Elatiivu (Syväinerondo)

Elatiivu vastuau kyzymyksih kenes? kenespäi? mis? mispäi? kus? kuspäi?

Elatiivan sijapiättehet ollah -s, -späi.

Yksikös net liitytäh yksivardalohizis substantiivois heikkoh vokalivardaloh, a kaksivardalohizis substantiivois - vokalivardaloh:
meččy (mečä-, meččä-): mečä-s, mečä-späi,
lapsi (lapse-, las-): lapse-s, lapse-späi.

Monikos sijapiättehet liitytäh monikon vardaloh:
meči-s, meči-späi-,
lapsi-s, lapsi-späi.

Sijapiätehty -späi käytetäh vaiku silloi, konzu pagin on sit paikas, kuspäi kentah libo mitah lähtöy libo on lähtözin. Tuatto tuli mečäspäi. Minun muamo on Anuksespäi.

Elatiivua käytetäh ilmoittajes

paikkua, kudaman sydämespäi kentah libo mitah lähtöy, tulou eruou, eroitetah.
Lapset lähtiettih školaspäi.
Kondii nouzi pahnaspäi.
Minä tulin laukaspäi.
Lämmin tulou suvespäi.
Poigu eroi perehes.
Pidäy riiččie nyblät paijas.
Miehet valutettih mahlua koivus.
Peze suu must'ois.
materjualua, kudamas mitah on luajittu.
Kengät on ommeltu nahkas.
Kodi luajittih puus da lavvas.
Sizär ombeli pluat'an šulkus.
Muamo keitti pudron suurimas.
sidä, mis on pagin.
Hyö paistah omis lapsis.
Nuori mies löyhkäy omas elokses.
Rahvas paistah mennyös pruazniekas.
Buabo taratti endizis aijois.
aigua, kudamas mitah algau.
Häi on kois jo alguvuvves.
Brihačut mendih ongele huondespäiväs.
Huomenizes päiväs algau heinargi.
Vihmupilvet oldih jo illas.