Kniigoin skanniruičendas

[mp]

Jälgimäzien nedälilöin aijannu olen skanniruinnuh ei vähembi tuhattu kniigan sivuu. Kui kaikes ruavos, jälgehpäi tunduu, ku nygöi maltazin äijiä parembi sen ruadua. Yhtelläh ei himoita uvvelleh eččie käzih niidy kniigoi, kai net ollah kudakui lugiettavat. Täs minun praktiekku:

Mittuine ruado se on, skanniruičendu? Kniigan sivule (14cm x 21cm) syndyy nenga 2000 kirjaindu (2 KB), a sizällön kopiruičendu tekstannu kirjaimentunnistusohjelmalgi olis ylen suuri ruado. Sendäh pidäy kopiruija sivut kuvannu. Harmaisävykuvannu tekstu on kudakui lugiettavu 150 dpi (pikselua duimal) rezolutziel, mustuvalgeikuvas pidäy olla 300 dpi libo parembi rezolutsii. Tavulois čotaijen sivun kogo kučistamattah olis 1200x1800 = 2.2 MB libo 2400x3600/8 = 1.1 MB. Fotokuvien kučistusformuatois (JPG libo PNG) sivun voi kučistua 100-200 KB kogoh da se on vie kudakui lugiettavu. Samah tabah sit voi luadie 100-200 KB kogohizen PDF-tiijoston. A sivun kuva ei ole mitah fotokuva, se on tekstan kuva. Telefaks-vehkehih niškoi on kehitetty tekstankučistunmenetelmii (ITT Group3, Group4). Tämän kehitysliinien paras metodu on JBIG2, kudaman vuoh sivun voi ylen tarkannu (hos i 600 dpi) kučistua nenga 20 KB kogoh. Sitä metodua käyttäy DJVU kuvaformuattu.

Skanneri minul on aiga vahnu Epson Perfection 1640. Skanniruičendas vaigevus on parahal taval eroittua mustu valgies sendäh ku vahnois kniigois bumuagu on aiga muzavu. Skanniruičenduohjelmannu minul on (Linuxas) Xsane. Tuhattu sivuu skanniruijes pidäy smiettie rutiinat kui ruadua. Hyvä olis ku skanniruittuh kuvah ei tarviččis kuvankäzittelyohjelmanke puuttuo skanniruičendan da kučistuksen välis. Sendäh paras kontrastu da rajuandu pidäs luadie jo skanniruijes. Huomain parahakse skanniruija 600 dpi tarkuvvel mustuvalgiedu (binaaristu) kuvua da tallendua se TIFF formuattah (kučistuksenke).

Kel on suuret kovalevyt da tahtou kannattua Adoben jyttysty firmua, voi muuttua skanneras otetun TIFF kuvan PDF-muodoh. Linuxas se on kebjei luadie ImageMagick pakietas tulijal convert ohjelmal. Yhtes sivus roih 100-200 KB kogohine tiijosto kudamua voi kaččuo miltahto pdf-luvenduohjelmal. A skanniruittu sivu ei ole mitah fotokuva eiga merkitekstu. Sendäh on parembi käyttiä JBIG2-ohjelmua. Linuxah (kui i Windowsah da Macih) voi azendua ilmazen djvu-libre pakietan kudamas ollah kai tarvittavat ruadobrujat. Täs pakietas tulijal cjb2 ohjelmal voi muuttua binaarizen TIFF libo PBM kuvan DJVU-formuattah, kudai on kučistettu JBIG2-metodal. Kučistetun sivun kogo on 10-30 KB. Puaksuh sidä on selgiembi lugie migu alguperästy kirjan sivuu. DJVU-sivut voi pakuija yhteh tukkuh djview libo livaimel lugiettavakse tiijostokse. Ga verkon yli lugijes toinah on parembi pidiä sivut erilläh, eiga kerras tarviče siirdiä verkon yli kogo kniigua, 5 MB.

[mp]

Rastavuloman aigah istuin kymmenii da kymmenii čuasuloi tiedokonehen iäres da opin luadie tiedokonehel kačottavakse vahnoi kniigoi. Nygöi kačottavakse valmehennu on kymmene kudakui lugiettavua kirjua. Erähien skanniruičendu hyvin ozavui, toizien huonombi; enzimäzet pahoi, jälgimäzet parembi. Se minuu iččiegi hämmästyttäy, kui hyväluaduzennu kogonazen kniigan voi kučistua viideh megatavuh - nygöihäi kaikil on digitualizii kameroi kudamil otettuloi kuvii työnnelläh sähköpostači - sen kogoinegi fotokuva vältämättäh ei ole putilline. Minun haireh oli skanniruija enzimäzet kniigat 150 dpi harmaisävykuvinnu. Ekruanal fotokuvinnu kaččojen net ozutettihes putillizile, a kučistuttih suurinnu da huonoluadizinnu. Kuvankäzittelyl niidy voi vähäzel kohendua ga ei putillizikse. Kuvankäzittely vie aigua - tuhat kerdua kuuzi minuuttua on sada čuassuu. Ku ei oldas oldu laihinkniigat, olizin uvvelleh skanniruinnuh. Täs vie ohjehet kui hyvin skanniruija

• Valliče skanneris tarkus 600 dpi da värikse binaarine mustuvalgei (ei harmai libo värilline - kuvien skanniruičendu erikseh). Sivun kogo toinah on 3200x4800 pikselua.
• Kačo kuspäi skanneris on lampu, ku sivun sellänpuoleine reuna ei jiäs muzavakse: muzavu reunu => probliemu
• Valliče oigien kogoine aloveh da azeta kniigu suorah, ku sidä ei tarviččis jälgehpäi kohendella.
• Ku kuvas ollou tačmoi, skanneriohjelmu toinah ne voi pyhkie enne tallendustu. Vähäine muzavus sellän vieres sežo voi kohenduo tačmanpoistandal (despeckling).
• Tallenda binaarizennu pbm libo tiff formuatas, tiffas voi käyttiä kučistustu. Kučistetun tiff-kuvan kogo toinah on 200-300 KB.

Hyvin skanniruittuu kuvua ei tarviče jälgehpäi kohendua. Djvu (alias jbig2) ohjelmal täyzi tekstusivu kučistuu 10-20 kilotavuh. Se minus oli kummu, ku erähičči tarkembat 600 dpi kuvat kučistuttih parembi migu huonombat 300 dpi - mindäh ostua huonombua kallehembal?! Livaimel kaččojen hyvin skanniruittu da kučistettu toinah on selgiembi migu alguperäine harmai sivu, mittuzii vahnat kniigat ollah.