Sanan rakendeh

Karjalan kieles sanat taivutah eri muodolois: koivu, koivunnu, koivuspäi; suurembi, suurembat, suurembis; viijes, viijetty; olen, ollou, oldaneh, olduu, olemattah. Jogahizel sanal on oma rakendeh. Sanan rakendeheh kuulutah erilazet sanan ozat. Niidy sanotah morfeemoikse. Joga morfeemal on oma merkičys sanas. Morfeemoih kuulutah sanan vardalo, tunnus, taivutuspiäteh.

Vardalo

Vardalo on se morfeemu, kudai jiäy, ku sanas eroitetah tunnus da piäteh; koivu, suuri, ole. Vardalo viittuau sanan piämerkičykseh (leksiekallizeh merkičykseh).

Tunnus

Tunnus on morfeemu, kudai andau sanale ližämerkičyksen, ezimerkikse monikon tunnus andau monikon merkičyksen nominoile: avaim|i|s, sammal|i|l; aigumuvvon tunnus andau aigumerkičyksen verbilöile: luv|i|n. Tunnus liittyy vardaloh. Vardalo yhtes tunnuksenke on alivardalo: Sanois avaimis, sammalil, luvimmo alivardalot ollah avaimi, sammali, luvi.

Taivutuspiäteh

Taivutuspiäteh liittyy sanan vardaloh libo alivardaloh. Taivutuspiättehii ollah nominoin sijapiättehet, kudamat ozutetah nominan sijan virkehes: sammale|n, luve|n, avaimi|s; da verbilöin persounupiättehet, kudamat ozutetah persounan verbilöis: luaji|mmo. Taivutuspiäteh on sanan lopus.