Mualoin nimet

Tiä šeikuijah karjalan kielen kielikyzymyksii: kielioppii, sanastuo i m.i.

Valvoi: verkomuagari

Käyttäjän avatar
mp
Viestit: 2108
Liittyi: 05 08 2008, 19:45

Mualoin nimet

Viesti Kirjuttai mp »

Muuannon Kylmänsellän heinypellol ei arbaiteltu, mit ollah Afrikan libo Suvi-Amerikan nellivärimuat (t.s. kartua värittäjes pidäy nelli värii). Nygöi se firmu, kudai pilai Karjalan meččii, lijastau jogiloi Suvi-Amerikan nellivärimuas, da Afrikan nellivärimuan mužikkua suuditah Suomes. Kaiken muailman muat ollah tuldu paginoih. A kuibo niilöi pidäs nimittiä?

Suurii mualoi da susiedumualoi mainitah puaksuh paginois, sendäh niilöin nimet on sovitettu omah kieleh. Loittozembis mualois olis hyvä käyttiä heijän omua nimie, ku vai tiedänemmö da maltanemmo kirjuttua. On tolkutoi sanuo Mehikon piälinnua Mexico Citykse, ku eihäi anglii ole heijän eigo meijän kieli. A kuibo kirjuttua Burkina Fason (endine Ylä-Volta) nimi, ongo se Ouagadougou libo Wagadugu? Tolkuttomannu sežo pien käyttiä suomelastu libo ven'alasty muoduo. Karjalazil on h, sendäh Gollandii libo Stokgolm ollah minun mieles tolkuttomat. Yhtelläh, ven'a on jättänyh jällen -ia loppuzih nimilöih, ven'as -ija, karjalas -ii.

Keräin mualoin nimet YR:n jäzenvaldivoloin luvettelos da tävvendelin Wikipedies da erähil toizil verkosivuloil lövvettylöil piälinnu, koordinuatoil da rahvaslugutiedoloil, suoru linki http://opastajat.net/paikat/muailmanmuat.html

Pidäy vie kyzyö Oman Muan toimittajil. Kuibo iče duumaičetto?

Maria

Re: Mualoin nimet

Viesti Kirjuttai Maria »

Minä en malta sanuo kui pidäs olla, ga ylen tärgei listu, puaksuh kustah muas paistes pidäy duumaija mittumuago nimie käyttiä karjalakse. Ga se juohtui mieleh ku školniekannu ylen hyvin mustin mualoin nimie da piälinnua, hyvin maltoin yhtistiä mualoi da flaguloi (erähäl ystäväl oli moine palakuva, kudamas oli mualoi, piälinnoi, flaguloi, ravieh saimmo valmehekse, kerras maltoimmo mintah muan nähtyy piälinnan sanuo i m.i.)ga nečidä listua lugijes dogadi kui on moizii mualoi listas kudamii silloi vie ei olluh. Nämis vois flaguloinke kižua luadie.

Käyttäjän avatar
mp
Viestit: 2108
Liittyi: 05 08 2008, 19:45

Re: Mualoin nimet

Viesti Kirjuttai mp »

Sie YR:n sivul oli nimen vieres pikkaraine flagugi, toinah pidäy net lizätä. Monenjyttymiä kižua tiettäväine vois kehittiä, ičel on mieles paikkutiijon käyttämine. Tässah minun mieles piädielo oli kirjuttua mualoin nimet nägyvih, ku niilöis vois sit torata. Hätkekse en azetunnuh miettimäh ni yhty nimie, yhtelläh uskon ku listu on hyvä pohju paginale. Luvetteluo luajiin yhtistämäl eri paikois lövvettylöi tiedoloi muodoh
e: Albania
s: Albania
k: Albanii
p: Tirana
y: 41.33
x: 19.82
r: 3,215,988
Muutin sen ielleh tallendusmuodoh
<e>Albania<s>Albania<k>Albanii<p>Tirana<y>41.33<x>19.82<r>3,215,988
kudamaspäi sit luajiin verkosivun pikkarazel ohjelmal. Tädä muoduo vois käyttiä moneh muuhgi tarkoitukseh, erilazih luvetteloih, kižoih i m.i.

Maria

Re: Mualoin nimet

Viesti Kirjuttai Maria »

Kižat ollah hyvät erähile ku pidäy midätah panna mustoh, parembi mustau kižan vuoh :)

Käyttäjän avatar
mp
Viestit: 2108
Liittyi: 05 08 2008, 19:45

Re: Mualoin nimet

Viesti Kirjuttai mp »

Laitoin flagut luvetteloh. Net ollah pikkarazet, en tiijä voibigo niilöi ulgomualaine putilleh tunnustua. Nengomii kižoi voizin kuvitella:
- annettu mua, mi on piälinnu
- annettu piälinnu, mi on mua
- annettu mua, arbua rahvaslugu
- annettu piälinnan koordinuatat, arbua mua
Jälgimäine voi olla vaigiettavu, a ken tiedäy kus Suomi on, Helsingin koordinuatat (60.18N,24.93), voi arbata, ku (59.44N,24.75) tarkoittau Tallinnua da Estouniedu. Tädä kižaten vois opastu sijoittamah muat muailman kartale.

Enzimäzes viestis mainitut Afrikan nellivärimuat ollah Ruanda, Burundi, Tanzanii da Kongon DT - jogahine on kolmen muun susiedu. Suvi-Amerikan nellivärimuat ollah Argentiinu, Uruguai, Paraguai da Brazilii.

Maria

Re: Mualoin nimet

Viesti Kirjuttai Maria »

Nygöi flaguloinke on hyvä listu :)

Kordinuattukiža vaiku noumeroloinke jygiettävy ollus, aku suannus luajittuu moizennu,ku kartas ozuttua oigiedu kohtua, sit parembi ollus.

Malesien flabu ei nävy

Käyttäjän avatar
mp
Viestit: 2108
Liittyi: 05 08 2008, 19:45

Re: Mualoin nimet

Viesti Kirjuttai mp »

Malesii sai flagun, oigiehkirjutustu kohendelin. Nygöi piädielo olis sellittiä oigiehkirjutuksen printsippoi. Ezimerkikse, kui pidäs kirjuttua karjalakse Quito libo Caracas, karjalan peruskirjaimikos eihäi ole kirjaimii q da c.
Tiettäväine koordinuatat pidäs ozuttua kartal. Yhten muan kartan vie voi piirdiä ekruanal, a 3-dimensionualizen miäčyn piirdämine tazoh on mahtotoi. En tiijä, voisgo kizata kartal kudai olis 360x180 gruadusan tazo, kudamas n'avat suuretah, da löydysgo kustahto moine kartu.

Maria

Re: Mualoin nimet

Viesti Kirjuttai Maria »

Minun mieles hyvin voi käyttiä moizii kirjaimii kudamii ei karjalazes kirjaimikos ole, yhtenjyttyöh ku pidäs kirjuttua ristikanzoin nimet muga kui net ollah. Hos ei olegi anglien kieles ä da ö kirjaimii, ku löydynöy net kirjaimet näppäimistöl, sit kirjutetah ristikanzoin da sanommo, linnoin, nimet niilöin kirjaimienke anglieksegi kirjuttajes. Suomen kieles hos ei käytetä merkilöi kirjaimien piäl, sanommo é, kirjutetah segi merki ku se kenentah nimes on

Maria

Re: Mualoin nimet

Viesti Kirjuttai Maria »

En nämii kaikkii tarkah ole kaččonuh, ga duumaičin mindäh, sanommo, Čehiin piälinnu on kirjutettu Prague? Kaččelin, ku enimil kielil toinah on kirjutettu libo Praha libo Praga, no vaiku erähil kielil Prague, Prag libo muudu.

Käyttäjän avatar
mp
Viestit: 2108
Liittyi: 05 08 2008, 19:45

Re: Mualoin nimet

Viesti Kirjuttai mp »

Maria kirjutti: En nämii kaikkii tarkah ole kaččonuh, ga duumaičin mindäh, sanommo, Čehiin piälinnu on kirjutettu Prague? Kaččelin, ku enimil kielil toinah on kirjutettu libo Praha libo Praga, no vaiku erähil kielil Prague, Prag libo muudu.
Pohjannu oli anglienkieline luvettelo. On sie vie muudugi hairavuo. Kirjuttazin Praha, hos Ven'an karjalazet onnuako pandas ven'an mugah Praga. Ruočin piälinnakse panizin nygöi Stokholm. Kačon luvetteluo keviän aigan, kui i karjalazien paikannimilöin luvetteluo.

BUTTON_POST_REPLY