Genetiivu (Omando)

Genetiivu vastuau kyzymyksih kenen? min?

Yksikön sijapiäteh on -n. Se liittyy yksivardalohizis substantiivois heikkoh vokalivardaloh:
hukku (huka-, hukka-): huka-n,
lauttu (lauta-, lautta-): lauta-n,
keppi (kepi-, keppi-): kepi-n,
vihmu (vihma-): vihma-n,
Kaksivardalohizis substantiivois genetiivan piäteh liittyy vokalivardaloh:
sammal (sammale, sammal-): sammale-n.

Monikon sijapiättehet ollah -n, -en. Net liitytäh monikon vardaloh.

Piätehty -n käytetäh lugutunnuksen -loi, -löi jälgeh: kažiloi-n, järvilöi-n, heboloi-n, viluloi-n, kylylyöi-n
Piätehty -n käytetäh lugutunnuksen -i jälgeh a-vardalohizis sanois, konzu tapahtuu vokalivaihtelu a-o: lahnu (lahna-): lahnoi-n, siimu (siima-): siimoi-n, raudu (ravva-, rauda-): ravvoi-n.
Sijapiätehty -en käytetäh lugutunnuksen -i jälgeh kaikis toizis sanois: kezä (kezä-): kezi-en, heiny (heinä-): heini-en, lehmy (lehmä-): lehmi-en, kirves (kirvehe-, kirves-): kirvehi-en, heboine (heboine-, hevo-): hebozi-en.

Genetiivua käytetäh ilmoittajes

omistajua: Tuatan kodi seizou järven rannal. Opastujan školareppu on täyzi kniigua. Laukas myvväh Vladimir Brendojevan runokniigua. Lapsen boba oli lattiel. Puun oksat on painuttu alah.
ezinehen suuruttu, luaduu, igiä: Koin vieres kazvetat metrin korgevuot puut. Pihal seizoi nuoren nägöine ristikanzu. Sizärel on vuvven igäine lapsi.
tevon aigua: Mečästäi päivän oli mečäs. Velli vuvven opastui Moskovas. Myö kuun olimmo lomal.
genetiivua puaksuh käytetäh postpozitoinke: koin tagan, sillan al, kaivon vieres, pertin piäl, vihman jälles, päivän aloh, vuvven peräs, kilon verdu, tyttären hyväkse.