Skype - telefon Internetas

[mp]

Opastundu-forumal oli paginua, kui Skype verkotelefon vois olla hyövylline kielen opastundas.

Kel Skype ruadau, olgah ozakas. Kel ei vie ole, opin täs šeikuija, midä sih niškoi tarvitah da mindäh? Ku sinul ollou tiedokoneh da tiedokonehes kuukauzimaksulline Internet-yhtevys, mindäh erikseh maksua telefonan käytös?


Vuadimukset verkole

Skype on VoIP (Voice over IP, iändy internetas) protokollu, kudai on todevutettu peer-to-peer (verdazien keskinäzenny) verkonnu. Internetas tiedo siirdyy pakiettazinnu. Pakietoin siirrändäs on kaksi tärgiedy ominazuttu: juamanlevevys - äijängo pakiettua verko siirdäy aiguyksikös, da palvelun luadu - tazazestigo kulletah pakietat. Vähimmilläh iäni siirdyy 6 Kbit/s juamanlevevyöl a ylen hyväh iänenluaduh piäzöy 40 Kb/s juamanlevevyöl. Ga iändy siirdäjes palvelun luadu on viegi tärgiembi ominazus migu juamanlevevys. Skypen iänipakietan kogo on 20 ml da edehpäikačondu ikkun on 5 ms. Ku verkon latensiaigu ollou suurembi migu 25 ms, se rubieu katkomah iändy.

Mittuine Internet-yhtevys sit pädöy? Oman Intenet yhtevyksen ominazuksii voi kaččuo livaimel ozuttehes http://www.speedtest.net Minul ičel kois on vaiku huovis 3G-yhtevys telefonači. Probuičin yhtevytty Helsinkih,Tamperele, Petroskoih da muijalegi. Tulos oli: aiga pädemätöi Skypeh. Juamanlevevytty iččeh päi puaksuh oli läs 370 Kb/s, ičespäi vaihtelih nenga 50-200. Nämmä oldas ihan hyvät arvot, a palvelun luadu oli "hud'oi", latenzi nikonzu ei olluh alle 50 ms, pahimmillah se oli läs sekundu. Moine juamanlevevys pädöy suuriengi tiedomiärien siirdelyh (10e/kk), a paginah välittämizeh se ei päi. Verdailun däh voi sanuo, ku iče gsm-telefon siirdäy paginan kudakui hyväluaduzesti 13 Kb/s juamanlevevyöl, a telefonkanualubo ruadau (läs) latenzittah. Toine probliemu 3G-yhtevyksis on se, ku tovennägözesti (ei vältämättäh) operuattoran sobimusehtoloin mugah on kielletty käyttiä peer-to-peer ohjelmii 3G-verkoči, da Skype on peer-to-peer ohjelmu.


Vuadimukset tiedokonehele

Skype-ohjelmua voi käyttiä Windows, Mac da Linux operuattorusistiemois. Ohjelmu on aiga suuri - nenga 12 MB (?) sendäh, ku se on aiga monimutkaine, da toinah sendähgi, ku se on peer-to-peer. Jälgimäine ominazus tarkoittau, ku ei ole yhty Skype telefonkeskustu, a se on levitetty ymbäri muailmua Skype-käyttäjien tiedokonehih. Sendäh toiziengi käyttäjien paginat vähäzen käytetäh minun Internet-yhtevyksii da tiedokonehen vägie. Skype ruadau erähis telefonisgi, kudamis on WLAN (WiFi) libo 3G da hyväluaduine Internet-yhtevys. Ohjelman sua ilmai lad'd'ata ozuttehes http://www.skype.com


Skype-ohjelmu

VoIP telefonan pidäy todevuttua kaksi telefonan ominazuttu: 1) yhtevyön luadimine, da 2) paginan siirdo Internetači. Skypes yhtevyön luadimine on peer-to-peer ohjelmu. Paginan siirdo on todevutettu SILK nimizel koodekal, kudai kučistau työnnettävän tiijon miärän. SILK maltau sovittua paginan luavun käytettävän juamanlevevyön mugah. Voi i työndiä kuvan paginanke.Täs käytetäh VP7 video koodekkua. Videon perusresolutsii on 320x240, a ku ollou tarbehekse juamanlevevytty, resolutsiedu voi nostua HD:h, 1280x720 suate. VGA resolutsii 640x480, 30 kuvua sekundas tarviččou nenga 384 Kbit/s (?).

Skype ei ole ainavo VoIP telefon ohjelmu. Toine tundiettu on SIP-telefon (Session Initiation Protocol). Kui nimigi sanou, SIP iče koskou vaiku yhtevyön luajindua. SIP on aziekas-palvelin ohjelmu, ei verdaisohjelmu. Kuvan da iänen siirdämizeh SIP-telefon tarviččou koodekat, tavallizesti G.729 iänele da H.264 (libo MPEG-4) kuvale. Samoi koudekoi voi i käyttiä vahnembas videokonferensiistandartas H.323. Ala kehittyy ravieh.Nygöi Skype a on enimän käytetty, a on vaigei ennustua, kus olemmo viijen vuvven peräs. Ollahgo vie vallas nygözet telefon-operuattorat libo mennähgo kai telefonpaginat internetači?

[rila]

Minul on MSN Messenger. Moneh vuodeh en vai ole paissuh sen kauti.

[mp]

Midäh ei sidägi vois käyttiä, kel se ruadau. Microsoft Live Messenger algujah oli aziekas-palvelin ohjelmu realiaigazeh tekstuviestilöin kirjuttamizel. Palvelin on kuslienne Microsoftan palvelinkonehes. Myöhembi tekstuviestilöin lizäkse voi työndiä iändy da videokuvua Microsoftan RTAudio da RTVideo koudekoil.