Savon Sanomis oli 3.6.2013 EU deputuattu Mitro Revon kirjutus "Hyvä paha nationalismi". En rubie mustuvalgiel mualuamah, toinah voizin sanuo, ku se on hyvä paha kirjutus. Hyviä on se, kui häi sellittäy ylikanzallizien da kanzallizien valdivoloin hyvii da huonoi puolii da kui EU:n fundamentannu on Europan rahvahien yhteh vedämine da tyhjien kanzallizustorien vältämine. Huonuo on, ku häi mainiččou ezimerkinny Päivännouzu-Karjalan da Raja-Karjalan, ga karjazis häi kirjuttau kui hyvin suomelastunnuh karjalaine, suomelas-natsionalistizes nägökulmas. Kalevalan häi mainiččou ezimerkinny kul'tuurunatsionalizmas, kudamal luajittih Suomen identitiettua. Täsgi on peittoajatus, ku Karjal kuuluu Suomeh.
Häi hyvin sellittäy, kui kanzallizusideju nouzi taza-arvovuadimuksis. Ylikanzallizis kniäzilöin valdivolois rahvas kelbai vaiku tykin syömizikse da yläluokkua syöttämäh. A kanzallisvaldivoloin roinnan jälgeh sit kanzu nouzi tostu kanzua vastah da rubei tovestamah omua parembuttu yli toizien, segi ei hyvä. Konzu Europan keskel Frantsii da Germuanii pandih samah talohusliittoh, se pienendi voinan tovennägözytty täs ozas muailmua. Liitto on kazvanuh da täs EU on olluh suuri menestys. EU:s voi paista, Repo kirjuttau, Šotlandien, Katalounien da Flanderan iččenästymizes, demokruattizesti da enimyölleh kiihkuttah, ilmai voinal varaitteluu.
Ga rivilöin välis luven ku min häi nägöy da analiziiruiččou ulgomualoil, sidä häi ei näje Suomes. Häi ezittäy kyzymyksen, kelle kuuluu Päivännouzu-Karjal, ga nägöjäh vaihtoehtonnu ei ole ku se kuulus karjalazile. Häi kirjuttau ku mennyt vuozisuan allus Raja-Karjalas oli suomelazii da ven'alazii školii, sen bojun voitti suomen kieli - vaihtoehtonnu ei olluh karjal. Häi sanou ku Suomen pravoslavnoi kirikkö valličči puolen, irdavui Ven'an kirikös da valličči suomen kielen, karjal ei olluh vaihtoehto. Suomelas-natsionalistizil očkil kaččojen häi ei ni huomua, karjal-vaihtoehtuo, hos ongi karjalastu roinduperiä.
Mibo sit on hyviä da mi on huonuo natsionalizmua. Revon mugah siniristuflagun viiputtamine kuroikižas on vie hyväluadustu natsionalizmua, a sen ombelemine nahkutakin hiemuah jo voi olla pahattavua. Iče miärittelen eron nenga: On hyviä natsionalizmua, konzu sanommo: "emmo ole toizii huonombat". A pahua natsionalizmua on ku sanonemmo: "olemmo toizii parembat". EU:s da EN:s on olluh äijy hyviä ruaduo pahan natsionalizman piettelemizekse, ezimerkikse EN:n vähembistökielien peruskirju da EN:n ramkusobimus kanzallizis vähembistölöis
