Videoformuatat kehitytäh, torat pyzytäh

[mp]

Olen ennegi tuskailluh internettustandartutorii da formuatan valličendan vaigevuttu. Internetan muailmas tehniekku kehittyy ruttoh - da endizien torien sijah tullah uvvet torat.

Videotiijoston luadimizeh pidäy kolme formuattua

• Kuoriformuattu kudai sidou audion da videon yhteh tiijostoh. Moizii formuatoi ollah ezim. mp4, webm da ogg.
• Audioformuattu iänen tallendamizeh, ezim. AAC, mp3 da Ogg Vorbis.
• Videoformuattu liikkujan kuvan tallendamizeh, moizii ollah h.264, VP8 da Ogg Theora

On äijii toiziigi. mp4-videolois iänenny on AAC libo mp3 da video miltahto h.264 koudekal koudattu. Nämmä koudekat käytetäh patentiiruittuloi tehniekoi da kentahto maksau käytös kunnetahto. Google on ostannuh oigevukset webm da VP8 koudekoih da andau niilöi ilmai käyttiä. Ogg koudekat ollah avvoimet da maksuttomat. webm videolois iänenny tavallizesti on Ogg Vorbis da videonnu VP8. Oggas on omat Vorbis da Theora. Ogg koudekat ollah avvoimet da maksuttomat. Firefox (da onnuako Chrome) livain ollah maltettu ilmai lizäozii ozuttua webm da ogg videoloi.

Videotiijostot ollah ylen suuret da tarkuon kazvajes ainos vai suuretah. Sendäh tutkijat opitah kehittiä tehniekoi kučistua videot sumbembah da yhtelläh säilyttiä video da audio hyvänluaduzennu. Standartutora on piässyh uvvele kierroksele. Kuoriformuatat onnuako säilytäh, a video- da audioformuatat ollah ielleh kehitytty. Uvvet frontat ollah:

• mp4 videolois h.264:n sijah nouzou h.265 alias HEVC, kudai kučistau hyväluaduzen videon sumbembah
• webm videolois videoformuatan VP8 sijah nouzou parembi VP9, da iäniformuatakse Opus
• Ogg videoloih uvvekse videoformuatakse on kehittymäs Daala

Formuatat vikse jo ollah kudakui valmehet, koudekat vie kehitytäh. Sitgi on torua, kudai parahite kučistau. Toinah h.265:n tagan on enimbän vägie da Daala tulou toizii jälles. webm:l on se suuri edu, ku Chrome da Firefox (da Seamonkey) livaimet jo nygöi maltetah ozuttua VP9:l da
Opuksel koudattuloi videofil'moi, da ffmpeg muundo-ohjelmu maltau muundua videot täh formuattah. Youtubeh voi työndiä VP9:l da Opuksel koudattuloi videoloi. En ole vie iče kerrinnyh proubuija, hyvingo niilöinke videot kučistutah.