Kuulumizii

[Olói]

Terveh Tulgua! Svuad´busviittigi löydyy

[Pedrunnybly]

Maria, ei karjalan pagizendan däh pie sinul stressuu. Muamannu olendu on jygei ruado i kaikis ruadolois enzimäine.

[Maria]

En tiijä pidäsgo nämii omah čieppih kirjuttua ku olis tiä kuulumizis toiziigi kuulumizii ku nämii.. Ga kirjutan täh midä nelli päiviä tagaperin tetrattih.

Täl nedälil ezmäsargen käimmö kogo perehel rakendehultrah. Sie kačottih ollahgo sinul pikkarazel kai kus pidäy. Putilleh oldih. Ga oli muga, ku enimyölleh tahtoit yhtes kohtas viruo eigo ultruaju ezmäi hyvin suanuh kuvah kaikkie, sanommo, ku sinun piendy syväindy kaččeli. Ultruaju kyzyi tahtommogo sugupuolen tiediä, emmo tahtonuh. Ga sanoi olitgi jallat muga ku jygei ollus nähtägi. Ga sit näimmö, ku rodiet, oletgo pikkaraine tyttö libo poigu.

Konzu sinun čikko kohtus oli, saimmo rakendehultraspäi kerale kuvan, kudamas nävyttih pikkarazet käit sormienke. Nygöi sežo jallat varbahienke samah kuvah puututtih. Täl kerdua ultraiänitutkimus piettih tiä meijän linnass eigo sen periä pidänyh Kuopioh ajua. Ezmäsargin ultratah nygöi tiägi. Ga ultriihäi ei nygöi tämän kohtuzuksen aijannu enämbi ole ku ei nimidä mostu rodei ku pidännys.

Sinun čikko da tuatto puaksuh kuunnellah korvu minun vačal sinun potkuloi. Aijembi midätah pienembii Juuligi on tundenuh, no 16. kylmykuudu sai putin potkuzen tundie. Sit erähii päivii sen jälles tunnuttih potkut jo käzi minun vačan piäl.

Pidäy sanuo, ku hyväl mielel olen ku keviäl suammo vediä kärit saraihuoh, eihäi niidy sit pie, slingas suat kulgie lähäl muamua libo tuattua, muga kui sinun čikko pienembänny. Nygöi hoidolapsil kärit on oldu, ga hyvä ku ei sit pertis tiel seizota. Nimidä meil ei pie ostua keviäkse, kai pienet sovat da muut on ruokkoh pandu ku ollah jiädy Juulil pienekse. Tiezimmöhäi ku enämbi lastu tahtommo, ga emmo tiedänyh ku muga hätken meijän pidäy vuottua. Ripakkuo onnuako suammo järilleh kuni rodiet, sinun sevoittarel ollah laihinas oldu. Aku niidy heile vie pidäy, voinhäi ommella da niegluo ližiä sinule. Sežo on mašinah istuin sinun kahtel sevoittarel olluh laihinas, sen suammo järilleh rastavakse, ku tullah sinun sevoittaret vahnembienke gostih tänne sinun buaballuo.

Ei sua uskuo ku läs kohtuzuksen keskes olemmo, yhty äijy aigua iel päi migu tagan. Sinägi pikkaraine rubiet jo meijän iänii kuulemah da täs kuuloin aijannu roimmokseh jo tuttavat hos emmo vie ole toine tostu nähnyhgi. Meijän perehes jo tulijua kevätty vuotetah. Nygöi tädä kirjuttajesgi potkaldelet da mukkii kiändelet.

[Pedrunnybly]

Ylen čomat da hyvät oldih sinun dai pikkarazen kuulumizet. Lapsis on tulii aigu! <3

[Maria]

Hyviä rastavua kaikile!

Meil on olluh moine rastavan kalenduaru, kudamas on joga päiväle enne rastavua oma runo libo pajoine, talvizii da rastavah liittyjiä. Tämä vie on olluh suomekse, ga tuliekse vuvvekse pidäy eččie 24 karjalankielisty runuo da pajostu sih niškoi. Tänne forumale riputettulois rastavan pajolois suan jo erähii Vie meil on olluh moine kalenduaru, kudamas 24 päiväle huavoine da sinne lippuzeh kirjutettu viesti, midätah sih päiväh liittyjiä, midä lapsienke ruammo (luajimmo čomenduksii, pastammo midätah, libo midätah muudu. Tietäh fb:s olijat, sinne olen joga päiväle kuvan riputtanuh meijän ruadolois ) Nygöi segi suomekse olluh, ga tuliel talvikuul oman perehenke olemmo, sit pidäy segi karjalakse luadie

Hyväs mieles olen, ku meijän perehes rastavan aigu on rauhazua, nimittustu stressua meil, ruammo sen min tahtommo, emmo väin vägeh nimidä rastavakse luaji. Tulet annetah valgiedu vuvven pimeimbäh aigah (pertis olijoin tuohuksien ližäkse olemmo erähičči midätah syömisty luadinuh meijän taloiyhtivön grillikodas (mibo ollougi karjalakse..), savvustanuh kalua da muudu. Hyvä on istuo moizen suuren tulen lähäl, pihal -24 gruadussua, tulen lähäl lämmy. Juuligi pagizou rastavah näh enämbi kaikkie muudu paiči pakiettoih näh. (Enzimäzikse tämän päivän viestin luvettuu sanoi "Olen niin liian riemuissaan! Huomenna tulee ukki syömään!" eigo nimidä sih näh ku ehtäl suammo pakiettua. Ga sih näh ei olluh viestisgi nimidä. No, sillo-toiči niilöisgi pagizou, ga enimyölleh muudu (ičegi avvuttau pakiettua varustua, tiedäy ku rahvas annetah pakiettua toine toizele, eigo moine kummu parduniekku niidy tuo, tiedäy se on vaiku moine kiža kudamua lapset da vahnembat yhtes kižatah, ga erähis perehis vahnembat lapsien tiedämättäh) Minun mieles on žiäli ku enimät ruavahat ei malteta lapsienke nimidä muudu rastavah liittyjiä paista ku enne rastavua kyzyö "olettogo jo rastavuniekale kirjuttanuh" libo "midä toivotto rastavuniekal" da "mustakkua olla sanankuulijat ku rastavuniekku tois teile pakiettua" da sit rastavan jälles "midäbo rastavuniekku teile toi?"

[mp]

Minä en ylen suvaiče nimittumii pruazniekkoi, semmite rastavan, äijänpäivän da iivananpäivän jyttyzii, kuduat tyhjennetäh linnat da täytetäh dorogat. Tänäpäi astuin linnua myö, tuli vastah yhtet, ket paistih germuaniekse da toizet ket paistih ven'akse, muudu paginua en kuulluh, kai paikat salvas, ylen vähä kulgijua, linnu kui kuolluh. No ičegi olen ainos pajennuh muale perehelluo, mi vähä sidä vie on, silloigi konzu olin vuvven Kanuadas.

Ruavahile en ole vie andiekse andanuh sidä rastavukozamuanitustu. Meni usko auktoritiettoih, olgah rastavukoza, Kekkonen libo Putin. Školii käynnyönny minule erähäs kohtas sellitettih gu neče koza on Eino Lappalainen kudai on pannuh lammasturkin da karvušliäpän muurinpäin. Suistamol sil kozal buito oli olluh vie nelli jalgua da sarvetgi piäs da se vie enämbi varaitti lapsii migu nygöine Coca Cola diädö. Yhtelläh školas bumuagupusis juatut juablokku da pränikky oldih tovellizet.

Ellendän, gu täl pruazniekal ollah pitkät juuret. Sualehien tukkuondan jälgeh yhten kerran oli luba pruaznuija, syvvä iččeh kibiekse, enne keviän nälgykauttu. Da kazakal oli luba pöllätellä ižändiä. Kegrikozan kezitettyy rastavudiädökse, se nygöi nouzou kuollielois halloween pöllätyksenny. Kuilienne meil omat muahizetgi puututtih rastavudiädöin abuniekoikse. Himoittas tiediä, mittuine oli karjalazien muailmansellitys enne gu ven'alazet tuldih hristianizman ker heidy Ven'ah liittämäh. Vikse pidi endizien izändäzien mennä muan al, a siepäigi net nisset vie opitah kummitella.

[Maria]

Egläi Juuli uinovui vajai puoli čuassuu enne vuvven vaihtumistu, no sit vähästy vajai enne puoldu yödy tuatto otti hänet yskäh kattieh kiärittynny da menimmö tagapihale vastuamah uuttu vuottu kogo perehel. Sit vuvven vaihtuttuu Juuli kyzyi ongo jo pakkaskuu. Hyviä uuttu vuottu kaikile! Ozua da lykkyy tuliekse vuvvekse!

[Maria]

Myö emmo dengua taivahale ambunuh emmogo tinua valanuh ga moine oli, kudai jogavuodehizekse perindökse pidäy ottua, ku kaččoimmo vuvven läbi fotokartočkoinke, niilöinke oli kebjei mustella mennytty vuottu, mittumat ruavot kusgi kuus

[Olói]

Ylen hyviä Uuttu Vuottu kaikile opastajat.net/fruman kirjuttajile da lugijoile! Karjalan kieli ei kehity ku emmo sidä käytä, älä varua hairehii (osipkoi), kirjuta forumale. Nimi kieli nikonzu ei tule valmehekse, se eläy da kehittyy ku sidä käytetäh. Hairehii ei ole vaiku kuolluos kieles.
Ylen hyväl mielel ainos luven Marian kirjutuksii, niilöis on äijy suvaicustu.

[anatolii]

Uutta Vuotta da Roštuo!Oigiet duumat kieleh näh ollah edellizel kirjutail.