terminät

[mp]

Helsingin Sanomis on jälgiaijal olluh tukku kirjutuksii suomen kieles da vähä Suomen kielisgi. (Enzimäzen, Kotuksen johtajan kirjutuksenhäi kiännin da riputin "muut paginat" forumale.) Tänäpäi oli kirjutus terminöin luajinnas. Suomen kielengi eläjänny säilyttämizeksi pidäy kaiken aigua luadie uuttu sanua sidä mugua ku muailmu muuttuu ymbäril - eiga, sit kieli puuttuu bokkah da surman abajile. Karjalan kielen päivittämine on vie äijiä kiirehellizembi ruado. Kirjuttai hyvin sellittäy, ku terminyruaduo ei sua jättiä yksin filologoin hantuzih. Tiettäväine filologoil on maltuo muodo-opis da toizis sananluajindan foukussilois, a azientundijat hyö ollah vaiku filolougies, kielitiijos. Yhtelläh sananluajindas pidäy tiediä mikse niidy sanoi tarvitah. Karjal kehittyi luonnollizeh tabah jälgimäzih voinih sah, a nygyaigaine fermeru jo ei eläs 30-luvun tehnolougiel. Sendäh fermerat, mašinmehaanikat da voimattomienhoidajat, kuduat vie vähäzen maltetah karjalua, pidäs vediä terminyruadoh, luvettelemah omua ruadosanastuo da kehittelemäh uuttu karjalastu sanua. Sit voidasgi filologat avvuttua, kui sanoi viännellä. Iče olen oppinuh kehittiä tiedotehnolougien sanastuo. Ei se mahtotoi ruado ole, ga ičekseh sanat ei roita, pidäy duumaija da kačella sanakirjoi. Enzimäzel kerral toinah pahoi lähtöy ga sit on midä parendua. Forumulazis ken midä maltau?

[Maria]

Onhäi sidä hos midä maltuo, ga mittustu mostu ollus kudamah näh maltas sanastuo duumaija. Minule käziruavot ollah mieldy myö, ga en ole niilöih näh vie oppinuh muga äijy karjalakse duumaija. Käziruadoloih liittyjiä karjalastu sanua toinah jo äijäl on, ga net ei olla minule tuttavat, ollougo min verdu nygyaigastu sanua. No mieleh juohtui ku pidäsgi midätah nygyaigastu käziruadoloin ohjavuo karjakse kirjuttua, ku ei ainos vaiku vahnoih käzipaikkoih näh kirjutettas. Sanommo, tänäpäi luajin katettu, kudamas on Megaman, huahmu Nintendo-kižas, kudamah olen lapsennu kižannuh da sidä samua tytärgi suvaiččou

[mp]

Joga aijal omat luaduh. Käzipaikkua nikonzu en luadinuh, a školas niegloimmo koukkuzil padapaikkazii da šhuapkazii. Erähičči ostin Singer ombelukonehen, vuozimalli nenga 1927, hindu nenga 20 euruo, da senke paikkuan staniloi libo lyhennän lahkehii. Olen i luadinuh matkuhurstizen šulkus, i jälgimäi ombelin motopyörän kattehen kangahas sumkazen mobil'niekale, parembi migu laukas ostettavat.
Löydyi eräs alan ruadai, kudai rubei kaččomah hoidosanastuo Svenska Folktingetan luajitun suomi-ruočči fruazukniigazen vuoh. Se sanasto on täs ozuttehes http://www.folktinget.fi/Site//Widget/E ... verkko.pdf - sih tarkoitukseh ylen hyvä kniigaine.

[Pedrunnybly]

Suomelais-ruoččilastu kniigaistu lugies minul tuldih mielet opastunduaijat, konzu kaiket kesät ruavoin da avvutin starikkoi Ruočis. Viegi kai kniigaizen sanat ollah tuttavat da mustan kui starikat da staruuhat minuu opastettih ruočin kieleh. Onnuako heidy jo muah pandih, a unohtumattomat hyö minul ollah. Bol'niččas oli kerran starikku, Jönsson, i hänel oldih ylen čomat sinizet silmät. Häi pagizi ku händy kučuttih armies olles "Jönsson med ögona", Jönsson silmienke libo silmy-Jönsson. Da sit oldih vie Anna da Paul-Erik da vie toiziigi...