lugemah opastumine

[mp]

Tämän dielon kodipaikkah http://opastajat.net/opastus/lugemine/index.html on nygöi linki opastajat.net:an algusivul. Endine tilapäine kodipaikku häviey.

Kehtuaugo ken vie kaččuo tädä sivuu da sanuo mielen? Minule tämä oli hyvä harjoitus javascriptan da canvasan opastundah. Opastun vie.

[Maria]

Minun mieles nygöi on hyvä, ku väri vaihtuu viäriä painaldajes Semmite lapsile moizet vizualizet dielot toinah ollah suurembas roulis.

[mp]

Päivitin ohjelmua, iändämine on endine.

[Sinilind]

Konsonantat ollah minus hyvin iännetyt i selgiet. [t] da [t’] hyvin erotah.

Minusgi värin vaihtumine on hyvä. Kui Maria sanoi, meile lapsile vizualine järillehtyöndö on tärgei.

Diftongikižua kižates tuli milienne buga, da Moločču-ikkun nivouse enämbi ei avavunnuh oigieh vallites – tuli ainos vai suorah uuzi iänneh. Kižan vaihtandu ei avvutannuh, a pidi salvata da uvvessah avata verkolivain (Chrome 43.0.2357.65 m). Nenga 100 kyzymysty ehtin vastata eri kižois enne bugan roindua. Tämän jälles rubein duumaimah, pidäygo vouse Moločču-tekstua. Sehäi ainos pidäy klikata iäreh, mih mänöy aigua. Jälles suattu oigiedu vastavustu infl’atsii išköy hyvittelylöihgi. Nygöihäi jo värit da iändehen pakkumine ozutetah, mänigo oigieh libo viäräh. Toinah Moločču-tekstu vois jiäviekseh hos pakundualovehen viereh, ei omah ikkunah?

Eräs dielo kudai minuu vie vähäzel enämbi häiriččöy on iändehien arbomine. Nygöi voi tulla samua iännehty hos kolme kerdua peräkkäi da sit mennä pitky aigu, kuni iänneh uvvessah ei tule, libo tulou vai ylen harvah. Voi olla, ku tarbehekse suurel otandal iändehii tulou kudakui saman verran, a pienil miäril ei ole tazapainos. Ezimerkikse:

Enzimäzet 10 iännehty:
u = 7
ö = 1
e = 0
i = 2

Enzimäzet 40:
u = 15
ö = 12
e = 5
i = 8

Iändehien miärän tazapainoh suamine nämmil pienilgi miäril minus olis hyvä.

[mp]

Passibo huomivolois. Luttii kerras en lövvä. Moloččoimine erillizes ilmoitusikkunas oli helpo todevuttua eigo sille ole helpuo vaihtoehtuo, ga vois ezimerkikse andua merki-iänen kolme kerdua peräkkäi da jatkua nyblättäh. Ga Ekapelin ohjehis varaitetah ku ei pidäs yhtytiedy istuo kižanke terstavundassah. Pidäy kaččuo valličendusiändyö, ongo sit viäristymiä. Ga satunnazuos pitkät čiepitgi ollah mahtollizet. Onhai Aleksis Kivi dokumentiiruinnuh erähän perehen ozan, kudai toivoi yhty tyttyö a rubei poigua työndämäh. Sanantunnustuskižah pidäy kehittiä vie yksi valličendutazo. Ezmäi vallita satunnazesti samantabasien sanoin gruuppu, sit nämien joukos ozutettavat sanat da sit vie iännettävy sana.

P.S. Panin "testulaučale" versien, kudamas "Moločču" ilmoituksen paikal on kolminkerdaine merki-iäni da ohjelmu jatkau nyblän painandua vuottamattah.

P.P.S. Ei ole idejua, mindäh Chrome kuadui. Arbomizesgi en lövvä vigua. Proubuičin satunnaslugugeneruattorua. Eksperimentoin ližetes jagavundu tazoittuu kui pidäygi. Jagavundu nellän vaihtoehton kesken:
10 eksperimentua: 2, 1, 4, 3
100 eksperimentua: 23, 29, 27, 21
1000 eksperimentua: 233, 246, 261, 260
10000 eksperimentua: 2479, 2523, 2533, 2465
Tiettäväine satunnazuoh kuuluu segi mahto ku kai 10000 eksperimentua puututtas enzimäzeh vaihtoehtoh, ga se ei ole tovennägöine!

[mp]

Ohjelmu nygöi on "valmis" (kuni löydyy ylipiäzemätöindy hairavuo). Pidäs vie andua syväindö kerubiloil da serafiloil lugiettavakse. Ilmaoitakkua probliemois - opin kohendua ku ollou vigua da voinnen. Piälolii Sinilinnun viesti on hyvä ezimerki hairavoilmoitukses.

[mp]

Jatkoin smutindua iännehohjelmanke. Hos varoi lugougi vokalit, a nygöi sinilinduine (-tijaine) laulau fanfarat.

[mp]

Kuibo nygöi? Jogo tämä pädis lopullizekse? Nämii Hiloin Natoin lugiettuloi kirjaimii jo ammui on voinnuh kuulta opastajat.net:as livvin algukursas.

[mp]

Vie uuzi testuversii. Ozavundan jälgeh tämä arbou uvven nellikön iändehii arvattavakse. (Vahna versii arboi uvven kyzymyksen endizes nellikös.) Uvves versies sežo on čökehčottu alareunas, oigiet da viärät.

[Sinilind]

Moločču-ikkunan probliemu varmah oli Chromes, eigo kižas. Arbomizes probliemu minun mieles on juuri tovellizes satunnazuos. Kui mp kirjutit, pitkät čiepitgi ollah mahtollizet. A ongo moine tovelline satunnazus paras taba iändehen valličendah? Jagavundu tottu tazoittuu, a kenbo samua kižua tuhat libo kymmenentuhattu kerdua kižuau, ku suaha tazaine jagavundu. Eigo tazaine jagavundu olis hyvä vähembälgi miäräl? Ezimerkikse nygöi kižain triftongutestua kolme kierrostu. iäy tuli 5, yöy 3, uau 3, ieu 2, iey 2 da uou 0 kerdua (ku luvin oigieh). iäy eule tärgiembi triftongu migu uou, a joga tapahtukses parembah olen sih kižan periä harjavunnuh. Tovellizes satunnazuos on minun ellendyksen mugah se paha, ku erähät iändehet voijah jiähä bokkah da erähii kuatah korvah kahtel käil. No moine on minun mieli, engo malta sanuo, kui kohendua.

Iänih näh. Hos omii kaimoi äijän suvaičengi, tottu minuu miellytettih oigieh vastates net kolme rouno ku puzurin pračkahtustu! Nengomas iänes sain mielihyviä (voibihäi olla, ku olen kummalline) da kerras tahtoin kuulta sen uvvessah. Täs kižas yhtenjyttyzet pračkahtukset ollah metty korvile. Linduzen vidžerdysgi on hyvä, a vähäzel pitky da uuttu kierrostu kodvazen suat vuottua.

Čökehčottu minus on hyvä kohendus, jälles viitty vastavustu tulii čökeh-ikkun sežo. Viijes oigies vastavukses suadu fanfaru on ylen vessel! Sen kuulduu ainos vuotan, konzubo Monty Pythonan pyhiä Grualan mal’l’ua eččijät ritsarit račastetah kokossuoriehat kolisten nägyvih.