Tiedotehniekku

[mp]

"Tiedotehniekku" kniigan toivottavasti lopulline syväindöluvettelo on endizes ozuttehes http://opastajat.net/tmp/tieteh.pdf . Pidäy vie nedäli kaksi kačella, voibigo jo jättiä painettavakse.

[mp]

Sen verdu kyzelin toizien kirjutuksis, ku Bogdanovan, Dubininan da Sem'onovan kniigat on kopiruittu kirjuttajien luvattah. RAPUL ministerstvaspäi vikse heidy avvutetah omii oigevuksii puolistamah. Sem'onovan Maša sežo on luvallizesti verkos ozuttehes semenov.karelia.ru bun'ukan luajittuloil sivuloil, muitegi hyvin luajitut.

[mp]

Minun Tiedotehniekku kirju piäzi ilmah vuonnu 2009. Jo moni vuottu tagaperin pieni painos myödih loppuh. Nygöi pidäs sidä edituija uudeh painokseh niškoi

Kniigan syväindö sumbendajen oli nengoine:
---
Tiedokonehen käyttö
Abuohjelmat - resursoin haldivoičendu
Tekstankäzittely
Kuvankäzittely
Ezityksen luadimine
Taulukkočotaičendu
Tiedokandu
Internettu, sähköpoštu da hipertekstu
Ohjelmoindu da verko-ohjelmoindu
Tiedoturvu
---

Seiččemäs vuvves tiedotehniekan muailmu on muuttunuh äijän, vai ongo? Voibi sanuo, ku tavaras da ohjelmistotuottehis sugupolvet ollah vaihtuttu moneh kerdah da suuri kazvu on olluh kommunikatsies. Tavaran taričendu on äijäl kazvanuh da hinnat ollah pakuttu murdo-ozah. A printsipois da metodolougies muutos ei ole olluh nenga suurdu, eigo joga kohtas ole selviä ongo kehitys olluh edehpäi vai tuaksepäi. Vuvves 2009 enimbän on muuttunuh internettah piäzendy, kudai on roinnuh helpombakse da huogiembakse. Tiedoverkot da monenlaizet vuorovaikutuksellizet verkosoveldukset ollah tuldu argeh.

Tiedotehniekku-kirjan tarkoitus oli sellittiä tiedokonehen da ohjelmistoloin tarkoitustu, printsipoi da toimindan piäidejoi da juohattua käytön alguh puuttumattah yksityiskohtih. Ku käyttäi maltas vallita oigiet brujat ruadoh. Kirvehelgi voi tukkii leikata a se ei ole paras bruja sih ruadoh. Tarkoituksennu ei ole vaiku valmehien ohjelmistotuottehien ezittely kuluttajale, a ellendiägi da kuhkuttua ičegi soveldamah da ohjelmoimah. Kui slouganas sanotah: "Ohjelmoi, eiga roittos ohjelmoijukse".

Nygöi Tavoittehennu on päivittiä Tiedotehniekku-kirjan vahnannuot tiijot da levendiä teemoi, kuduat ollah nostu tärgiemmäkse jälgivuozinnu. Internetan ravenemizen da huovistumizen däh on roinnuh äijäl uuzii palveluloi internettah. Sendäh on hyvä ellendiä aziekas-palvelin ohjelmien kui i verdaisohjelmien toimindua. Internetan käytön lizettyy pahoikäytön varavot ollah lizetty. Sendäh on syydy tuttavuo, mittustu varavuo on da kui suojauduo varavoloi vastah.

Toinah menöy vuvven 2017 lopule konzu uuzi painos piäzöy ilmah. Ongo kel midä toivomuksii?

[mp]

Täs kuvas ollah IT-brujat, kudamii meinuan käyttiä Tiedotehniekku kirjan uvves painokses - kolme tiedokonehtu. Hural on Sphero-miäččy, ohjelmoidavu robottu, kudamanke voi juohattua nuorembii (10v) da vahnembii (100v) lapsii ohjelmoindah. Keskimäzen da oigienpuolizen vehkehen sydämenny on samanlaine luottokartin suurus (da 40€ hindaine) Raspberry Pi 3B tiedokoneh.

Sphero-miäččyy voi ohjata telefonal libo taulutiedokonehel Bluetooth-yhtevyksen kauti. Libo sormie siirdelemäl, libo erillizii komendoloi andamal, libo ohjelmoimal.

Keskimäzes tiedokonehes Raspberry Pi kartii on tävvendetty 32 GB micro-SD mustokartil da vihandal Pi-Top juaššiekal, kudamas on näyttimenohjain, näytin (13", 1366x768 resolutsiel), näppäimistö da ohjuandulevy, da vie kovaiänine. Nenga se on ihan tavalline kannettavu tiedokoneh, kudamal voi ajua tavallizii toimisto-ohjelmii - täs on Libre Office pakiettu.

Oigienpuoleizes Raspberry Pi kartis on vaiku tyhjät vakkaine da 128 GB micro-sd karti. Sidä on tarkoitus käyttiä palvelimennu - ezim. pilvipalvelimennu libo www-palvelimennu, kudamal voi forumuagi pidiä. Siirdynöygo opastajat.net:gi forumanke sih brujah ruadamah?

Kuvas taga-alal on vie 4G modemu-reititin, kudaman kauti nygöi menen Internettah. Pidäy kaččuo, voibigo palvelimen suaha putilleh sen kauti ruadamah.

Operuattorusistiemannu on Raspberry Pi tiedokonehele sovitettu Debian Linux.