Keksindönny 3d-kirjutin ei ole äijiä kummembi migu tavalline 2d-kirjutin, musteh (černil) vaiku on sagiembi da sil kirjutetah moneh kerrokseh, no pidäy suunnitella kolmedimensionualine vešši da sidä kirjuttua kerros kerrallah. Ga uudine on, ku se tariččou uvvenluaduzen "vestämizen" malton niilegi, kudamil on peigal keskel kämmendy. Toinah se tariččou suuret mahtot tavaranvalmistustevollizuos. Sendäh juuri tämä pieni innovatsii on suannuh suuren huomivon.
A kuibo on, ongo tehnolougiel taibumus pahah, libo ongo ristikanzal taibumus ezmäi soveldua tehnolougiedu pahah? Ezimerkikse tiijämmö, ku Pohjas-Korean da Iranan johtajat tahtotah kehittiä rakiettoi, julgizesti telekommunikatsieh näh, peitoči bombua työndämäh. A ku suurel rahvahal kyzynet tehnolougies, puaksuh paheksitah uuzimii keksindölöi da igävöijäh lapsusaigua, silloi tehnolougii oli parahal tazol. Kivikavven eläjii žiälöijäh, a kenbo tiedäy, heijän elos toinah oli mugavembua migu meil. Erähičči autobusas mužikku rubei minuu čakkuamah ku midälienne kirjutin tiedokonehel, hänen mieles joudaval keksindöl. Pideli hänele sanuo, ku putin mužikat ei autobusah nosta, kymmenet virstat jallai hakatah.
En rubie sanomah, ku tehnolougii olis hyviä libo pahua, engo ni sano ku se olis neitral'noidu, voi sen suundah vähäzen vaikuttuagi. Ga sen voi läs varmannu sanuo: ken oppiu olla tehnolougizes kehitykses tiedämätöi, häviey, moine on tehnolougizen kilbuvarustelun zakon. Voibi vai toivuo, ku tehnolougine kehitys olis ekolougizesti kestäjäl pohjal, ku emmo nareko hävittäs elämizen ehtoloi libo muite luadis elaijas siedämätöindy. Voishäi silgi 3d-kirjuttimel hos luadie uvven suvan hävinnyön sijah.
