Leena Kushtshenko, Teija Mertaranta:
Opastummo lugemah da pagizemah karjalakse
karjalakse kiändi Natalia Giloeva
Karjalan Kielen Seura 2015, 171 s.
Tädä opastundukirjua äijän suvaičen! Se on kiini täs muailmas da täs aijas, toizin kui erähät rajantagazet opastundukirjat, kudamat ollah kui etnogruafizes vitrinas otetut da tullah pölyle. Tämä on luvendukniigu kudai tuttavuttau suomelazeh yhteiskundah, kus on muahmuuttannuzii vähembistölöigi. Ei ole karjalan kielen opastundukirju hos opastaugi argielokses hyövyllisty sanastuo. Toizin kui rubriekas ozutahes, tämä ei ole vaiku kiännös, a täs on äijän karjalazii lizävyksii. Oigiehkirjutus on jälgimäzen petroskoilazen norman mugahine, täs kirjutetah "policii". Kiännös on erinomaine ga erähis kohtis nägyy kiändäjän ven'alazus: Suomen karjalazele ovvot ollah elättilöin nimet Šarka da Murka, da iče parembi kirjuttazin UNESCO da Europpu migu Junesko da Jevroppu - suomen karjalazet otammo sanat suorah, emmo kierrätä Moskovan kauti, emmohäi kirjuta juksi, libo levgu da ravdu.