Mis lehis jullatah kirjutuksii karjalan kielel. Omas Muas tiettäväine kai tekstat ollah livvikse da Vienan Karjalas varsinkarjalakse. Vai kui ollah d'ielot Suomes? Äijängö on lehtii kus voibi lugie tekstua karjalakse? Tiijän gu Fed'an Pausu kirjuttau Ylä-Karjalah. Nygöi Lapinlahel jullattavah Matti da Liisa -lehteh alkirjuttanu työndäy silloi toiči kirjutuksii. Kirjutin rastavakse pienen jutun Mattih da Liisah da työnnän nygöi saman täh forumal. Opastuksekse työnnän lehteh vähäzen sanastuo vai teil ei pie! Vesseliä Rastavua kaikile da lykkyy nouzeval vuuvel.
Rastavu
Rastavua myö vuotammo kaikin. Lapset, tiettäväine, vuotetah enimyölleh podarkoloi da omat toivomuskirjazet rastavan ukole ollah työnnetty vikse jo mennyt kezäl. Aiguzet vuotetah sidä päiviä gu piästäh huogavumah jygien da pimien sygyzyn jälgeh. Žiäli gu erähät vai ei malteta huogavuo da vie Rastavangi aigah härčätäh äijän syödävien da kabrastamizien ker.
Iče vuotan Rastavua kui hebo keziä. Suvaičen äijän rastavan stolan syömizie. Karjalan paisti, piiruat, sienisaluattu, moneh jyttyöh luajitut kalat da kai muutgi syömizet ollah minule mieldy myö. Rastavan pajoloi kuunnelles on hyvä rauhoittua Rastavah. Podarkoloi en vuota ni vouse!
Nygyzes muailmas rastavan podarkua ei ainos ellennetä putilleh. Laukku da meedii ollah luajittu rastavan podarkas suuri ekonoumilline dielo. Lehis kirjutetah suuril kirjaimil da televiizoras röngytäh konzu rastavan aigane biznessu on huonos jamas, konzu se elavuu, konzu vauhtih piäzöy. Dai ristikanzat juostah puodilois da ajetah masinal suurih linnoih vie Rastavua vastegi gu pidäy hommata tyhjänpäiväzii podarkoloi hos kel.
Rastavan aigah on hyvä smiettie kui eliä ičen, toizien da luonnon ker? Onnuako oma elos da jogapäiväzet ruadamizet puututtas parahikse lahjoikse toizile ristikanzoile da luonnole!
Karjalan kieldy lehis, aviezois
Valvoi: verkomuagari