Demonstratiivupronominat (Ozutandupronominat)

Demonstratiivupronominat ollah:
tämä, se, neče, tai, tämmöine, semmoine, nengoine, moine;
nämmä, net, nenne, nuot, tämmözet, semmozet, nengozet, moizet.
Demonstratiivupronominat viitatah mihtah ezineheh, samoiten ozutetah, kui loitton pagizijas on se ezineh:

tämä, nämmä ollah lähäl pagizijua
Tämä on suarnukniigu, a nämmä ollah kerdomuskniigat. Tämä sana on yksikös, a nämmä sanat ollah monikos. Täs järves joga vuottu pyytäh kalua. Tämän koiran nimi on Reppi. Nämmä naizet vaste tuldih mečäspäi
se, neče, net, nenne ollah loitombi pagizijas:
Se piirdin on terendetty, a net piirdimet ollah vie terendämättäh. Ota neče kauhu da ammulda vetty niilöis rengilöis. Minä panen tukkuh nenne hallot, sinä peze net ikkunat.
tai, nuot ollah nägyvis, no ei olla ni pagizijan, ni pagizutettavan vieres:
Tai peldo on jo kynnetty, a nuot ollah vie kyndämättäh. Tai mies ei ole tuttavu. Kuspäibo ollah nuot rahvas.
tämmöine, semmoine, nengoine, moine, tämmözet, semmozet, nengozet, moizet:
Nengoine hommu oli meil. Moine ruado ei maksa ni midä. Tämmöine kummu tapahtui. Semmoine se on. Nengozii pihoi myöte pädöy kävelläMoizil sanoil voi abeija ristikanzua. Tämmözii kaloi enne meijän järves ei olluh. Semmozet ollah dielot.

Demonstratiivupronominoin taivutus

Taivutammo yksikön demonstratiivupronominat tämä, se, neče, tai, moine:

Nominatiivu	tämä	se	neče	tai	moine
Genetiivu	tämän	sen	nečen	tuan	moizen
Partitiivu	tädä	sidä	nečidä	tuadu	mostu
Essiivu	tänny	sinny	nečinny	tuannu	moizennu
Translatiivu	täkse	sikse	nečikse	tuakse	moizekse
Inessiivu	täs	sit	nečis	tuas	moizes
Elatiivu	täspäi	sitpäi	nečispäi	tuaspäi	moizespäi
Illatiivu	täh	sih	nečih	tuah	moizeh
Adessiivu	täl	sil	nečel	tual	moizel
Ablatiivu	tälpäi	silpäi	nečelpäi	tualpäi	moizelpäi
Allatiivu	tälle	sille	nečile	tuale	moizele
Abessiivu	tättäh	sittäh	nečittäh	tuattah	moizettah
Komitatiivu	tämänke	senke	nečenke	tuanke	moizenke

Taivutammo monikon demonstratiivupronominat nämmä, net, nenne, nuot, moizet:

Nominatiivu	nämmä	net	nenne	nuot	moizet
Genetiivu	nämmien	niilöin	nennien	nuoloin	moizien
Partitiivu	nämmii	niilöi	nennii	nuoloi	moizii
Essiivu	nämminny	niilöinny	nenninny	nuoloinnu	moizinnu
Translatiivu	nämmikse	niilöikse	nennikse	nuoloikse	moizikse
Inessiivu	nämmis	niilöis	nennis	nuolois	moizis
Elatiivu	nämmispäi	niilöispäi	nennispäi	nuoloispäi	moizispäi
Illatiivu	nämmih	niilöi	nennih	nuoloih	moizih
Adessiivu	nämmil	niilöil	nennil	nuoloil	moizil
Ablatiivu	nämmilpäi	niilöilpäi	nennilpäi	nuoloilpäi	moizilpäi
Allatiivu	nämmile	niilöile	nennile	nuoloile	moizile
Abessiivu	nämmittäh	niilöittäh	nennittäh	nuoloittah	moizittah
Komitatiivu	nämmienke	niilöinke	nennienke	nuoloinke	moizienke

Demonstratiivupronominat nengoine, tämmöine, semmoine taivutah kui i pronominu moine.