Zinaida Dubinina:
Vierahal rannal
Olles vierahal rannal
kerran havačuin yöl.
Pedäi ikkunan tagan
oksat taivastu myö.
Konzu hil'l'aine tuuli
koskou oksazii puun,
rouno paginan kuulen,
rouno viestin ken tuou.
Pimei taivahan kanzi.
tiähtet kuldazet sil.
Muatah linduzet pezis
muatah venehet viel.
Mikse havačuin minä,
kunne tahtonou syväin.
Mielet lennetäh sinne,
kus on kodi, kus elän.
Siegi kaikin jo muatah,
taivas tiähtis on čoma.
Oh kui tahton ku vuottas
minuu randaine oma.
Muatah rahvas
niken ei tuskua toizile tuo.
Rouno hävii kai pahus,
jäi vai tiähtet da yö.