Kielien školaopastukses

[Maria]

Gu en vai Karjalan kielen opastukses kirjuta, työndän kirjutuksen muijen paginoin al. Olen duumainnuh gu meijän kielien školaopastus kummua on, gu allussah äijäl kacotah kui putillistu kieldy opastui käyttäy, äijängo on kieliopillistu hairavuo da kuibo on sanajällestys. Tiettäväine kielioppi ylen tärgei dielo on, a enämbi pidäs opastuo gu lapset rohkevuttas kieldy käyttiä hos viäräh paistah, eigo kaccuo kui hyväh paistah. Kieldy käyttäjes roih enämbi rohkevuttu da hil'l'akkaseh harjavuu putilleh pagizemah, hos opastai ei muga äijäl kielioppie allussah kaconus. Kirjutan školaniekois, kudamat vierahannu kielenny kieldy opastuu, ezim. Suomes algau kolmandel kluasal anglien kieli - en pienis lapsis kudamat voijah kois libo muijal opastuo mondu kieldy opastamattah. Omua škola-aigua mustelles mieleh nouzou gu enzimäizenny pidäs lapsele andua rohkevys kieldy käyttiä, ei pidäs tärgei olla mittumas jällestykses sanat ollah libo kuibo on taivutus, guhäi toine vähäzeh ellendäy kus lapsi pagizou. Gu on rohkevuttu paista, harjavuu lapsi kielen siändölöih sen jällesgi hos opastai ei allussah niidy opi piäh iškie. Agu ei ole rohkevuttu paista, midäbo ruat sil nerol mittumah jällestykseh sanat pannah da kusbo sijamuvvos sanat nygöi pidäs olla.