Aigu virdua da roindupäivät toistutah. Vastevai 22.7. oli KKK:n toine roindupäivy, 5.8. oli tämän foruman kuvves roindupäivy. Tänäpäi 21.8. rodieu 75 vuottu Molotovan-Ribbentropan allekirjutetus Germuanien da Nevvostoliiton hyökkiämättömyssobimukses, kudamah liittyy kuulužu peittoperäine lizäprotokollu edupiirijavos nämien mualoin kesken.
Germuanii oli jo okupiiruinnuh Austrien da referendumas muan liittämine Germuanieh hyväksyttih 99.7% kannatuksel. Nevvostoliitol himoitti liittiä iččeh enzimäzes muailmanvoinas menetettylöi alovehii. Politiikkua sellitetäh Molotovan karjalaksegi jullatus kirjutukses.
Peittoperäzes lizäprotokolas Suomi, Baltien muat, puoli Pol'šua da Bessarabii uskaldettih Nevvostoliitole, toine puoli Pol'šua Germuaniele. Pol'ša juattih kerras, Baltien muat Nevvostoliitto okkupiiruičči ilmai bojuu, Suomen da Nevvostoliiton välil algavui 30.11.1939 "talvivoinu". Germuanii rikkoi hyökkiämättömyssobimuksen hyökkiämäl Nevvostoliittoh 22.6.1941. Täh tapahtumah liittyygi 1941-1944 jatkovoinu Suomen da Nevvostoliiton välil.
Europan Parluamentu da Europan Turvallizuon da Yhteisruavon Organizatsii ollah nimitetty 23.8. stalinizman da natsizman uhriloin mustopäiväkse. Karjalazien "pruazniekku" se on sendäh, ku Suomen da Nevvostoliiton välizet bojut käydih Karjalas da suuren vuitin karjalazis pidi lähtie igäzeh pagolazuoh roindurannoilpäi.
roindupäivy 21.8.
Valvoi: verkomuagari