjalazes kyläs on mostu vahnembua, kuduat tahtotah lapsii moizeh pezäh andua. Päivykoin johtai iče jo on äijän päivykoin opastandumaterjualua luadinnuh karjalakse da on rohkei luadimah mostu materjualua kielipezähgi niškoi. Lapsii emmo voinnuh pagizuttua sendäh gu hyö kaikin oldih päivyunil.
Kävyimmö toizesgi päivykois, Päiväzes. Siegi johtai da opastajat meidy šipainiekoinke vastattih da lapsienke hyö oldih valmistettu moninoumeroine pajo-, runo- da suarnuozutus karjalakse. Kaččelimmo pertit da pagizutimmo lapsiigi. Ozuttihes, ku tiä opastajat vähembi maltetah karjalan kieldy, lapsetgi ohjelman ližäkse ei karjalankielizih kyzymyksih maltettu libo ruohtittu vastata.