Kniigubiznesas

karjalankielizii kniigoi, lehtii, cdromoi, ...

Valvoi: verkomuagari

BUTTON_POST_REPLY
Käyttäjän avatar
mp
Viestit: 2108
Liittyi: 05 08 2008, 19:45

Kniigubiznesas

Viesti Kirjuttai mp »

Karjalankielizien kirjoin biznessu pahoi ruadau. Olen duumainnuh tarita alolijua kirjutustu Omah Muah. Toinah pidäy vie vähäzen hivuo. Ongo muudu idejua täs dielos?
Julgavot lizetäh, a kusbo ostua?

Nenga 25 vuvven aijannu olen oppinuh ostua ičele karjalankielizii julgavoloi. Silloi allus ylen äijii ei ni olluh suadavil, a niilöi voi löydiä Petroskois keskilinnal Exlibris laukas. Sie ostin Makarovan sanakniigan da äijy muudu. Sidä myöte ku julgavoloin miäry lizeni, ainos vai vaigiembakse rodih niilöi löydiä. Nygöi jo Exlibris laukkugi hävii. Tiijän, erähii kniigoi voi suaha ilmai rahvahallizen poliitiekan ministerstvas, toizii voi ostua Periodika julguamos, ken net löydänöy da ruohtinou mennä kyzelemäh. Kirjan kirjuttai toinah tiedäy kus hänen kirjua voi löydiä. Jälgiaijal olen suannuh suuren vuitin kirjois "ebänormualil" taval tundemal kirjuttajan. A huigei on ezitellä kirjua toizile da sanuo "en tiijä" kyzymykseh, kusbo sidä kirjua voi ostua. Suomes äijii kirjoi voi ostua Karjalan Kielen Seuran verkolaukas, libo toimistosgi, ku vai tiedäy konzu da kus. A lizäprobliemu on vie Suomen da Ven'an erilaine hindutazo. Kuibo sellittiä nämii probliemoi?

Eroittua syväindön tuottamine, painandu da myöndy

Karjalazien kirjoin painosmiärät ollah pienet, sendäh kirjoin myöndäl ei voi suurdu joukkuo elättiä. Syväindön tuottamizen hindu on painosmiäräs rippumatoi. Erähiči kirjuttai voi ilmai tarita painovalmehen kirjan jullattavakse, a toiči sadatuhattu euruo ei tävvy syväindön tuottamizeh. Kirjan painandu on kaiken aigua huovistunnuh da pienengi painoksen voi ottua huogiel yksikköhinnal. Sendäh valdivon da fondoin abudengat pidäs suunnata syväindön tuotandoh enne gu painoksen ostandah da kirjan ilmai juandah.

Juandan probliemat

Kniigat on luajittu lugiettavikse, a kniigu ei ičekseh piävy lugijan käzih. Yksi viga on ku parahis karjalan kielen maltajis on vie kirjah maltamatoindu da karjalankieline kirju on muga kui tundematoi, luonnonvastaine tavar. Toizii probliemoi ollah kirjan löydämine da hindu. Julguamo voi subventiiruija vähä myöjän kirjan hindua popul'arnoin kirjan myöndäl. Suomen da Ven'an hindutazon eruo vois tazoittua kirju kirjas vaihtol. Ezimerkikse kumbazesgi muas kniigat vois jagua viideh hinduluokkah da 3 luokan kirjan vois vaihtua 1 da 2 luokan kirjoih. Minun mieles kniigoi ei pidäs jagua ilmai - se syö kniigan da kielen kunnivoičustu. Hos sen verran hindua pidäs olla ku sil voi maksua uvven kirjan painandan, nenga luvendu avvuttas uuzien kirjoin tuotanduo. Ku valdivol libo fondal ollou liigua dengua, voishäi jagua vaučeriloi kirjan ostoh. Julguaju vois sit vaihtua vaučerit dengah.

Kniigoin myöndän voi nygöi todevuttua internetas. Internetan edu on globualizus, laukan tavaroi voi kaččuo kustahto. A kniigan ostandah parahite kuuluu mahto livailla sidä omis käzis enne ostandua. Sendäh pidäs olla adressi da veräi uuličal, kudamas astumal kniigoi vois kačella. Kumbazesgi muas pidäs olla hos yksi uuliččutazon laukku da internetlaukku, kudamas vois ostua, hos tiluamal, mintahto Suomes libo Karjalan tazavallas jullatun kirjan. Eigo löydys laukku, kudamas olis yksi čuppu karjalazien kirjoinke, kaksi kolme pualiččumetrii? Karjalazien kirjoin myöndäl ei bohatu, a kirjučuppu vois vediä klientua muuhgi bisnezah, hos juomah kuppizen čuajuu.

Kenbo vois ruveta kniigubiznessah? Voidas olla mittahto laukat. Ga voidas omua toimindua levendiä ezimerkikse Periodika da Karjalan Kielen Seura, kuduat nygöi jullatah da myvvähgi karjalazii kirjoi. Voidas ottua omah verko- da uuliččulaukkah myödäväkse kaikkii karjalankielizii julgavoloi. Muun toimindan bokas se ei olis huonuo biznessua.
Jälgimäi muutti 1 päivänny mp, muutettu kaikkiedah 23 kerdua

Pekoi
Viestit: 356
Liittyi: 18 09 2008, 20:54

Re: Kniigubiznesas

Viesti Kirjuttai Pekoi »

A suanougo tarita Karjal-Zurnualahgi?

Käyttäjän avatar
mp
Viestit: 2108
Liittyi: 05 08 2008, 19:45

Re: Kniigubiznesas

Viesti Kirjuttai mp »

Tämän nedälin Omas Muas 2015/34 oli viizi adressii, kudamis voi ostua Periodikan ilmahpiästämii kirjoi da kuhkutettih niilöi ostamah. Periodikas ostin, Oman Muan ruadajan avvul, Taival-almanakkua Suomeh viedäväkse. Kahtes muus mainitus adresis kävyin, toizes nimidä en löydänyh, toizes löydyi eräs suomen kielen paginopas da opastundukirju, nimidä karjalakse. Viegi voi sanuo ku karjalankielizet kirjat ollah peittojulgavoloi da ei ole vaigei olla niilöi ostamattah. Äijiä parembi niilöi löydäy Karjalan Kielen Kois libo KKS:n da KSS:n verkolaukois Suomes.

Sinilind

Re: Kniigubiznesas

Viesti Kirjuttai Sinilind »

Yhtelläh nygöi on Kanzallizen kirjaston myöndykohtu. Net kaksi laukkua kudamis nimidä eulluh, kyzyitgo myöjil, ongo heile tulos karjalastu kirjua? Mindähhäi olis lehteh tyhjäh moine tiedo pandu. A laukat tiettäväine tahtotah myvvä kniigua, ei vai vitriinas libo pualičal pidiä. Ku ei olle kyzyndiä, eule ni taričustu. Kirju, kudamua ei osteta, ottau vai pualičal kohtan kirjalpäi, kudamua toinah parembah ostettas.

Kirjah maltamattomus vahnembil pagizijoil on suuri probliemu. Toinah täs on nengoine kolduittu kruugaine — maltottah ei pie kirjua, a kirjattah ei pie ni maltuo.

A kuibo ollou, löydynöygo Ven’al karjalastu kirjua äijy kirjastois? Moužet karjalazet kai voidas kävvä omah kirjastoh da kyzyö tilata kirjua.

Käyttäjän avatar
mp
Viestit: 2108
Liittyi: 05 08 2008, 19:45

Re: Kniigubiznesas

Viesti Kirjuttai mp »

Tiettäväine ei pidäs viärittiä tutkimattah. Kävyin vaiku laukois kudamat puututtih dorogale linnan läbi astujes liigua mutkittelemattah. Kanzalliseh kirjastohgi duumaičin mennä a vahnu kirjastotaloi Puškin 5 oli remontas engo enämbi ruvennuh eččimäh. Školnij mir laukas enimyölleh oli tetrattiloi da ven'ankielizii školakniigoi, onnuako Periodikan kirjoi vois tilata. Mir knig laukas löydyi puoli d'uužinua suomekielisty kniigua ga ei karjalankielisty, oligo peitos, en kyzynyh. Yhtelläh, kogemus oli "nokaut". Rita avvutti suamah Taival-almanakat Periodikas. A ku ulgomualaine tulis kyzymäh, kus voi ostua suomenkielizen kirjan, sanozingo ku Helsinkis on "Otava" nimine firmu, mene sinne kyzymäh. Olis hos yhten uuliččutazon laukan yhtes čupus yksi pualičču, kus lövvyttäs Periodikan tänä vuon jullatut kirjat.

Ola

Re: Kniigubiznesas

Viesti Kirjuttai Ola »

Vahnn bibliotiekan tagan on uuzi srojittu, ylen hyvä uuzi bibliotiekku, aijas oli ilmoitus da on ozutettu kunne pidäy mennä

Käyttäjän avatar
mp
Viestit: 2108
Liittyi: 05 08 2008, 19:45

Re: Kniigubiznesas

Viesti Kirjuttai mp »

Päivy Petroskois. Sen ilmoituksen vuoh, kodvan kierrettyy, lövvingi kirjaston sydämeh da kyzymäl "kirjulaukkah". Sie oligi Taival-almanakku, yksi vepsänkieline kirju da sanakirju da erähii stalinistizen aijan suomenkielizii kirjoi stokl'uvitriinas. A sen periä en vie ruohtis tädä leyhkiä ylen monipuolizekse karjalankielizen literatuuran laukakse. Tiettäväine, ku ei ole kyzyndiä, ei ole taričustu, da ku ei ole taričustu, ei ole kyzyndiä. Sendähhäi karjalan kieli on surman veriäl, ku ei ole kyzyndiä, ei ole taričustu. Vai suaugo kyzyö, mindäh ei ole kyzyndiä?

BUTTON_POST_REPLY