Kirjaimien koodavus opastajien sivuloil

[ylläpidäi]

Kui opastajien sivuloin algusivul on sanottu, sivut on kirjutettu käyttäjen UTF-8 koodavustu. Livaimen koodavuksen voi ičegi men'us azettua, ga normualizesti sivuloil pidäs olla tiedo koodavukses da livaimen pidäs automuattizesti vallita koodavus. Monel sivul karjalazet kirjaimet on kirjutettu HTML-koodavuksel, kudai nägyy oigein livaimen koodavusazetuksis rippumattah. Yhtelläh elgävyttäy kirjuttua html-koodavukses, ku se kirjuttajes ozutahes oksenduksel, utf-8:l on äijiä mugavembi kirjuttua. Moni kerdua olen kuulluh kyzymyksen, mindäh kirjaimet pahoi tullah ekruanale da olen nevvonuh muuttamah koodavuksen livaimen men'us. Ičegi sidä kummeksin, mindäh opastajat.karelia.ru vägeh tahtou muuttua koodavuksen ven'alazekse Windows-1251 koodavuksekse.

Passibo Oksanale Veškelykseh, kudai tarkembi rubei kyzelemäh, mindäh se da se sivu pahoi nägyy. Rubein sidä aziedu šeikuiččemah. Tämän opastuin: (1) WWW-palvelin, kudamal sivut ollah, voi sanuo libo jättiä sanomattah, mittumal koodavuksel sivut on kirjutettu. Huomain, ku opastajat.net palvelin sidä ei sanonuh, a opastajat.karelia.ru sanoi, ku koodavus on Windows-1251. Sivuston haldivoiččii voi sivuston juures .htaccess (Apache palvelinohjelman) tiijostos iče sanuo, mittustu koodavustu nämil sivuloil käytetetäh. Mugai luajin. Nygöi kumbainegi palvelin käsköy livaindu käyttämäh utf-8 koodavustu. (2) Jogahizel verkosivul pidäs allus <meta>-ohjehel sanuo, mittuzel koodavuksel tämä sivu on kirjutettu da livaimen pidäs muuttua koodavus sen mugazekse. Huomain ku enimil sivuil tämä ohjeh ei olluh oigein kirjutettu libo oli viäräs kohtas. Kačoin joga sivun da opin kohendua, ga voi olla ku sivuloile vie jäi hairehii. Pikkarainegi haireh, da livain ozuttau sivun koodavustu vaihtamattah. Nygöi sivuloin pidäs automuattizesti ruveta hyvin nägymäh, ku vai livaimel ollou malto ozuttua utf-8 koodattuloi karjalankielizii sivuloi. Ilmoittakkua minule ku vie löydänettö moizii hairehii.